World

ઉત્તર જાપાનમાં 7.6ની તીવ્રતાનો શક્તિશાળી ભૂકંપ આવ્યો હતો, જેના કારણે પેસિફિક કિનારા પર 70 સેમી સુધીની સુનામી આવી હતી, જેમાં 20થી વધુ લોકો ઇજાગ્રસ્ત થયા હતા. ફાયર એન્ડ ડિઝાસ્ટર મેનેજમેન્ટ એજન્સીએ જણાવ્યું હતું કે, 23 લોકો ઇજાગ્રસ્ત થયા હતા, જેમાંથી એક ગંભીર છે. સરકારે કહ્યું હતું કે, તેઓ સુનામી અને ભૂકંપથી થયેલા નુકસાનનો અંદાજો લગાવી રહ્યા છે. જે જાપાનના મુખ્ય હોન્શુ ટાપુના ઉત્તરીય પ્રદેશ, આઓમોરીના કિનારાથી લગભગ 50 માઇલ દૂર, પ્રશાંત મહાસાગરમાં રાત્રે 11:15 વાગ્યે આવ્યો હતો. જાપાન હવામાન એજન્સી (JMA)એ ઉત્તરપૂર્વીય કિનારા પરની તમામ સુનામી સલાહો પાછી ખેંચી લીધી છે, જે દર્શાવે છે કે હવે કોઈ ભય નથી.

અમેરિકાના રાષ્ટ્રપતિ પ્રમુખ ડોનાલ્ડ ટ્રમ્પે સંકેત આપ્યો છે કે તેમનું વહીવટીતંત્ર વિદેશી કૃષિ ઉત્પાદનો પર નવા ટેરિફ લાદવાનું વિચારી શકે છે જેમાં ભારતીય ચોખા અને કેનેડિયન ખાતરનો સમાવેશ થાય છે. ટ્રમ્પે વ્હાઇટ હાઉસ ખાતે યોજાયેલી એક બેઠકમાં આ નિવેદન આપ્યું હતું, જ્યાં ખેડૂતોએ સસ્તા વિદેશી ઉત્પાદનોની અમેરિકન બજાર પર અસર અંગે ફરિયાદ કરી હતી. આ બેઠક અમેરિકન ખેડૂતો માટે જાહેર કરાયેલા 12 બિલિયન ડોલરના રાહત પેકેજ દરમિયાન યોજાઈ હતી.

થાઈલેન્ડ અને કંબોડિયા વચ્ચે ફરી યુદ્ધ ફાટી નીકળ્યું છે. અમેરિકન રાષ્ટ્રપતિ ડોનાલ્ડ ટ્રમ્પની મધ્યસ્થી યુદ્ધવિરામ થયું હતું છતા થાઈલેન્ડે ફરી એકવાર કંબોડિયાની સરહદ પર હવાઈ હુમલા શરૂ કર્યા છે. થાઈ સેનાના પ્રવક્તા મેજર જનરલ વિન્થાઈ સુવારીએ સોમવારે જણાવ્યું હતું કે થાઈલેન્ડે કંબોડિયા સાથેની તેની વિવાદિત સરહદ પર હવાઈ હુમલા કર્યા છે. આ અગાઉ, બંને દેશોએ એકબીજા પર યુદ્ધવિરામ કરારનું ઉલ્લંઘન કરવાનો આરોપ લગાવ્યો હતો.

થાઈ સેનાએ કંબોડિયા સરહદ પર F-16 તૈનાત કર્યા છે અને કંબોડિયાના પ્રદેશ પર હવાઈ હુમલા કરી રહી છે. થાઈ સેનાએ એક નિવેદનમાં જણાવ્યું હતું કે ઉબોન રત્ચાથાની પ્રાંતના પૂર્વીય ભાગમાં બે સ્થળોએ નવી અથડામણમાં ઓછામાં ઓછો એક થાઈ સૈનિક માર્યો ગયો અને અન્ય 4 ઇજાગ્રસ્ત થયા.

જુલાઈમાં આ સરહદ વિવાદ 5 દિવસના યુદ્ધમાં પરિણમ્યો, ત્યારબાદ અમેરિકન રાષ્ટ્રપતિ ડોનાલ્ડ ટ્રમ્પ અને મલેશિયાના વડાપ્રધાન અનવર ઇબ્રાહિમે યુદ્ધવિરામની મધ્યસ્થી કરી હતી. ટ્રમ્પ ઓક્ટોબરમાં કુઆલાલંપુરમાં બંને દેશો વચ્ચે એક મોટા યુદ્ધવિરામ કરાર પર હસ્તાક્ષરના સાક્ષી બન્યા હતા. પરંતુ આ યુદ્ધવિરામ બે મહિના પણ ટકી શક્યો નહીં.

થાઈલેન્ડે કંબોડિયા પર ઉશ્કેરણીજનક કાર્યવાહીનો આરોપ લગાવ્યો છે. થાઇલેન્ડના અગ્રણી અખબાર ‘ધ નેશન’ના મુજબ, રોયલ થાઇ આર્મી કમાન્ડરોએ થાઇ-કંબોડિયન સરહદ પરના ઘણા વિસ્તારોમાં તણાવ વધવાની સૂચના આપી છે. થાઇ સેનાએ સ્થાપિત પ્રોટોકોલની અંદર પ્રતિક્રિયા આપી અને નાગરિકોને બહાર કાઢવામાં મદદ કરવા માટે ઝડપી કાર્યવાહી કરી.

રવિવારે (7 ડિસેમ્બર) સતત લડાઈ બાદ જ્યારે કંબોડિયન સૈનિકોએ સી સા કેટ પ્રાંતના કંથારાલક જિલ્લામાં ફુ ફા લેક-પ્લાન હિન પેટ કોન વિસ્તારમાં હુમલો કર્યો ત્યારે આ ઘટના બની.

રવિવારે પશ્ચિમ આફ્રિકન દેશ બેનિનમાં બાંગ્લાદેશ જેવો જ એક બળવો થવાનો હતો, જેને નિષ્ફળ બનાવી દેવામાં આવ્યો હતો. લશ્કરનો એક જૂથ રાષ્ટ્રીય ટેલિવિઝન પર આવવીને સત્તા કબજે કરવાનો દાવો કર્યો. જોકે, સરકારે તરત જ પલટવાર કર્યો અને બળવાને નિષ્ફળ જાહેર કર્યો. બેનિનના ગૃહમંત્રીએ સ્પષ્ટતા કરી કે સશસ્ત્ર દળોએ બળવોને કચડી નાખ્યો છે. આ અગાઉ, સૈનિકોએ ટેલિવિઝન પર બંધારણને નાબૂદ કરવા અને સરહદો સીલ કરવાની જાહેરાત કરી હતી. આ ઘટનાને પશ્ચિમ આફ્રિકામાં લોકશાહી માટે બીજો મોટો ખતરો માનવામાં આવી રહ્યો છે.

તાજેતરના વર્ષોમાં નાઇજર, બુર્કિના ફાસો અને માલી જેવા પડોશી દેશોમાં બળવા થયા છે. જોકે, બેનિન સરકારનું કહેવું છે કે પરિસ્થિતિ હવે નિયંત્રણમાં છે. રાષ્ટ્રપતિ પેટ્રિસ ટેલોનના વફાદાર સૈનિકોએ સત્તા સંભાળી લીધી છે. ભારતના પડોશી દેશ, બાંગ્લાદેશમાં પણ ગયા વર્ષે (2024) વિદ્યાર્થીઓ દ્વારા કરવામાં આવેલ બળવો જોવા મળ્યો હતો, જેના કારણે વડાપ્રધાન શેખ હસીનાને દેશ છોડીને ભાગી જવાની ફરજ પડી હતી, અને હાલમાં મુહમ્મદ યુનુસના નેતૃત્વમાં એક વચગાળાની સરકાર કાર્યરત છે.

અમેરિકન પ્રમુખ ડોનાલ્ડ ટ્રમ્પ વિશ્વનો નોબલ શાંતિ પુરસ્કાર મેળવવાની મહત્વાકાંશા ધરાવે છે. અને આ માટે તેઓ વિવિધ દેશો વચ્ચે શાંતિ સ્થાપવાનો ગર્વ પણ લઈ રહ્યા છે. પરંતુ તેમ છતા તેમની આ ઈચ્છા ફળીભૂત થઈ નહીં. પરંતુ તેમને ફૂટબોલની વૈશ્વિક સંસ્થા ફીફા દ્વારા શરૂ કરાયેલો પ્રથમ 'ફીફા શાંતિ પુરસ્કાર' એનાયત કરવામાં આવ્યો છે. આ પુરસ્કાર રમતગમત સિવાય વૈશ્વિક શાંતિમાં યોગદાન આપવા બદલ આપવામાં આવે છે જેના સૌપ્રથમ વિજેતા ડોનાલ્ડ ટ્રમ્પ બન્યા છે.

અમેરિકન એરફોર્સના એલિત થંડરબર્ડ્સ ડેમોન્સ્ટ્રેશન સ્ક્વોડ્રનનું એક ફાઇટર જેટ દક્ષિણ કેલિફોર્નિયાના રણમાં ક્રેશ થયું. સૈન્યએ જણાવ્યું હતું કે અકસ્માત દરમિયાન પાઇલટ જેટમાંથી સુરક્ષિત રીતે બહાર નીકળવામાં સફળ રહ્યો હતો. સેન બર્નાર્ડિનો કાઉન્ટી ફાયર ડિપાર્ટમેન્ટના જણાવ્યા અનુસાર, પાઇલટને નાની ઇજાઓ થઈ છે અને તેને સારવાર માટે હોસ્પિટલમાં દાખલ કરવામાં આવ્યો છે.

નેપાળમાં GEN-Zના આંદોલન બાદ વચગાળાના વડાપ્રધાન તરીકે શપથ લેનારા સુશીલા કાર્કી અને તેમની સરકારને સુપ્રીમ કોર્ટે મોટો ઝટકો આપ્યો છે. બુધવારે, સુપ્રીમ કોર્ટે ભૂતપૂર્વ વડાપ્રધાન કે.પી. શર્મા ઓલીના પક્ષ, CPN (UML) દ્વારા દાખલ કરવામાં આવેલી અરજી પર વચગાળાના વડાપ્રધાન સુશીલા કાર્કીને કારણદર્શક નોટિસ જાહેર કરી હતી. 12 સપ્ટેમ્બરના રોજ સંસદ ભંગ કરવાના રાષ્ટ્રપતિ રામચંદ્ર પૌડેલના નિર્ણય અંગે પણ ગંભીર પ્રશ્નો ઉભા થયા છે.

પાકિસ્તાનના ભૂતપૂર્વ વડાપ્રધાન ઇમરાન ખાનની બહેન ડૉ. ઉઝમા ખાન સાથેની મુલાકાત બાદ પરિવારે સરકાર અને જેલ પ્રશાસન સામે કડક વલણ અપનાવતા એક મોટી જાહેરાત કરી છે. ઇમરાન ખાનની બહેન અલીમા ખાને જાહેરાત કરી હતી કે પરિવાર હવે દર મંગળવારે અદિયાલા જેલની બહાર ધરણા કરશે અને જ્યારે પરિવારના 6 સભ્યો અને 6 વકીલોને નિયમિત રીતે ખાનને મળવાની મંજૂરી આપવામાં આવશે ત્યારે જ તેઓ ત્યાંથી હટશે.

અલીમાનું આ નિવેદન ડૉ. ઉઝમા ખાને ઇમરાન ખાનને મળ્યા બાદ આવ્યું છે. તેણે કહ્યું હતું કે તેમની તબિયત સંપૂર્ણપણે ઠીક છે, પરંતુ તેમને એકાંતમાં રાખીને માનસિક ત્રાસ આપવામાં આવી રહ્યો છે. ઉઝમાના જણાવ્યા મુજબ, ખાન ખૂબ નારાજ છે અને તેમણે કહ્યું હતું કે તેમને દિવસનો મોટાભાગનો સમય તેમના સેલમાં બંધ રાખવામાં આવે છે અને કોઈની સાથે વાત કરવાની મંજૂરી નથી. ઇમરાને આ માટે આસીમ મુનીરને દોષી ઠેરવ્યો છે.

રશિયાના રાષ્ટ્રપતિ વ્લાદિમીર પુતિન 4 થી 5 ડિસેમ્બર સુધી ભારતની મુલાકાતે આવશે. ભારતના પ્રવાસ અગાઉ પુતિને યુરોપને સીધો સંદેશ મોકલ્યો. તેમણે કહ્યું કે, જો યુરોપ કોઈપણ પ્રકારનો સંઘર્ષ કે યુદ્ધ ઇચ્છે છે, તો રશિયા તેના માટે સંપૂર્ણપણે તૈયાર છે. રશિયા યુદ્ધ શરૂ કરવા માંગતું નથી, પરંતુ જો મજબૂર કરવામાં આવશે તો તે પાછળ નહીં હટે.

હાલમાં જ 'દિતવાહ' વાવાઝોડાથી પ્રભાવિત થતાં ઘણાં દેશો શ્રીલંકાની મદદે આવ્યા છે. એક જાણીતી કહેવત છે કે, 'દુશ્મન ભલે હજાર મળે, પણ દોસ્ત કંગાળ ન મળે'. આજે શ્રીલંકાની સરકાર અને ત્યાંના પૂર પીડિતો પાકિસ્તાન માટે આ કહેવત ચોક્કસપણે બોલી રહ્યા હશે. 'દિતવાહ' વાવાઝોડાથી બેહાલ બનેલા શ્રીલંકાને પાકિસ્તાને મદદના નામે એક્સપાયર થયેલી રાહત સામગ્રી મોકલતા આખી દુનિયામાં તેની બદનામી થઈ રહી છે.