‘તાત્કાલિક અશ્લીલ સામગ્રી દૂર કરો, 72 કલાકની અંદર રિપોર્ટ મોકલો’, કેન્દ્ર સરકારે આ પ્લેટફોર્મને કડક નોટિસ ફટકારી
ઇલેક્ટ્રોનિક્સ અને ઇન્ફર્મેશન ટેકનોલોજી મંત્રાલય (MeitY)એ X Corp (અગાઉ ટ્વિટર)ને ઇન્ફર્મેશન ટેકનોલોજી એક્ટ, 2000 અને ઇન્ફર્મેશન ટેકનોલોજી નિયમ 2021 હેઠળ વૈધાનિક ઉચિત સાવધાની જવાબદારીઓનું પાલન ન કરવા બદલ કડક નોટિસ ફટકારી છે. સરકારે X Corpને 72 કલાકની અંદર એક એક્શન ટેકન રિપોર્ટ (ATR) સબમિટ કરવાનો આદેશ આપ્યો છે, જેમાં ભારતીય સિવિલ સર્વિસ કોડ (BNSS), 2023 હેઠળ લેવામાં આવેલા પગલાં, મુખ્ય પાલન અધિકારીની ભૂમિકા અને ફરજિયાત રિપોર્ટિંગ આવશ્યકતાઓનું પાલનનો ઉલ્લેખ કરવામાં આવ્યો છે.
IT મંત્રાલયે સોશિયલ મીડિયા પ્લેટફોર્મ Xને પત્ર લખીને Grok AIના દુરુપયોગ સામે પગલાં લેવા જણાવ્યું છે. જે વપરાશકર્તાઓએ Grok AIનો ઉપયોગ કરીને જાતીય રીતે સ્પષ્ટ અથવા અભદ્ર છબીઓ અને સામગ્રી પોસ્ટ કરી છે તેઓએ 72 કલાકની અંદર આવી બધી સામગ્રી દૂર કરવી પડશે. સાથે જ તેને લઈને કરવામાં આવેલી કાર્યવાહીની જાણ કરવી પડશે. જો X પગલાં લેવામાં નિષ્ફળ જાય, તો તેમની સામે કડક કાર્યવાહી કરવામાં આવશે.
મંત્રાલયે એવા અહેવાલો પર ગંભીર ચિંતા વ્યક્ત કરી છે કે Xની AI સેવા ‘Grok’નો દુરુપયોગ મહિલાઓને લક્ષ્ય બનાવતી અશ્લીલ, અભદ્ર અને લૈંગિક રીતે સ્પષ્ટ સામગ્રી બનાવવા અને શેર કરવા માટે થઈ રહ્યો છે. તેને લઈને શિવસેના (UBT)ના રાજ્યસભાના સાંસદે પ્રશ્ન ઉઠાવ્યો હઆતો. ત્યારબાદ કેન્દ્ર સરકારે Xને લખેલા પત્રમાં ભાર મૂકવામાં આવ્યો છે કે વપરાશકર્તાઓએ Grokની AI ક્ષમતાઓનો દુરુપયોગ કરીને અપમાનજનક રીતે અશ્લીલ કૃત્રિમ છબીઓ અને વીડિયો બનાવ્યા છે, જે ગોપનીયતા અને ગરિમાનું ઉલ્લંઘન છે. MeitYએ ચેતવણી આપી હતી કે આવા કૃત્યો જાતીય સતામણીને સામાન્ય બનાવે છે અને કાનૂની સુરક્ષાને નબળી પાડે છે.
વર્ષ 2025ના છેલ્લા અઠવાડિયામાં જ, ઇલેક્ટ્રોનિક્સ અને માહિતી ટેકનોલોજી મંત્રાલય (MeitY)એ એક નવી એડવાઈઝરી જાહેર કરી હતી, જેમાં સોશિયલ મીડિયા પ્લેટફોર્મ્સને અશ્લીલ, પુખ્ત અથવા ગેરકાયદેસર સામગ્રીને દૂર કરવાની તેમની જવાબદારીઓનું 'વધુ કડકાઈથી પાલન' કરવાનો નિર્દેશ આપવામાં આવ્યો હતો અને કહેવામાં આવ્યું હતું કે જો તેઓ આમ નહીં કરે, તો સોશિયલ મીડિયા પ્લેટફોર્મને કડક કાર્યવાહીનો સામનો કરવો પડી શકે છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp