કોણ છે અવિવા બેગ? જેની સાથે પ્રિયંકા ગાંધીના પુત્ર રેહાન વાડ્રાએ કરી સગાઈ

કોંગ્રેસ નેતા પ્રિયંકા ગાંધી વાડ્રાના પુત્ર રેહાન વાડ્રા અને અવિવા બેગની સગાઈના સમાચારે ભારે હલચલ મચાવી દીધી છે. અહેવાલો અનુસાર, રેહાન અને અવિવા, જેઓ અગાઉ મિત્રો હતા, હવે તેઓ એકબીજાના જીવનસાથી બનવા જઇ રહ્યા છે. સૂત્રોના સંદર્ભે કહેવામાં આવ્યું છે કે તેઓ છેલ્લા 7 વર્ષથી રિલેશનશિપમાં હતા. રેહાને તાજેતરમાં અવિવાને પ્રપોઝ કરી હતી. ત્યારબાદ બંને પરિવારોએ તેમના સંબંધને મંજૂરી આપી હતી. ત્યારબાદ આ દંપતીએ એક ખાનગી સમારંભમાં સગાઈ કરી હતી, જેમાં ફક્ત નજીકના મિત્રો જ હાજર રહ્યા હતા. જોકે, લગ્નની તારીખ અંગે હજુ સુધી કોઈ માહિતી જાહેર કરવામાં આવી નથી.

અવિવાએ દિલ્હીની પ્રતિષ્ઠિત મોર્ડન સ્કૂલમાંથી પ્રાથમિક શિક્ષણ પૂર્ણ કર્યું. ત્યારબાદ તેણે ઓ.પી. જિંદલ ગ્લોબલ યુનિવર્સિટીમાંથી મીડિયા કોમ્યુનિકેશન અને જર્નાલિઝમમાં ડિગ્રી મેળવી. તેના ઇન્સ્ટાગ્રામ બાયો અનુસાર, અવિવા ફોટોગ્રાફર અને નિર્માતા પણ છે. તે રાષ્ટ્રીય સ્તરની ફૂટબોલ ખેલાડી પણ રહી ચૂકી છે. અવિવા બેગ લાઈમલાઈટથી દૂર રહે છે. તેનો પરિવાર દિલ્હીમાં રહે છે. બંને પરિવારો નજીકના મિત્રો હોવાનું કહેવાય છે.

અવિવા એટેલિયર-11 નામના ફોટો સ્ટુડિયો અને પ્રોડક્શન કંપનીની સહ-સ્થાપક છે, જે ભારતભરમાં એજન્સીઓ, બ્રાન્ડ્સ અને ક્લાયન્ટ્સ સાથે કામ કરે છે. અવિવાએ મીડિયા અને કોમ્યુનિકેશનમાં વિવિધ ભૂમિકાઓ ભજવી છે. તે PlusRymnમાં ફ્રીલાન્સ પ્રોડ્યુસર છે, PROPAGANDAમાં જુનિયર પ્રોજેક્ટ મેનેજર તરીકે પણ કામ કર્યું છે, આર્ટ ચેઇન ઇન્ડિયામાં માર્કેટિંગ ઇન્ટર્ન તરીકે કામ કર્યું છે, અને વર્વ મેગેઝિન ઇન્ડિયા અને ક્રિએટિવ ઇમેજ મેગેઝિનમાં ઇન્ટર્નશીપ પણ પૂર્ણ કરી છે.

અવિવાના પિતા, ઇમરાન બેગ, એક ઉદ્યોગપતિ છે. તેમના લગ્ન જાણીતા ઇન્ટિરિયર ડિઝાઇનર નંદિતા બેગ સાથે થયા છે. ઘણા મીડિયા અહેવાલો અનુસાર, તે પ્રિયંકા ગાંધીની નજીકની અને લાંબા સમયથી મિત્ર છે.

રેહાન વાડ્રાએ દેહરાદૂનમાં 'ધ દૂન સ્કૂલ'માં અભ્યાસ કર્યો હતો, તે જ સ્કૂલ જ્યાં રાજીવ ગાંધી અને રાહુલ ગાંધીએ પણ અભ્યાસ કર્યો હતો. ત્યારબાદ તેણે લંડનમાં સ્કૂલ ઓફ ઓરિએન્ટલ એન્ડ આફ્રિકન સ્ટડીઝમાં રાજનીતિમાં ઉચ્ચ શિક્ષણ મેળવ્યું. રેહાન એક વિઝ્યુઅલ આર્ટિસ્ટ છે. તે દસ વર્ષની ઉંમરથી જ તેના કેમેરા લેન્સ દ્વારા દુનિયાને કેદ કરી રહ્યો છે. તેમના પોર્ટફોલિયોમાં વન્યજીવન, શેરી અને વ્યાપારી ફોટોગ્રાફીનો સમાવેશ થાય છે.

2021માં જુનિયર વાડ્રાએ નવી દિલ્હીના બિકાનેર હાઉસ ખાતે તેમનું પહેલું સોલો એક્ઝિબિશન 'ડાર્ક પર્સેપ્શન' યોજ્યું હતું. રેહાનની માતા, પ્રિયંકા ગાંધી વાડ્રાને પણ ફોટોગ્રાફીનો શોખ છે, જેના કારણે રેહાન માટે ફોટોગ્રાફી બાળપણનું ઝનૂન રહ્યું છે. રેહાનના નાના, ભૂતપૂર્વ વડાપ્રધાન રાજીવ ગાંધીને પણ ફોટોગ્રાફીનો ખૂબ શોખ હતો.