આખરે ઉ.પ્રદેશના ‘પોલિટિકલ ડ્રામા’ તરફ BJP હાઈકમાંડની લાલ આંખ! યોગીની મીટિંગમાં નાયબ મુખ્યમંત્રીઓ ગેરહાજર રહેતા આવ્યું રિએક્શન!

Uttar Pradesh CM Yogi Adityanath: લોકસભા ચૂંટણીના પરિણામો બાદ મુખ્યમંત્રી સતત સમીક્ષા બેઠકો કરી રહ્યા છે. વિભાગના તમામ ધારાસભ્યો, સાંસદો અને મંત્રીઓને બોલાવવામાં આવી રહ્યા છે. વારાણસી સિવાય તમામ વિભાગોની બેઠકો યોજવામાં આવી છે.  દરેક મીટિંગ પછી લંચ કે ડિનર હોય છે. યુપીના ડેપ્યુટી સીએમ કેશવ પ્રસાદ મૌર્ય પ્રયાગરાજમાં સમીક્ષા બેઠકમાં હાજર રહ્યા ન હતા. ભાજપના પ્રદેશ અધ્યક્ષ ભૂપેન્દ્ર ચૌધરી મુરાદાબાદ વિભાગની બેઠકથી દૂર રહ્યા હતા. હવે ડેપ્યુટી સીએમ બ્રિજેશ પાઠક પણ લખનૌ ડિવિઝનની સમીક્ષા બેઠકમાં ભાગ લઈ રહ્યા નથી.

14 જુલાઈ, 2024ના રોજ ભાજપ વર્કિંગ કમિટીની બેઠક યોજાઈ હતી, ત્યારબાદ યુપીમાં રાજકીય તાપમાન વધી રહ્યું છે. આ દરમિયાન ઉત્તર પ્રદેશમાં રાજકીય ઘટનાક્રમ પર ભાજપ હાઈકમાન્ડની પ્રતિક્રિયા સામે આવી છે. સૂત્રોના જણાવ્યા અનુસાર, ભારતીય જનતા પાર્ટીએ મુખ્યમંત્રી યોગી આદિત્યનાથની બેઠકમાં ડેપ્યુટી સીએમ બ્રિજેશ પાઠક અને કેશવ પ્રસાદ મૌર્યની ગેરહાજરીને કારણે તેને અનુશાસનહીન ગણાવ્યું છે. સીએમ યોગી આદિત્યનાથે લોકસભા ચૂંટણીમાં હારની સમીક્ષા કરવા માટે યુપીમાં ઘણી જગ્યાએ પાર્ટી નેતાઓ સાથે બેઠકો કરી હતી, જેમાં બંને ડેપ્યુટી સીએમ હાજર રહ્યા ન હતા.

સૂત્રોના જણાવ્યા અનુસાર સીએમ યોગી આદિત્યનાથ હાલમાં નીતિ આયોગની બેઠકમાં હાજર છે. મુખ્યમંત્રી પરિષદની બેઠક ટૂંક સમયમાં ભાજપના મુખ્યાલયમાં યોજાશે. આ બેઠકમાં ભાજપ શાસિત રાજ્યોના મુખ્યમંત્રીઓ હાજરી આપશે, જેમાં વડાપ્રધાન નરેન્દ્ર મોદી, ભાજપ અધ્યક્ષ જેપી નડ્ડા હાજર રહેશે. આ બેઠક શનિવાર અને રવિવાર એમ બે દિવસ ચાલશે.

આ બેઠક માટે યુપીના ડેપ્યુટી સીએમ કેશવ પ્રસાદ મૌર્ય અને બ્રજેશ પાઠક સહિત બીજેપીના ઘણા નેતાઓ પાર્ટી ઓફિસ પહોંચ્યા છે. બીજેપીના રાષ્ટ્રીય અધ્યક્ષ જેપી નડ્ડા, રક્ષા મંત્રી રાજનાથ સિંહ, મહારાષ્ટ્રના નાયબ મુખ્યમંત્રી દેવેન્દ્ર ફડણવીસ, રાજસ્થાનના નાયબ મુખ્યમંત્રી દિયા કુમારી, ગુજરાતના સીએમ ભૂપેન્દ્ર પટેલ, હરિયાણાના સીએમ નાયબ સિંહ સૈની બીજેપી ઓફિસ પહોંચ્યા છે.

યુપીના મુખ્યમંત્રી યોગી આદિત્યનાથે આ પહેલા પ્રયાગરાજ ડિવિઝનમાં એક બેઠક યોજી હતી, જેમાં ડેપ્યુટી સીએમ કેશવ પ્રસાદ મૌર્ય હાજર રહ્યા ન હતા. આ પછી ભાજપના પ્રદેશ અધ્યક્ષ ભૂપેન્દ્ર ચૌધરીએ મુરાદાબાદમાં યોજાયેલી બેઠકમાં હાજરી આપી ન હતી. આ પછી, સીએમ યોગીએ શુક્રવારે (26 જુલાઈ 2024) લખનૌ ડિવિઝનમાં એક બેઠક યોજી હતી, જેમાં ડેપ્યુટી સીએમ બ્રજેશ પાઠક હાજર રહ્યા ન હતા.