Wrestlers Protest: પહેલવાનો અને પોલીસ વચ્ચે ‘દંગલ’! બબીતા ફોગટના ભાઈને માથામાં ઇજા! પહેલવાનોએ આપી પ્રતિક્રિયા (જુઓ વિડીયોઝ)
Wrestlers Protest: લાંબા સમયથી મહિલા પહેલવાનોના જાતીય શોષણ મુદ્દે લડત આપી રહેલા પહેલવાનો અને દિલ્હી પોલીસ વચ્ચે ગઈકાલે રાત્રે ઘર્ષણની ઘટના બની છે. પોલીસ અને પહેલવાનો વચ્ચેના આ ‘દંગલ’માં ફોગટ સિસ્ટર્સના ભાઈ દુષ્યંત ફોગટને માથામાં ઇજા પહોંચી છે. આ ઘટના પછી હવે સરકાર અને મંત્રાલય વચ્ચેનો સંઘર્ષ એક અલગ જ કક્ષાએ પહોંચી ગયો છે.
સરકારે આ મામલો સમયસર ઉકેલવામાં રસ દાખવ્યો હોત તો ઘણા અવાંછિત બનાવો બનતા અટક્યા હોત. પણ સરકાર અકળ કારણોસર આ મામલો સુલઝાવવાને બદલે ઉલઝાવી રહી હોય એમ લાગે છે. પરિણામે રોજે રોજ ઘર્ષણ અને મનદુઃખના નવા બનાવો સામે આવી રહ્યા છે. જંતર-મંતર પર વિરોધ કરી રહેલા કુસ્તીબાજો અને દિલ્હી પોલીસ વચ્ચે મોડી રાત્રે ઘર્ષણ થયું હતું. જેમાં બબીતા ફોગટ, ગીતા ફોગટના નાના ભાઈ દુષ્યંત ફોગટના માથામાં ઈજાના સમાચાર આવી રહ્યા છે. ગીતા ફોગાટે ટ્વીટ કર્યું કે તેના નાના ભાઈનું માથું ફૂટી ગયું છે. ગીતાએ પોલીસના આ પગલાને ખૂબ જ શરમજનક ગણાવ્યું છે.
સાક્ષી મલિક, બજરંગ પુનિયા, વિનેશ ફોગટ સહિત ઘણા સ્ટાર રેસલર જંતર-મંતર પર રેસલિંગ ફેડરેશન ઓફ ઈન્ડિયાના પ્રમુખ બ્રિજ ભૂષણ સિંહની ધરપકડની માંગને લઈને છેલ્લા ઘણા દિવસોથી ધરણા પર બેઠા છે. પરંતુ સરકાર એમને મચક નથી આપી રહી. એમાં ગઈ મોડી રાત્રે ઊંઘવાના બેડ બાબતે તેની પોલીસ સાથે ઝઘડો થયો હતો. જેમાં વાત વધી પડતા પોલીસ અને પહેલવાનો વચ્ચે ઘર્ષણ સર્જાયું હતું.
મામલો ફોલ્ડિંગ બેડથી શરૂ થયો. વરસાદના કારણે જ્યાં કુસ્તીબાજો વિરોધ કરી રહ્યા હતા તે જગ્યાએ પાણી ભરાઈ ગયા હતા. આવી સ્થિતિમાં ફોલ્ડિંગ બેડ લાવવામાં આવ્યો. કુસ્તીબાજોને પથારી લેવાની મંજૂરી નહોતી, તેમ છતાં જ્યારે કુસ્તીબાજો બેડ લેવા જઈ રહ્યા હતા ત્યારે પોલીસે તેમને રોક્યા, જેના પર સાક્ષી, બજરંગ સહિત ઘણા સ્ટાર્સ પોલીસ સાથે દલીલ કરવા લાગ્યા. આ દરમિયાન મારામારી પણ થઈ હતી.
મીડિયા અહેવાલો અનુસાર, મોટી સંખ્યામાં પહોંચેલા પોલીસકર્મીઓ (પ્રોટેસ્ટિંગ રેસલર્સ અને દિલ્હી પોલીસ વચ્ચેની અથડામણ)એ કુસ્તીબાજો અને તેમના સમર્થકોને દૂર કરવાનો પ્રયાસ કર્યો જેઓ ત્યાં સૂવાની તૈયારી કરી રહ્યા હતા. આ વાત પર કુસ્તીબાજો ગુસ્સે થઈ ગયા અને પોલીસ સાથે ઝપાઝપી થઈ ગયા. કુસ્તીબાજોનો આરોપ છે કે પોલીસકર્મીઓએ મહિલા કુસ્તીબાજો સાથે દુર્વ્યવહાર કર્યો હતો અને પુરૂષ કુસ્તીબાજો સાથે મારપીટ કરી હતી. જોકે, સોશિયલ મીડિયા પર વાયરલ થઈ રહેલા વીડિયોમાં આ વાતની કોઈ પુષ્ટિ થઈ નથી.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp