મહાકુંભમાં ભાગદોડ બાદ અખાડા પરિષદે લીધો મોટો નિર્ણય, હવે આ દિવસે થશે પવિત્ર સ્નાન

Mahakumbh Stampede: પ્રયાગરાજ મહાકુંભમાં થયેલી ભાગદોડને ધ્યાનમાં રાખીને, અખિલ ભારતીય અખાડા પરિષદે આજે મૌની અમાવસ્યા પર પવિત્ર સ્નાન રદ કર્યું છે. અખાડા પરિષદે આ નિર્ણય તમામ 13 અખાડાઓની સંમતિથી લીધો હતો. સાથે જ એવી પણ જાહેરાત કરી છે કે હવે બધા અખાડા વસંત પંચમી પર મહાકુંભમાં સ્નાન કરશે.

અખાડા પરિષદના પ્રમુખ રવિન્દ્ર પુરીએ જણાવ્યું હતું કે આજે મૌની અમાવસ્યાના દિવસે, બધા અખાડાના સંતો અને નાગા સાધુઓ પવિત્ર સ્નાન કરીને સવારે 4:00 વાગ્યે મહાકુંભ માટે રવાના થવાની તૈયારી કરી રહ્યા હતા ત્યારે મહાકુંભમાં ભાગદોડના સમાચાર આવ્યા. મહાકુંભમાં, સૌથી પહેલા સ્નાન કરનારા નાગા સાધુઓ અને મહાનિર્વાણ અખાડાના સંતો હોય છે, જેઓ મહાકુંભ પરિસરમાં પહોંચ્યા હતા, પરંતુ તેમને પણ સંગમમાં જતા અટકાવવામાં આવ્યા છે. સ્નાન 5:00 વાગ્યા અગાઉ શરૂ થવાનું હતું, પરંતુ લોકોની ભીડ અને ભાગદોડની શક્યતાને ધ્યાનમાં રાખીને, આજે પવિત્ર સ્નાન રદ કરવામાં આવ્યું છે.

અખિલ ભારતીય અખાડા પરિષદના પ્રમુખ રવિન્દ્ર પુરીએ કહ્યું કે જે ઘટના બની તેનાથી અમે દુઃખી છીએ. અમારી સાથે હજારો ભક્તો હતા, પરંતુ પરિસ્થિતિઓને ધ્યાનમાં રાખીને, જાહેર હિતમાં અમે નિર્ણય લીધો કે અખાડાઓ આજે પવિત્ર સ્નાનમાં ભાગ લેશે નહીં. હું લોકોને આજના બદલે વસંત પંચમી પર સ્નાન કરવા આવવા અપીલ કરું છું. આ ઘટના એટલા માટે બની કારણ કે શ્રદ્ધાળુઓ સંગમ ઘાટ પહોંચવા માગતા હતા. તેના બદલે તેમણે જ્યાં પણ પવિત્ર ગંગા જુએ ત્યાં ડૂબકી લગાવવી જોઈએ.

#WATCH | #MahaKumbh2025 | Prayagraj, Uttar Pradesh: President of Akhil Bharatiya Akhara Parishad, Ravindra Puri says, "We are saddened by the incident that took place. There were thousands of devotees with us... In the public interest, we decided that the Akharas will not… pic.twitter.com/3HHkYjG11G

— ANI (@ANI) January 29, 2025

આ વહીવટીતંત્રનો વાંક નથી. કરોડો લોકોને સંભાળવા સરળ નથી, આપણે અધિકારીઓને સહકાર આપવો જોઈએ. રાજ્ય પોલીસે મહાકુંભમાં સુરક્ષા અને સ્નાન માટે તમામ વ્યવસ્થા કરી છે, પરંતુ ક્યારેક-ક્યારેક જ્યારે ભારે ભીડ હોય છે ત્યારે સમસ્યાઓ વધી જાય છે. પ્રયાગરાજમાં ગંગા, યમુના અને સરસ્વતીનો સંગમ છે. આ પવિત્ર પ્રસંગે, મહાકુંભમાં પૂર્વ, પશ્ચિમ અને ઉત્તર, દક્ષિણનો સંગમ જોવા મળી રહ્યો છે. મહાકુંભ 144 વર્ષ બાદ યોજાઈ રહ્યો છે, તેથી લોકો આ તક ગુમાવવા માગતા નથી.