સ્પોર્ટ્સ ડેસ્ક: ટોક્યોમાં હાલ ચાલતા પેરાલિમ્પિકમાં ગુજરાતના મહેસાણાની ભાવિના પટેલે ટેબલ ટેનિસની વુમન સિંગલ્સમાં ક્લાસ-4 કેટેગરીની સેમી-ફાઈનલમાં જીત મેળવતાની સાથે જ મેડલની આશા જીવંત બની છે. તેણે ચીનની ખેલાડીને સેમીફાઈનલમાં હરાવી હતી.
ભારતની ભાવિના પટેલે આ પહેલા સતત ત્રણ મેચ જીતી સેમીફાઈનલમાં પ્રવેશ મેળવ્યો હતો. સેમીફાઈનલમાં તેણે ચીનની ખેલાડી ઝાંગ મિયાઓને 7-11, 11-7, 11-4, 9-11 અને 11-8 થી હરાવીને ફાઈનલમાં સ્થાન સુનિશ્ચિત કર્યું છે. ભાવિનાએ રિયો પેરાલિમ્પિક 2016ની ગોલ્ડ મેડલ વિજેતા સર્બિયન પ્લેયર બોરિસ્લાવા રેન્કોવિકને વુમન સિંગલ ક્લાસ 4 ઇવેન્ટમાં 11-5, 11-6, 11-7થી હરાવી સેમીફાઇનલમાં પ્રવેશ કર્યો હતો.
હવે ભાવિના આવતીકાલે ભારતીય સમય પ્રમાણે સવારે 7:30 કલાકે ચીનની ઝોઉં ચિંગ સાથે ફાઈનલ રમવા માટે ઉતરશે. જો ફાઈનલમાં વિજય મેળવે તો ભાવિના ગોલ્ડ મેડલ જીતશે. જ્યારે સેમીફાઈનલમાં હારેલા બંને ખેલાડીઓને બ્રોન્ઝ મેડલની સન્માનિત કરવામાં આવશે.
ગ્રુપ A ની મેચમાં ભાવિનાને ચીનના ઝોઉ યિંગના હાથે હારનો સામનો કરવો પડ્યો હતો. આ હાર બાદ તેણે શ્રેષ્ઠ રીતે પુનરાગમન કર્યું અને મેડલ સુનિશ્ચિત કરવા માટે બે નોકઆઉટ મેચ જીતી.
ભાવિનાએ અગાઉ 23 મિનિટ સુધી ચાલેલી રાઉન્ડ-ઓફ-16 મેચમાં બ્રાઝિલના જિયોસી ડી ઓલિવિરીયાને 12-10, 13-11, 11-6થી હરાવીને ક્વાર્ટર ફાઇનલમાં જગ્યા બનાવી હતી.
રાઉન્ડ-16 માં 23 મિનિટ સુધી ચાલેલી મેચમાં ભાવિનાએ ઝિયોસીને 12-10, 13-11, 11-6થી હરાવી હતી. ભાવિનાએ સર્વિસમાં 19 પોઇન્ટ જીત્યા હતા, જ્યારે 13 પોઇન્ટ ગુમાવ્યા હતા.