ઈરાની હવાઈ હુમલા બાદ ઈઝરાયેલે ગાઝા પર મોટો હુમલો કર્યો, બાળકો અને મહિલાઓ સહિત 51 લોકો માર્યા ગયા

ગાઝામાં આરોગ્ય મંત્રાલયે જણાવ્યું કે ખાન યુનિસમાં બુધવારે સવારે શરૂ થયેલા ઓપરેશનમાં ઓછામાં ઓછા 51 લોકો માર્યા ગયા અને 82 ઘાયલ થયા. 'યુરોપિયન હોસ્પિટલ'ના રેકોર્ડ દર્શાવે છે કે મૃતકોમાં સાત મહિલાઓ અને 12 બાળકોનો સમાવેશ થાય છે. સ્થાનિક હોસ્પિટલોના જણાવ્યા અનુસાર ગાઝામાં અલગ-અલગ હુમલાઓમાં બે બાળકો સહિત 23 અન્ય લોકો માર્યા ગયા હતા. ઇઝરાયેલે આજે ફરી દક્ષિણ ગાઝામાં જોરદાર હુમલો કર્યો છે. ઈઝરાયેલની સેનાએ આ હુમલો તેલ અવીવ પર ઈરાનના હવાઈ હુમલા બાદ કર્યો હતો. ઇઝરાયેલી સેના દ્વારા ગાઝા પર રાતોરાત હુમલામાં ઓછામાં ઓછા 51 લોકો માર્યા ગયા છે. પેલેસ્ટાઈનના તબીબી અધિકારીઓના જણાવ્યા અનુસાર મૃતકોમાં મહિલાઓ અને બાળકો પણ સામેલ છે. તમને જણાવી દઈએ કે 7 ઓક્ટોબરના રોજ હમાસ દ્વારા કરવામાં આવેલા હુમલા બાદ પેલેસ્ટિનિયન પ્રદેશમાં યુદ્ધ શરૂ થયાના લગભગ એક વર્ષ બાદ પણ ઈઝરાયેલ ગાઝામાં સ્થિત આતંકવાદી ટાર્ગેટ પર હુમલા કરવાનું ચાલુ રાખે છે. જ્યારે તેનું ધ્યાન લેબનોન અને ઈરાન તરફ પણ છે.

આ ક્ષેત્રમાં સૌથી શક્તિશાળી સશસ્ત્ર જૂથ ગણાતા હિઝબોલ્લાહે જણાવ્યું હતું કે તેના લડવૈયાઓ સરહદ નજીક લેબનોનની અંદર બે સ્થળોએ ઇઝરાયેલી સૈનિકો સાથે ભારે અથડામણ કરી હતી. ઇઝરાયેલી સૈન્યએ જણાવ્યું હતું કે હવાઈ હુમલાઓ દ્વારા સમર્થિત ભૂમિ સૈનિકોએ એન્કાઉન્ટરમાં ઘણા આતંકવાદીઓને માર્યા હતા, પરંતુ આ ઘટના ક્યાં બની હતી તે જણાવ્યું નથી. સેનાએ તાજેતરના ઓપરેશનની શરૂઆત પછી પ્રથમ લડાઇ મૃત્યુની પણ જાણ કરી હતી. કહ્યું કે લેબનોનમાં કમાન્ડો બ્રિગેડનો 22 વર્ષીય કેપ્ટન યુદ્ધમાં માર્યો ગયો. ઈઝરાયેલની સેનાએ લગભગ 50 ગામો અને નગરોના લોકોને તેમના ઘર ખાલી કરવાની ચેતવણી આપી છે. સંઘર્ષ તીવ્ર થતાં લાખો લોકો પહેલેથી જ તેમના ઘર છોડીને ભાગી ગયા છે.

ઈરાનના હવાઈ હુમલા બાદ ઈઝરાયેલે આજે સંયુક્ત રાષ્ટ્રને નિશાન બનાવ્યું છે. ઇઝરાયેલે યુએન સેક્રેટરી-જનરલ એન્ટોનિયો ગુટેરેસને પર્સોના નોન ગ્રેટા જાહેર કર્યા, એટલે કે તેમના દેશમાં પ્રવેશ પર પ્રતિબંધ મૂક્યો. વિદેશ મંત્રી ઈઝરાયેલ કાત્ઝે તેમના પર ઈરાની હુમલાની નિંદા ન કરવાનો આરોપ લગાવ્યો. ગુટેરેસે બોમ્બ વિસ્ફોટ પછી એક સંક્ષિપ્ત નિવેદન જારી કરીને કહ્યું, "હું મધ્ય પૂર્વ સંઘર્ષના વિસ્તરણની નિંદા કરું છું, જે સતત વધી રહ્યો છે. આને રોકવું પડશે. ચોક્કસપણે યુદ્ધવિરામની જરૂર છે. આ પગલાથી ઇઝરાયેલ અને સંયુક્ત રાષ્ટ્ર વચ્ચે પહેલાથી જ અસ્તિત્વમાં રહેલી અણબનાવ વધુ ઊંડી બની છે.