ચાલુ નાણાકીય વર્ષના પ્રથમ અર્ધવાર્ષિક ગાળામાં કુલ પેસેન્જર વાહનોની નિકાસ વાર્ષિક ધોરણે 12 ટકા વધીને 3,76,679 એકમો થઈ છે, જ્યારે નાણાકીય વર્ષ 2023-24ના સમાન સમયગાળામાં આ આંકડો 3,36,754 એકમો હતો.વર્તમાન નાણાકીય વર્ષ (2024-25) ના પ્રથમ છ મહિનામાં ભારતમાંથી વાહનોની નિકાસ વાર્ષિક ધોરણે 14 ટકા વધી છે . કુલ નિકાસ મુખ્યત્વે પેસેન્જર વાહનો અને ટુ-વ્હીલર્સના કન્સાઇનમેન્ટમાં વધારો થવાને કારણે વધી છે. આ માહિતી વાહન ઉત્પાદકોની સંસ્થા સોસાયટી ઓફ ઈન્ડિયન ઓટોમોબાઈલ મેન્યુફેક્ચરર્સ (SIAM)ના ડેટામાંથી પ્રાપ્ત થઈ છે. સિયામના ડેટા અનુસાર, એપ્રિલ-સપ્ટેમ્બરમાં ભારતની વાહન નિકાસ 14 ટકા વધીને 25,28,248 યુનિટ થઈ છે જે અગાઉના વર્ષના સમાન ગાળામાં 22,11,457 યુનિટ હતી.
SIAMના ચેરમેન શૈલેષ ચંદ્રાએ જણાવ્યું હતું કે, “લેટિન અમેરિકા અને આફ્રિકા જેવા બજારો, જ્યાં કોઈને કોઈ કારણસર મંદી હતી, હવે સ્થિતિમાં સુધારો થયો છે. તેના કારણે નિકાસના આંકડામાં વધારો થયો છે.'' વિવિધ આફ્રિકન દેશો અને અન્ય પ્રદેશોએ કરન્સીના અવમૂલ્યનને કારણે પડકારોનો સામનો કરવો પડ્યો હતો. આનાથી તેમના વાહનની આયાતને અસર થઈ, કારણ કે આ દેશો આવશ્યક ચીજોની આયાત પર ધ્યાન કેન્દ્રિત કરી રહ્યા હતા. વિવિધ વિદેશી બજારોમાં નાણાકીય સંકટને કારણે નાણાકીય વર્ષ 2023-24માં વાહનની નિકાસમાં 5.5 ટકાનો ઘટાડો થયો હતો. ગત નાણાકીય વર્ષમાં કુલ નિકાસ 45,00,492 એકમ હતી, જ્યારે 2022-23માં તે 47,61,299 એકમ હતી.
ચાલુ નાણાકીય વર્ષના પ્રથમ અર્ધવાર્ષિક ગાળામાં કુલ પેસેન્જર વાહનોની નિકાસ વાર્ષિક ધોરણે 12 ટકા વધીને 3,76,679 એકમો થઈ છે, જ્યારે નાણાકીય વર્ષ 2023-24ના સમાન સમયગાળામાં આ આંકડો 3,36,754 એકમો હતો. દેશની સૌથી મોટી કાર નિર્માતા કંપની મારુતિ સુઝુકી 1,47,063 એકમોની નિકાસ સાથે આ યાદીમાં ટોચ પર છે. કંપનીની નિકાસમાં 12 ટકાનો વધારો થયો છે. એક વર્ષ અગાઉના સમાન સમયગાળામાં કંપનીએ 1,31,546 વાહનોની નિકાસ કરી હતી. હ્યુન્ડાઇ મોટર ઇન્ડિયાએ ચાલુ નાણાકીય વર્ષના પ્રથમ છ મહિનામાં 84,900 વાહનોની નિકાસ કરી હતી જે અગાઉના 2023-24ના એપ્રિલ-સપ્ટેમ્બર સમયગાળામાં 86,105 એકમો હતી. આ એક ટકાનો ઘટાડો છે.
ટુ-વ્હીલરની નિકાસમાં 16%નો વધારો
ચાલુ નાણાકીય વર્ષના એપ્રિલ-સપ્ટેમ્બરના સમયગાળામાં ટુ-વ્હીલર્સની નિકાસ વાર્ષિક ધોરણે 16 ટકા વધીને 19,59,145 યુનિટ થઈ છે, જે એક વર્ષ અગાઉના સમાન સમયગાળામાં 16,85,907 યુનિટ હતી. સમીક્ષા હેઠળના સમયગાળા દરમિયાન, સ્કૂટરની નિકાસ 19 ટકા વધીને 3,14,533 યુનિટ થઈ છે, જ્યારે મોટરસાઈકલની નિકાસ 16 ટકા વધીને 16,41,804 યુનિટ થઈ છે. નાણાકીય વર્ષના પ્રથમ છ મહિનામાં કોમર્શિયલ વાહનોની નિકાસ વાર્ષિક ધોરણે 12 ટકા વધીને 35,731 યુનિટ થઈ છે. જોકે, આ સમયગાળા દરમિયાન થ્રી-વ્હીલર્સની નિકાસ એક ટકા ઘટીને 1,53,199 યુનિટ થઈ છે, જે નાણાકીય વર્ષ 2023-24ના સમાન સમયગાળામાં 1,55,154 યુનિટની હતી.