રોહિત હોય કે કોહલી, સીરિઝ વચ્ચે જાહેરાત કરવા પર પ્રતિબંધ, જાણો BCCIના નવા 10 નિયમો શું છે

BCCI Issues Guidelines For Indian Cricket Team: ભારતીય ટીમને ઓસ્ટ્રેલિયા પ્રવાસ પર 5 મેચની ટેસ્ટ સીરિઝમાં 3-1થી હારનો સામનો કરવો પડ્યો હતો, ત્યારબાદ ઘણા ખેલાડીઓના ફોર્મ અને તેમના અનુશાસનને લઈને સતત સમાચારો સામે આવી રહ્યા હતા. આ પ્રવાસ પર ટીમના ખરાબ પ્રદર્શનની સમીક્ષા કર્યા બાદ, BCCIએ હવે કડક નિર્ણય લીધો છે અને 10 નવા નિયમો લાગૂ કર્યા છે. જેમાં તમામ ખેલાડીઓ માટે ડૉમેસ્ટિક ક્રિકેટ રમવાનું ફરજિયાત કરવામાં આવ્યું છે, પરંતુ કોઈ પણ ખેલાડી વિદેશ પ્રવાસ પર પોતાના અંગત સ્ટાફને સાથે લઈ જઈ શકશે નહીં. BCCIએ આ નવા નિયમોને લઈને એ પણ સ્પષ્ટ કર્યું છે કે જો કોઈ ખેલાડી આ સૂચનાઓનું પાલન નહીં કરે તો તેને અનુશાસનાત્મક કાર્યવાહીનો સામનો કરવો પડશે. આમાં તેમની સેન્ટ્રલ કોન્ટ્રાક્ટ ફીમાં ઘટાડાથી લઈને IPLમાં રમવા પર પ્રતિબંધ સુધીનો સમાવેશ થાય છે.

1. ભારતીય ટીમના વિદેશ પ્રવાસ દરમિયાન ખેલાડીઓના પરિવાર કે પત્નીને માત્ર 2 અઠવાડિયા માટે જ ટીમ સાથે રહેવાની મંજૂરી આપવામાં આવશે. આ સિવાય પર્સનલ સ્ટાફને સાથે લઈ જવા માટે કોઈ છૂટ આપવામાં નહીં આવે. આ નિયમો ખેલાડીઓ તેમજ કોચ અને સપોર્ટ સ્ટાફ સાથે સંકળાયેલા દરેકને લાગૂ પડશે. આ સિવાય પ્રવાસ દરમિયાન કોઈપણ ખેલાડીને તેના પરિવાર સાથે અલગથી મુસાફરી કરવાની મંજૂરી આપવામાં આવશે નહીં. પ્રેક્ટિસ સેશનની સાથે તે મેચના દિવસે હોટલથી સ્ટેડિયમ સુધી ટીમ સાથે જશે. જો કોઈ ખેલાડી આમાંથી મુક્તિ માગે છે તો તેણે પસંદગી સમિતિના અધ્યક્ષ અને મુખ્ય કોચની મંજૂરી લેવી પડશે.
2. BCCIની નવી માર્ગદર્શિકા અનુસાર, ખેલાડીઓ માટે રાષ્ટ્રીય ટીમમાં પસંદગી માટે અને કેન્દ્રીય કરાર માટે ઘરેલૂ મેચોમાં ભાગ લેવું ફરજિયાત રહેશે. આ સાથે, તમામ ખેલાડીઓ તેમની મેચ ફિટનેસ જાળવી શકશે અને તેમની રમતને પણ મજબૂત બનાવી શકશે. આ ઉપરાંત યુવા ખેલાડીઓને પણ તેમની પાસેથી ઘણું શીખવાની તક મળશે. આ નિયમમાંથી છૂટ અમુક ખાસ કારણોસર જ મળશે, જેના માટે મુખ્ય કોચ અને પસંદગી સમિતિના અધ્યક્ષ પાસેથી મંજૂરી લેવી પડશે.
3. હવે તમામ ખેલાડીઓએ નિર્ધારિત પ્રેક્ટિસ સેશનના સમગ્ર સમયગાળા માટે પ્રેક્ટિસ સેશનમાં રહેવું પડશે. આ નિયમ હેઠળ હવે કોઈપણ ખેલાડી પ્રેક્ટિસ પૂરી કર્યા બાદ મેદાન છોડી શકશે નહીં.
4. હવે તમામ ખેલાડીઓને દેશમાં વિદેશી પ્રવાસો અને સીરિઝમાં વધારાનો સામાન લઈ જવાની મંજૂરી આપવામાં નહીં આવે, જેમાં તેમણે BCCI દ્વારા નિર્ધારિત મર્યાદાનું પાલન કરવું પડશે. જો કોઈ ખેલાડી વધારાનો સામાન વહન કરે છે, તો તેણે પોતાનો ખર્ચ પોતે જ ઉઠાવવો પડશે.
5. ભારતીય ટીમના કેટલાક ખેલાડીઓને લઈને એવા અહેવાલ હતા કે તેઓ તેમના અંગત સ્ટાફને પોતાની સાથે લઈ જાય છે, હવે BCCIએ તેના પર સંપૂર્ણ પ્રતિબંધ લગાવી દીધો છે, જેમાં તેમણે તેમના પર્સનલ મેનેજર, શેફ, આસિસ્ટન્ટ અને પર્સનલ સિક્યોરિટી કર્મચારીઓને લઈ જવા પર સંપૂર્ણ પ્રતિબંધ લગાવી દીધો છે.
6. ખેલાડીઓએ હવે બેંગ્લોરમાં સ્થિત સેન્ટર ઓફ એક્સેલન્સને અલગથી બેગ મોકલવા કે પછી કોઈપણ સાધનો અને અંગત વસ્તુઓ મોકલતા પહેલા ટીમ મેનેજમેન્ટને જાણ કરવી પડશે. અલગ-અલગ વ્યવસ્થાઓને કારણે જે વધારાનો ખર્ચ થશે તેની જવાબદારી ખેલાડીની રહેશે.
7. હવે ભારતીય ટીમનો કોઈપણ ખેલાડી કોઈપણ સીરિઝ દરમિયાન જાહેરાત શૂટ નહીં કરી શકે. BCCIએ તેના નવા નિયમ સાથે આ અંગે પણ સ્પષ્ટતા કરી છે. આ નિયમ માત્ર તે સીરિઝ કે પ્રવાસ પર ખેલાડીઓનું ધ્યન રહે તે માટે લાગૂ કરવામાં આવ્યો છે.
8. ખેલાડીઓ અને ટીમની પ્રતિબદ્ધતાઓ વચ્ચે સંતુલન સુનિશ્ચિત કરીને, તેમના પરિવારો સાથે ખેલાડીઓ માટે ટ્રેવેલ પ્લાન પોલિસી લાગૂ કરવામાં આવી છે.
9. હવે બધા ખેલાડીઓ માટે BCCI ની સત્તાવાર શૂટિંગ અને ઇવેન્ટ્સમાં ભાગ લેવો ફરજિયાત રહેશે. આ હિતધારકો પ્રત્યે BCCIની પ્રતિબદ્ધતાઓને જાળવી રાખવા અને રમતને અસરકારક રીતે પ્રોત્સાહન આપવા માટે જરૂરી છે.
10. હવે નવા નિયમો હેઠળ, કોઈપણ ખેલાડીને કોઈપણ મેચ કે સીરિઝ સમાપ્ત થવા પર વહેલા ઘરે પાછા ફરવાની મંજૂરી આપવામાં આવશે નહીં; તેમણે પ્રવાસ પૂરો થયા બાદ પરત ફરવું પડશે, ભલે મેચ નિર્ધારિત સમય પહેલાં સમાપ્ત થાય.