સુરક્ષિત રોકાણ અને સારા વળતરનો વિકલ્પ : ભારત બોન્ડ ETFનો ત્રીજો તબક્કો આવતીકાલે શરૂ થશે

શેર બજારના ઉતાર-ચઢાવ વચ્ચે, સલામત રોકાણની તક આવી છે. ભારત બોન્ડ એક્સચેન્જ ટ્રેડેડ ફંડ (New BHARAT Bond ETF)નો ત્રીજો તબક્કો 3 ડિસેમ્બરે ખુલશે. ભારત બોન્ડ ETF એ નાણાં મંત્રાલયના રોકાણ અને જાહેર સંપત્તિ વ્યવસ્થાપન વિભાગ (DIPAM)ની પહેલ છે. સામાન્ય રોકાણકારો માટે તે સુરક્ષિત રોકાણનો સારો વિકલ્પ છે, જેમાં સારું વળતર મળી શકે છે.

સરકારે તેના ફ્લેગશિપ ભારત બોન્ડ ETFનો ત્રીજો તબક્કો બહાર પાડ્યો છે. ભારત બોન્ડ ETFનો ત્રીજો તબક્કો 3 ડિસેમ્બરે લૉન્ચ કરવામાં આવશે અને આ નવી ફંડ ઑફર 9 ડિસેમ્બર, 2021ના રોજ સમાપ્ત થશે. નવું ETF એપ્રિલ 2032માં પાકતી 10 વર્ષની પ્રોડક્ટ છે અને તેને ભારત બોન્ડ ETF એપ્રિલ 2032 તરીકે ઓળખવામાં આવે છે.

ભારત બોન્ડ એક્સચેન્જ ટ્રેડેડ ફંડ (ETF) જાહેર ક્ષેત્રની કંપનીઓના બોન્ડમાં રોકાણ કરે છે. આ ETF માત્ર 'AAA' રેટિંગવાળા જાહેર ક્ષેત્રના બોન્ડ્સમાં જ રોકાણ કરે છે.

ન્યૂ ફંડ ઑફરિંગ (NFO-NFO)નું મૂળ કદ રૂ. 1,000 કરોડનું હશે. વ્યક્તિ આમાં ઓછામાં ઓછા રૂ 1000 અને તેના ગુણાંકમાં રોકાણ કરી શકે છે. આ બોન્ડ ખૂબ જ સલામત માનવામાં આવે છે, કારણ કે એક રીતે તે સરકારી કંપનીઓમાં રોકાણ કરે છે અને બીજું તે AAA રેટિંગ ધરાવે છે.

રોકાણકારો એક્સચેન્જ પર કોઈપણ સમયે અથવા ચોક્કસ બાસ્કેટ સાઈઝમાં AMC દ્વારા ખરીદી/વેચાણ કરી શકે છે. તે રિટેલ રોકાણકારોને મ્યુચ્યુઅલ ફંડની જેમ જ પ્રવેશ અને બહાર નીકળવા માટે સક્ષમ બનાવે છે.

ભારત બોન્ડ ETFનો બીજો તબક્કો જુલાઈ 2020માં લૉન્ચ કરવામાં આવ્યો હતો અને લગભગ ₹11,000 કરોડ એકત્ર કરીને 3 વખતથી વધુ સબસ્ક્રાઇબ કરવામાં આવ્યો હતો. ડિસેમ્બર 2019માં તેની ડેબ્યૂ ઓફરમાં તેણે લગભગ ₹12,400 કરોડ મેળવ્યા હતા.

રોકાણના ઘણા વિકલ્પોમાંથી એક ETF છે. મ્યુચ્યુઅલ ફંડની જેમ, ETF એ સિક્યોરિટીઝનું જૂથ છે. ઇટીએફ શેરબજારના ઇન્ડેક્સમાં સમાવિષ્ટ કંપનીઓમાં રોકાણ કરે છે.

ETF એ મ્યુચ્યુઅલ ફંડ (Mutual fund) જેવા છે. પરંતુ કોઈપણ સ્ટોકની જેમ, ETF પણ સ્ટોક એક્સચેન્જમાંથી ખરીદી કે વેચી શકાય છે. તમે એક્સચેન્જના ટ્રેડિંગ કલાકો દરમિયાન પણ ETF ખરીદી અને વેચી શકો છો. ETFsને પ્રથમ NFO તરીકે ઓફર કરવામાં આવે છે. પછી આ શેર બજારમાં લિસ્ટ થાય છે. ETFની ખરીદી અને વેચાણ શેરબજારમાં ટ્રેડિંગ પોર્ટલ અથવા સ્ટોક બ્રોકર્સ દ્વારા કરવામાં આવે છે.

દેશમાં ઇક્વિટી ETF, ડેટ ETF અને ગોલ્ડ ETFમાં ટ્રેડિંગ થાય છે. ETFનું વળતર અને જોખમ BSE સેન્સેક્સ અથવા ગોલ્ડ જેવા સૂચકાંકોની અસ્થિરતા પર આધારિત છે.