IPL વચ્ચે BCCIએ કરી મોટી કાર્યવાહી, કોચ સહિત 3 લોકોને ઘર ભેગા કર્યા; જાણો કારણ
આ વર્ષે બોર્ડર ગાવસ્કર ટ્રોફી (BGT)માં 1-3થી મળેલી હાર અને શ્રેણી દરમિયાન ડ્રેસિંગ રૂમની વાતચીત લીક થયા બાદ ભારતીય ક્રિકેટ કંટ્રોલ બોર્ડ (BCCI)એ મોટી કાર્યવાહી કરી છે. બોર્ડે BCCIના સહાયક કોચ અભિષેક નાયરને હટાવી દીધા છે, જોકે તેમનો કાર્યકાળ માત્ર 8 મહિના અગાઉ જ શરૂ થયો હતો. BGT શ્રેણી હાર્યા બાદ, BCCIએ એક સમીક્ષા બેઠક યોજી હતી, જેમાં ટીમ મેનેજમેન્ટના એક સભ્યએ ફરિયાદ કરી હતી કે ડ્રેસિંગ રૂમના સમાચાર બહાર જઇ રહ્યા છે.
દૈનિક જાગરણમાં પ્રકાશિત થયેલા સમાચાર અનુસાર, સહાયક કોચ અભિષેક નાયર ઉપરાંત, ભારતીય ટીમના ફિલ્ડિંગ કોચ ટી. દિલીપ અને ટ્રેનર સોહમ દેસાઈની પણ છુટ્ટી કરી દેવામાં આવી છે. અહેવાલમાં સૂત્રોના સંદર્ભે કહેવામાં આવ્યું છે કે, નાયરના સ્થાને કોઈની નિમણૂક કરવામાં નહીં આવે કારણ કે સિતાંશુ કોટક પહેલાથી જ ભારતીય ટીમ સાથે બેટિંગ કોચ તરીકે જોડાયેલા છે. તો દિલીપનું કામ સહાયક કોચ રેયાન ટેન ડેસ્કાટે જોશે.
ટ્રેનર સોહમ દેસાઈના સ્થાને એડ્રિયન લી રૂ લેશે, જે હાલમાં IPLમાં પંજાબ કિંગ્સ (PBKS) સાથે સંકળાયેલા છે. તેઓ વર્ષ 2008 થી વર્ષ 2019 સુધી KKR ટીમ સાથે પણ રહ્યા, તેમણે વર્ષ 2002 થી વર્ષ 2003 સુધી ભારતીય ટીમ સાથે પણ કામ કર્યું હતું. તેમનો BCCI સાથે કોન્ટ્રાક્ટ થઇ ગયો છે.
ભારતીય ટીમ બોર્ડર ગાવસ્કર ટ્રોફી 1-3થી હારી ગઈ હતી, આ શ્રેણીમાં અશ્વિને અચાનક નિવૃત્તિ લીધી હતી. રોહિત શર્માએ સિડની ટેસ્ટમાંથી પોતાને બહાર કરી દીધો હતો, ત્યારબાદ એવી અટકળો શરૂ થઈ ગઈ હતી કે ટીમમાં બધુ બરાબર નથી. ભારતીય ડ્રેસિંગ રૂમમાંથી પણ સમાચાર આવ્યા, જેનાથી મામલો વધુ ગરમાયો. એક સભ્યએ આ અંગે BCCIને ફરિયાદ પણ કરી હતી. આ અગાઉ ભારતીય ટીમે ઘરઆંગણે ન્યૂઝીલેન્ડ સામે શરમજનક પ્રદર્શન કર્યું હતું. ન્યૂઝીલેન્ડે ટેસ્ટ શ્રેણીમાં ભારતીય ટીમને 3-0થી હરાવી હતી.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp