Jobs in SEBI: સેબીમાં જોબ કરવી છે? કરાર આધારિત આ નોકરીમાં મહિને 70,000 સ્ટાઈપેન્ડ મળશે! યંગ પ્રોફેશનલ પ્રોગ્રામ હેઠળ ઘણા ઈન્ટર્ન જોડાશે
વિદેશની માફક ભારતમાં પણ હવે કરાર આધારિત નોકરીઓનું મોટું માર્કેટ ખૂલી રહ્યું છે, જેમાં સ્કીલ ધરાવતા તેમજ કશુંક શીખવાની ધગશ ધરાવતા યુવાનોને મોટી સંસ્થાઓમાં નિયત સમયમર્યાદા માટે ઊંચા વળતરવાળી કરાર આધારિત નોકરી પ્રાપ્ત થાય છે. યુવાનો આ નોકરીમાં શ્રેષ્ઠ પ્રદર્શન કરીને રૂપિયા પણ કમાઈ શકે છે, તેમજ અનુભવનું ભાથું બાંધીને ભવિષ્યની કેડી પણ કંડારી શકે છે. હાલમાં આવી જ તક આપતો “યંગ પ્રોફેશનલ (YP) પ્રોગ્રામ” કેપિટલ માર્કેટ્સ રેગ્યુલેટર સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (SEBI)એ શરૂ કર્યો છે. આ કાર્યક્રમમાં સેબી બોર્ડને સુરક્ષા બજાર અને ઈન્ફોર્મેશન ટેક્નોલોજી સંબંધિત બાબતોમાં મદદ કરવા માટે 20 વર્ષની વયના યુવાનોને એકથી ત્રણ વર્ષ માટે નિયુક્ત કરવામાં આવશે.
સેબી કુલ 50 યુવા વ્યાવસાયિકોની નિમણૂક કરશે, જેમને દર મહિને રૂ. 70,000 સ્ટાઈપેન્ડ મળશે. આ યુવાનોને એક વર્ષ માટે રાખવામાં આવશે, ત્યારબાદ યુવાનોને એક-એક વર્ષ માટે બે એક્સટેન્શન આપવામાં આવશે. તમને જણાવી દઈએ કે નિયુક્ત કરાયેલા યુવાનોને સેબીના કર્મચારી કે અધિકારી તરીકે ગણવામાં આવશે નહીં. ઉપરાંત, કાર્યકાળ દરમિયાન મૃત્યુ, માંદગી અથવા ઈજાના કિસ્સામાં, યુવાનોને કોઈ વળતર અથવા રોજગાર મળશે નહીં.
યુવાનોને તેમની કુશળતાના આધારે બિન-ગોપનીય પ્રકૃતિના પ્રોજેક્ટ અથવા કાર્યો સોંપવામાં આવી શકે છે. આ સિવાય, યુવાનો તેમની નિમણૂકના સમયગાળા દરમિયાન અન્ય કોઈ સોંપણી લઈ શકતા નથી.
સેબીના આ યંગ પ્રોફેશનલ પ્રોગ્રામ માટે ફક્ત તે જ યુવાનો અરજી કરી શકે છે, જેમણે સીએફએ ઇન્સ્ટિટ્યૂટ ઇન મેનેજમેન્ટ, ચાર્ટર્ડ એકાઉન્ટન્ટ, કંપની સેક્રેટરી, કોસ્ટ મેનેજમેન્ટ એકાઉન્ટન્ટ અને ચાર્ટર્ડ ફાઇનાન્સિયલ એનાલિસ્ટ્સમાંથી પોસ્ટ ગ્રેજ્યુએશન કર્યું છે. આમાંની કોઈપણ લાયકાત ધરાવનાર કોઈપણ વ્યક્તિ સિક્યોરિટીઝ માર્કેટ ઓપરેશન્સ (SMO) ડોમેનમાં કામ કરવા માટે પાત્ર છે. આ સિવાય, કાર્યકાળ દરમિયાન, યુવાનોને કોઈપણ પ્રકારના સ્ટોક, સિક્યોરિટી અથવા કોમોડિટીઝના વેપાર અથવા સટ્ટામાં સામેલ કરવાની મંજૂરી આપવામાં આવશે નહીં. યુવાનો ઇક્વિટી અને ઇક્વિટી સંબંધિત સાધનોમાં પ્રત્યક્ષ કે પરોક્ષ રીતે રોકાણ કરી શકતા નથી.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp