શ્રીલંકાએ અદાણીને આપ્યો ઝટકો, આ મોટા પ્રોજેક્ટમાં અવરોધ; સરકારે શું કહ્યું?
ભારતના મોટા ઉદ્યોગપતિ ગૌતમ અદાણીને પાડોશી દેશ શ્રીલંકા તરફથી મોટો ઝટકો લાગ્યો છે. વાસ્તવમાં, અદાણી ગ્રુપનો 44 કરોડ અમેરિકન ડોલરનો પવન ઊર્જા પ્રોજેક્ટ શ્રીલંકામાં જોખમનો સામનો કરી રહ્યો છે. શ્રીલંકાની સરકાર આ પ્રોજેક્ટની મંજૂરી પર પુનર્વિચાર કરી રહી છે. 7 ઓક્ટોબરે શ્રીલંકાના કેબિનેટમાં લેવાયેલા આ નિર્ણયથી વિદેશી ધરતી પર કંપનીના વિસ્તરણના અદાણીના પ્રયાસોમાં અવરોધ આવી શકે છે. અહેવાલ અનુસાર, અનુરા કુમારા દિસાનાયકેની આગેવાની હેઠળની શ્રીલંકાની નવી સરકાર વીજળીના ટેરિફ અને ઉર્જા સાર્વભૌમત્વને લગતી સંભવિત ચિંતાઓના કારણે પ્રોજેક્ટની સમીક્ષા કરી રહી છે.
સોમવારે શ્રીલંકાના એટર્ની જનરલની ઓફિસે સુપ્રીમ કોર્ટને કહ્યું કે નવી સરકાર ગત સરકાર દ્વારા આપવામાં આવેલી મંજૂરી પર પુનર્વિચાર કરશે. શ્રીલંકાના વિદેશ મંત્રી વિજિતા હેરાથના જણાવ્યા અનુસાર, અદાણી ગ્રીન એનર્જી લિમિટેડ દ્વારા સંચાલિત પ્રોજેક્ટને તેની કિંમતના માળખા અંગે સમસ્યાઓનો સામનો કરવો પડ્યો હતો. કેબિનેટની બેઠક બાદ પત્રકારો સાથે વાત કરતા હેરાથે આ પ્રોજેક્ટ માટે મંજૂર પાવર ટેરિફ અંગે ઉભી થયેલી ચિંતાઓ અંગે ટિપ્પણી કરતા કહ્યું હતું કે સરકાર 14 નવેમ્બરે યોજાનારી સંસદીય ચૂંટણીઓ બાદ તેના પર નવેસરથી વિચાર કરશે.
એટર્ની જનરલ તરફથી, કોર્ટની પાંચ સભ્યોની બેંચને કહેવામાં આવ્યું હતું કે પ્રોજેક્ટની સમીક્ષા કરવાનો નિર્ણય 7 ઓક્ટોબરે યોજાયેલી કેબિનેટ બેઠકમાં લેવામાં આવ્યો હતો. કોર્ટને કહેવામાં આવ્યું હતું કે નવી સરકારનો અંતિમ નિર્ણય 14 નવેમ્બરે સંસદીય ચૂંટણી બાદ નવી કેબિનેટની રચના પછી જાહેર કરવામાં આવશે. રાષ્ટ્રપતિ દિસાનાયકેએ 21 સપ્ટેમ્બરની રાષ્ટ્રપતિની ચૂંટણી અગાઉ વાયદો કર્યો હતો કે તેમનું નેશનલ પીપલ્સ પાવર (NPP) ગઠબંધન આ પ્રોજેક્ટને રદ કરશે. NPPએ દાવો કર્યો હતો કે આ પ્રોજેક્ટ શ્રીલંકાના ઉર્જા ક્ષેત્રના સાર્વભૌમત્વ માટે જોખમ છે.
અદાણી ગ્રુપ મન્નાર અને પૂનેરીના ઉત્તર-પૂર્વીય પ્રદેશોમાં 484 મેગાવોટ પવન ઊર્જા વિકસાવવા માટે 20 વર્ષના કરાર સાથે 44 કરોડ અમેરિકન ડલરથી વધુનું રોકાણ કરવાનું હતું. આ પ્રોજેક્ટ શ્રીલંકાની સુપ્રીમ કોર્ટમાં મૂળભૂત અધિકારોના કેસનો સામનો કરી રહ્યો છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp