જસપ્રીત બૂમરાહે ઉસ્માન ખ્વાજાને આઉટ કરીને બનાવ્યો રેકોર્ડ, 8 વર્ષ બાદ ઈતિહાસનું થયું પુનરાવર્તન
Jasprit Bumrah: ભારત અને ઓસ્ટ્રેલિયા વચ્ચે રમાઈ રહેલી છેલ્લી ટેસ્ટમાં માત્ર પ્રથમ દિવસની રમત પૂરી થઇ છે, પરંતુ રોમાન્ચ ચરમસીમાએ પહોંચી ગઈ છે. પ્રથમ દિવસે ભારતીય ટીમની બેટિંગ ફરી એકવાર ફ્લોપ રહી હતી. એ તો ભલુ થાય જસપ્રીત બૂમરાહનું, જેણે પ્રથમ દિવસની રમત સમાપ્ત થાય તે અગાઉ ઉસ્માન ખ્વાજાને પેવેલિયનમાં મોકલી દીધો, તેનાથી ભારતીય ટીમે રાહતનો શ્વાસ લીધો હશે. આ વિકેટ સાથે જસપ્રીત બૂમરાહે ભારતીય ટીમ માટે લગભગ 8 વર્ષ જૂના ઈતિહાસનું પુનરાવર્તન કર્યું છે.
જસપ્રીત બૂમરાહ ફરી એકવાર ટેસ્ટમાં ભારતીય ટીમની કેપ્ટનશીપ કરી રહ્યો છે. આ અગાઉ, જ્યારે તેણે આ શ્રેણીની પ્રથમ મેચમાં કમાન સંભાળી હતી, ત્યારે ભારતીય ટીમ વિજય નોંધાવવામાં સફળ રહી હતી. હવે ફરીથી તેને ભારતીય ટીમની સફરની જવાબદારી સોંપવામાં આવી છે. જસપ્રીત બૂમરાહે ઉસ્માન ખ્વાજાને દિવસના છેલ્લા બૉલ પર આઉટ કર્યો હતો. ઉસ્માન ખ્વાજાએ પોતાની ઇનિંગ દરમિયાન 10 બૉલનો સામનો કર્યો હતો અને બે રન બનાવીને આઉટ થઇ ગયો હતો. આ બોર્ડર ગાવસ્કર ટ્રોફીમાં બૂમરાહે છઠ્ઠી વખત ઉસ્માનને આઉટ કર્યો છે. આ અગાઉ માત્ર એક જ વાર આવું બન્યું છે, જ્યારે એક જ શ્રેણીમાં કોઈ ભારતીય બૉલર 6 વખત આઉટ કર્યો હોય.
વર્ષ 2016માં જ્યારે ભારત અને ઈંગ્લેન્ડની ટીમો સામ-સામે હતી ત્યારે રવિન્દ્ર જાડેજાએ 6 વખત એલિસ્ટર કૂકને પેવેલિયનનો રસ્તો બતાવ્યો હતો. ત્યાર બાદ હવે આ પરાક્રમનું પુનરાવર્તન થયું છે. જસપ્રીત બૂમરાહ અને ઉસ્માન ખ્વાજા આ સીરિઝમાં અત્યાર સુધીમાં 8 વખત સામસામે આવી ચૂક્યા છે. આ સમયગાળા દરમિયાન, ઉસ્માને બૂમરાહના 112 બૉલનો સામનો કરતા માત્ર 33 રન બનાવ્યા છે અને તે 6 વખત આઉટ થયો છે. આ દરમિયાન બૂમરાહ સામે ઉસ્માનની સરેરાશ માત્ર 5.50 રહી છે. જે તદ્દન ખરાબ કહી શકાય. આ દરમિયાન હવે ફરી એક વખત બૂમરાહ અને ઉસ્માન સામસામે છે. જો તે ઇનિંગ્સમાં પણ ઉસ્માન બૂમરાહનો શિકાર બને છે તો સમજો કે નવો રેકોર્ડ બનશે.
ભારતીય ટીમ પહેલા દિવસે માત્ર 185 રન બનાવી શકી હતી. જવાબમાં ઑસ્ટ્રેલિયાએ અત્યાર સુધી એક વિકેટના નુકસાને 9 રન બનાવી લીધા હતા. હવે ભારતીય ટીમ બીજા દિવસે ઓસ્ટ્રેલિયાની ઈનિંગ્સને વહેલી તકે સમેટી લેવાનો પ્રયાસ કરશે, જેથી મેચમાં થોડી લીડ લઈ શકાય. ભારતનો સ્કોર વધારે મોટો નથી, પણ એટલો નાનો પણ નથી કે માની શકાય કે મેચ હવે ભારતના નિયંત્રણ બહાર છે. આ મેચનું પરિણામ શું આવશે તે બીજા દિવસની રમત પર નિર્ભર રહેશે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp