ATM થી લઇને રેલવે ટિકિટ સુધી..., આજથી દેશમાં લાગૂ થયા આ 5 મોટા ફેરફાર
05/01/2025
Business
આજથી મે મહિનો ચાલુ થઈ ગયો છે અને પહેલા દિવસથી જ દેશમાં અનેક પ્રકારના ફેરફારો (Rule Change from 1 May) લાગૂ થઈ ગયા છે, જેની અસર દરેક ઘર અને દરેક ખિસ્સામાં જોવા મળી શકે છે. હા. 1 મે, 2025થી લાગૂ થયેલા ફેરફારો પર નજર કરીએ તો, એક તરફ, ATMમાંથી પૈસા ઉપાડવા મોંઘા થઈ ગયા છે (ATM Fee Hike) અને રોકડ ઉપાડ માટે વધુ ચાર્જ ચૂકવવા પડશે, તો બીજી તરફ, ભારતીય રેલવે દ્વારા ટિકિટ બુકિંગના નિયમોમાં મોટો ફેરફાર કરવામાં આવ્યો છે. ચાલો આવા 5 મોટા ફેરફારો વિશે વિગતવાર જાણીએ.
ATMમાંથી પૈસા ઉપાડવા મોંઘા થયા
આજે 1 મે 2025થી, જો તમે રોકડ ઉપાડવા માટે ATM મશીનનો ઉપયોગ કરો છો, તો તમારે વધુ ચાર્જ ચૂકવવા પડશે. હકીકતમાં, રિઝર્વ બેન્ક (RBI)એ તાજેતરમાં નેશનલ પેમેન્ટ કોર્પોરેશન ઓફ ઈન્ડિયા (NPCI)ના પ્રસ્તાવ પર ફી વધારવાની મંજૂરી આપી હતી. આવી સ્થિતિમાં, દર મહિનાની પહેલી તારીખથી, જો ગ્રાહકો તેમની હોમ બેન્કના ATMને બદલે અન્ય નેટવર્ક બેન્કના ATMમાંથી પૈસા ઉપાડે છે, તો તેમણે દરેક ટ્રાન્ઝેક્શન માટે 17 રૂપિયાને બદલે 19 રૂપિયાનો ચાર્જ ચૂકવવો પડશે. આ ઉપરાંત, જો તમે કોઈપણ અન્ય બેન્કના ATMમાંથી તમારું બેલેન્સ ચેક કરો છો, તો 6 રૂપિયાને બદલે 7 રૂપિયાનો ચાર્જ લાગશે.
આ ઉપરાંત, ઘણી મોટી બેન્કોએ ફ્રી લિમિટ પછી ટ્રાન્ઝેક્શન પર લાગતા ચાર્જ બાબતે તેમની વેબસાઇટ પર માહિતી આપવાનું શરૂ કર્યું છે. HDFC બેન્કની વેબસાઇટ અનુસાર, ફ્રી ટ્રાન્ઝેક્શન મર્યાદાથી વધુ લેવડ-દેવડ માટે 1 મે 2025 થી 21 રૂપિયા + ટેક્સની ATM ટ્રાન્ઝેક્શન ફી વધારીને 23 રૂપિયા + ટેક્સ કરવામાં આવશે. તો, PNB અને IndusInd બેન્કના ATMમાંથી રોકડ ઉપાડ પર 23 રૂપિયાનો ચાર્જ લાગશે.
રેલવેએ આ નિયમ બદલ્યો
1 મે, 2025થી લાગૂ થનાર બીજો ફેરફાર ભારતીય રેલવે સાથે સંબંધિત છે. વાસ્તવમાં, રેલવે ટિકિટ બુકિંગ નિયમોમાં ફેરફાર કરવામાં આવી રહ્યા છે અને હવે વેઇટિંગ ટિકિટ માત્ર જનરલ કોચમાં જ માન્ય રહેશે. મતલબ કે તમે વેઇટિંગ ટિકિટ સાથે સ્લીપર કોચમાં મુસાફરી નહીં કરી શકો. એડવાન્સ રિઝર્વેશનનો સમયગાળો 120 દિવસથી ઘટાડીને 60 દિવસ કરવામાં આવ્યો છે.
11 રાજ્યોમાં RRB યોજના
મે મહિનાના પહેલા દિવસે વધુ એક ફેરફાર થવાનો છે. હકીકતમાં, 1 મે, 2025થી દેશમાં 'એક રાજ્ય-એક RRB' યોજના દેશના 11 રાજ્યોમાં પ્રસ્તાવિત છે, જે આજથી લાગૂ થઈ શકે છે. આ અંતર્ગત, દરેક રાજ્યમાં તમામ પ્રાદેશિક ગ્રામીણ બેન્કોને જોડીને એક મોટી બેન્કની રચના કરવામાં આવશે. તેનાથી બેન્કિંગ સેવાઓ વધુ સારી બનશે અને ગ્રાહકો પહેલા કરતા વધુ સુવિધાઓનો લાભ લઈ શકશે. આ ફેરફાર ઉત્તર પ્રદેશ, આંધ્રપ્રદેશ, ગુજરાત, મધ્ય પ્રદેશ સહિત અન્ય રાજ્યોમાં લાગુ થઈ શકે છે.
અમૂલે દૂધના ભાવમાં વધારો કર્યો
અમુલે દૂધના ભાવમાં વધારો (Amul Milk Price Hike) જાહેર કર્યો છે. અમૂલ દૂધ ઉત્પાદનોના નવા દર આજથી એટલે કે 1 મે 2025 થી અમલમાં આવ્યા છે. અમૂલના જણાવ્યા અનુસાર, દેશભરમાં દૂધના ભાવમાં પ્રતિ લીટર 2 રૂપિયાનો વધારો કરવાનો નિર્ણય લેવામાં આવ્યો છે. આ અગાઉ મધર ડેરીએ પણ પોતાના દૂધના ભાવમાં વધારો કર્યો હતો.
12 દિવસની બેન્ક રજા
જો મે મહિનામાં તમારી પાસે બેન્ક સંબંધિત કોઈ મહત્ત્વપૂર્ણ કામ હોય, તો RBI દ્વારા જાહેર કરાયેલ બેન્ક રજાઓની યાદી તપાસ્યા બાદ જ ઘરની બહાર નીકળો, નહીં તો તમે શાખામાં પહોંચો ત્યારે તાળું લટકેલું નજરે પડશે. વાસ્તવમાં, મે મહિનાની બેન્ક હોલિડે લિસ્ટ મુજબ, વિવિધ રાજ્યોમાં વિવિધ તહેવારો અને કાર્યક્રમોને કારણે બેન્કો કુલ 12 દિવસ બંધ રહેશે.
દર મહિનાની પહેલી તારીખે જનતાની નજર LPG સિલિન્ડરના ભાવમાં થતા ફેરફાર પર ટકેલી હોય છે, પરંતુ પહેલી મેના રોજ ઓઈલ માર્કેટિંગ કંપનીઓએ 14 કિલોગ્રામના ઘરેલુ ગેસ સિલિન્ડર અને 19 કિલોગ્રામના કોમર્શિયલ ગેસ સિલિન્ડરના ભાવ યથાવત રાખ્યા છે, એટલે કે તેમાં કોઈ ફેરફાર કરવામાં આવ્યો નથી. જોકે, RBI દ્વારા સતત 2 વખત રેપો રેટમાં 0.50 ટકા ઘટાડો કરાયા બાદ, ઘણી બેન્કોએ તેમના FD વ્યાજ દર ઘટાડ્યા હતા અને ઘણી બેન્કો મેની શરૂઆતમાં પણ FD વ્યાજ દર ઘટાડી શકે છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp