સંયુક્ત રાષ્ટ્રની ચેતવણી : ભારતમાં ફરી બીજી લહેર જેવી સ્થિતિ ઉભી થઇ શકે છે, આજે અઢી લાખથી વધુ કેસ
નેશનલ ડેસ્ક: ભારતમાં ફરી એકવાર કોરોનાના કેસમાં ઝડપથી વધારો નોંધાઈ રહ્યો છે. આ સાથે, કોરોનાના વેરિયન્ટ ઓમિક્રોનના કેસ પણ ઝડપથી વધી રહ્યા છે. દરમિયાન WHO બાદ હવે સંયુક્ત રાષ્ટ્રએ ભારતને ચેતવણી આપી છે. સંયુક્ત રાષ્ટ્રના એક રિપોર્ટમાં કહેવામાં આવ્યું છે કે ગયા વર્ષે ભારતમાં આવેલા ડેલ્ટા વેરિયન્ટની લહેરની જેમ ભવિષ્યમાં પણ આવી જ સ્થિતિ ઊભી થઈ શકે છે.
છેલ્લા 24 કલાકમાં દેશમાં કોરોના વાયરસના બે લાખ 68 હજાર 833 નવા કેસ નોંધાયા છે અને 402 લોકોના મોત થયા છે. દેશમાં અત્યાર સુધીમાં 6 હજાર 41 લોકો ઓમિક્રોનથી સંક્રમિત થયા છે. મહારાષ્ટ્ર અને રાજધાની દિલ્હીમાં કોરોના સંક્રમણના વધુ કેસ છે. મોટી વાત એ છે કે દેશમાં ગઈકાલ કરતાં 4,631 વધુ કેસ નોંધાયા છે, જ્યારે ગઈકાલે કોરોના વાયરસના 2,64,202 કેસ નોંધાયા હતા.
કેન્દ્રીય સ્વાસ્થ્ય મંત્રાલય દ્વારા જાહેર કરવામાં આવેલા આંકડા અનુસાર, દેશમાં હવે સક્રિય કેસની સંખ્યા વધીને 14 લાખ 17 હજાર 820 થઈ ગઈ છે. દરમ્યાન, કોરોનાને કારણે જીવ ગુમાવનારા લોકોની સંખ્યા વધીને 4 લાખ 85 હજાર 752 થઈ ગઈ છે. માહિતી અનુસાર, ગઈકાલે એક લાખ 22 હજાર 622 લોકો સાજા થયા હતા, ત્યારબાદ અત્યાર સુધીમાં 3 કરોડ 49 લાખ 47 હજાર 390 લોકો ચેપમુક્ત થઈ ગયા છે.
દેશવ્યાપી રસીકરણ અભિયાન હેઠળ અત્યાર સુધીમાં એન્ટી-કોરોનાવાયરસ રસીના 156 કરોડથી વધુ ડોઝ આપવામાં આવ્યા છે. ગઈકાલે 58 લાખ 2 હજાર 976 ડોઝ આપવામાં આવ્યા હતા, ત્યારબાદ અત્યાર સુધીમાં રસીના 156 કરોડ 2 લાખ 51 હજાર 117 ડોઝ આપવામાં આવ્યા છે.
ગુજરાતમાં કોરોનાના કેસમાં શુક્રવારે નજીવી રાહત મળી છે. ગુરૂવારે કેસની સંખ્યા 11,000ને પાર નોંધાઈ હતી જ્યારે શુક્રવારે 10,019 કેસ નોંધાયા છે. જ્યારે બે લોકોના મોત થયા છે અને 4831 દર્દીઓ સાજા થયા છે. સરકારી ગાઈડલાઈન છતાં ઉત્તરાયણની પૂર્વસંધ્યાએ લોકો પંતગ-દોરીની ખરીદી કરવા માટે ઉમટી પડ્યા હતા જ્યાં માસ્ક અને સોશિયલ ડિસ્ટન્સિંગ પણ ભૂલાયું હતું. જેના કારણે તહેવાર બાદ કેસની સંખ્યામાં વધારો થવાની સંભાવના વ્યક્ત કરવામાં આવી રહી છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp