મહાકુંભમાં ફરી દુર્ઘટના, આગ લાગતા અનેક તંબુ બળીને થયા રાખ, જુઓ વીડિયો

Massive Fire Breaks Out In Mahakumbh: ઉત્તર પ્રદેશના પ્રયાગરાજમાં મહાકુંભ મેળા 2025માં ગુરુવારે ફરી એકવાર ભીષણ આગ લાગી હતી. આગની ઘટના નાગેશ્વર ઘાટ અને છટનાગ ઘાટ પાસે ટેન્ટસિટીના સેક્ટર-22માં બની હતી. ઝૂન્સી તરફ એક ખાનગી કંપની દ્વારા સ્થાપિત વૈદિક ટેન્ટ સિટીમાં અચાનક લાગેલી આગ ઝડપથી ફેલાઈ ગઈ, જેને કારણે થોડીવારમાં 10 કરતા વધુ ટેન્ટ બળીને રાખ થઈ ગયા હતા. કહેવામાં આવી રહ્યું છે કે આગને કારણે હોબાળો થતા જ બધા લોકો તંબુની અંદરથી બહાર આવી ગયા, જેને કારણે કોઈને જાનહાનિ કે ઈજા થઈ નથી.

View this post on Instagram

A post shared by SidhiKhabar (@sidhikhabar)

જોકે, હજુ સુધી કોઈ અધિકારી તરફથી કોઈ સત્તાવાર નિવેદન આવ્યું નથી. હાલમાં ફાયર બ્રિગેડના વાહનો આગ પર કાબૂ મેળવવા અને બચાવ કામગીરીમાં રોકાયેલા છે. આગ લાગવાનું કારણ હજુ અકબંધ છે. તો, વરિષ્ઠ અધિકારીઓ પણ ઘટનાસ્થળે પહોંચી ગયા છે. આ અગાઉ બુધવારે મૌની અમાવસ્યાના અવસરે મહા કુંભ મેળામાં ભાગદોડ મચી હતી, જેમાં વહીવટીતંત્રએ 30 લોકોના મોતની પુષ્ટિ કરી છે.

આ અગાઉ 19 જાન્યુઆરીએ મહાકુંભ મેળા વિસ્તારમાં પણ મોટી આગ દુર્ઘટના બની હતી. સાંજે લગભગ 4:30 વાગ્યે, શાસ્ત્રી બ્રિજ પાસે સેક્ટર-19 માં ગીતા પ્રેસ કેમ્પમાં આગ લાગી હતી. આ અકસ્માતમાં 180 કોટેજ બળી ગયા હતા. મહાકુંભ વહીવટીતંત્રના જણાવ્યા અનુસાર, ગીતા પ્રેસના રસોડામાં નાના ગેસ સિલિન્ડરમાંથી ચા બનાવતી વખતે ગેસ લીકેજને કારણે આગ લાગી હતી. આગને કારણે રસોડામાં રાખેલા 2 ગેસ સિલિન્ડર પણ બ્લાસ્ટ થયા હતા, જોકે આ ઘટનામાં કોઈ જાનહાનિ થઈ નહોતી.

તેવી જ રીતે, થોડા દિવસ અગાઉ સેક્ટર-5 ના ખાકચોકમાં સ્થિત મહામંડલેશ્વર પુરુષોત્તમ દાસના કેમ્પમાં આગ લાગી હતી. ફાયર બ્રિગેડની ટીમે ટૂંક સમયમાં આગ પર કાબૂ મેળવી લીધો હતો. ગયા શનિવારે, મહા કુંભમેળા વિસ્તારના પાર્કિંગમાં પાર્ક કરેલા 2 વાહનોમાં પણ આગ લાગી હતી. જોકે, ટૂંક સમયમાં જ આગ પર કાબૂ મેળવી લેવામાં આવ્યો હતો. પરંતુ ત્યાં સુધીમાં બંને વાહનો બળીને રાખ થઈ ગયા હતા.