કેપ્ટન રોહિત શર્મા બન્યો ટીમનો ડ્રાઈવર; ટીમ ઈન્ડિયાનો આ સ્ટંટ થયો વાયરલ, વિન્ડીઝ ક્રિકેટ દ્વારા વિડીયો થયો શેર
સ્પોર્ટ્સ ડેસ્ક : ટીમ ઈન્ડિયાએ વેસ્ટ ઈન્ડિઝ સામેની પાંચ મેચની T20 ઈન્ટરનેશનલ સિરીઝ 4-1થી જીતી લીધી છે. સિરીઝની છેલ્લી મેચ રવિવારે અમેરિકાના ફ્લોરિડામાં રમાઈ હતી, જે ભારતે એકતરફી 88 રને જીતી હતી. આ મેચમાં રોહિત શર્માને આરામ આપવામાં આવ્યો હતો, જ્યારે તેની જગ્યાએ હાર્દિક પંડ્યાએ ટીમની કમાન સંભાળી હતી. મેચ પ્રેઝન્ટેશન દરમિયાન રોહિત શર્મા એકદમ અલગ અંદાજમાં આવ્યો હતો. રોહિત ગોલ્ફ કારમાં પહોંચ્યો અને તેની સાથે આ કારમાં આર અશ્વિન, દિનેશ કાર્તિક પણ હાજર હતા. તેનો વીડિયો વિન્ડીઝ ક્રિકેટ દ્વારા તેના સત્તાવાર ટ્વિટર હેન્ડલથી શેર કરવામાં આવ્યો છે. જ્યારે કેપ્ટન ડ્રાઈવર બન્યો ત્યારે ડીકે અને અશ્વિન સિવાય રિષભ પંત, સંજુ સેમસન, કુલદીપ યાદવ, દીપક હુડા, સૂર્યકુમાર યાદવ, ઈશાન કિશન અને રવિ બિશ્નોઈ પણ તેને લેવા પહોંચ્યા હતા.
ટીમ ઈન્ડિયાના યુવા ક્રિકેટરોએ આ શ્રેણી દરમિયાન શાનદાર પ્રદર્શન કર્યું હતું. અર્શદીપ સિંહને મેન ઓફ ધ સિરીઝ જાહેર કરવામાં આવ્યો હતો. ટીમ મેનેજમેન્ટે આ સિરીઝ દરમિયાન પ્રથમ ચાર મેચમાં સંજુ સેમસનને ઇનિંગ્સની શરૂઆત કરવા માટેની તક આપી હતી. સૂર્યાએ ઓપનરની ભૂમિકા ખૂબ જ સારી રીતે ભજવી હતી. આ શ્રેણીમાં કેપ્ટન રોહિત શર્મા અને મુખ્ય કોચ રાહુલ દ્રવિડ દ્વારા કરવામાં આવેલા પ્રયોગો ભારત માટે લગભગ તમામ હિટ હતા.
ભારતીય ક્રિકેટ ટીમ આ મહિનાના અંતથી એશિયા કપ 2022માં રમવાની છે. જેના માટે આજે ટીમની જાહેરાત થઈ શકે છે. આવી સ્થિતિમાં અર્શદીપ સિંહની પસંદગી આ સિરીઝના પ્રદર્શનના આધારે નિશ્ચિત જણાય છે. ટી20 વર્લ્ડ કપ 2021માં ટીમ ઈન્ડિયા સેમીફાઈનલમાં પહોંચી શકી ન હતી, પરંતુ ત્યારથી ટીમ ઈન્ડિયાએ આ ફોર્મેટમાં જબરદસ્ત વાપસી કરી છે. આ વર્ષે ઑક્ટોબર-નવેમ્બરમાં ઑસ્ટ્રેલિયામાં T20 વર્લ્ડ કપ રમાવાનો છે અને ટીમ ઈન્ડિયા જે રીતે પ્રદર્શન કરી રહી છે, તેને કારણે તેની ગણના ટાઈટલના પ્રબળ દાવેદારોમાં થઈ રહી છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp