બધા જૂના કે નવા ચહેરા? ટીમ આતિશીમાં કોણ કોણ
રાજધાની દિલ્હી માટે 17મી સપ્ટેમ્બર ખૂબ જ મહત્વપૂર્ણ દિવસ હતો. રાજકીય ઉથલ-પાથલ બાદ કેજરીવાલે મુખ્યમંત્રી પદ પરથી રાજીનામું આપી દીધું અને આતિશીને દિલ્હીના નવા મુખ્યમંત્રી બનવાનો નિર્ણય લેવામાં આવ્યો. એમ કહેવામાં આવી રહ્યું છે કે બધું જ આયોજનબદ્ધ વ્યૂહરચના મુજબ થયું. હવે દિલ્હીના નવા મુખ્યમંત્રીની જાહેરાત સાથે સરકારની નવી કેબિનેટમાં ચહેરાઓને સામેલ કરવા અંગે પણ ચર્ચાઓ તેજ થઈ ગઈ છે. ચર્ચા છે કે આતિશીની કેબિનેટમાં કોણ કોણ બનશે મંત્રી? આતિશી સરકારમાં નવા મંત્રીઓનો સમાવેશ થશે કે પછી જૂના ચહેરાઓને ફરી તક મળશે? સમીકરણ શું કહે છે તે સમજો.
એવી અટકળો છે કે પાર્ટી આતિશીની નવી કેબિનેટની ખાલી પડેલી જગ્યાઓ પર પ્રાદેશિક અને જ્ઞાતિના સમીકરણોને ઉકેલવાનો પ્રયાસ કરશે. બંધારણીય જોગવાઈઓ અનુસાર દિલ્હીમાં મુખ્યમંત્રી સિવાય વધુમાં વધુ 6 મંત્રી હોઈ શકે છે. સૂત્રોનું માનીએ તો આતિશી માત્ર જૂના ચહેરાઓ પર જ વિશ્વાસ મુકી શકે છે. કારણ - જૂના મંત્રીઓ તેમના કામથી વાકેફ છે. જૂના મંત્રીઓ પહેલાથી ચાલી રહેલા કામને ચાલુ રાખવામાં અને નીતિ વિષયક બાબતોને સરળતાથી ચલાવવામાં વધુ યોગદાન આપી શકે છે. દિલ્હીની ચૂંટણી નજીક હોવાથી પાર્ટી નવા ચહેરાઓ પર દાવ નહીં લગાવે.
દિલ્હી વિધાનસભાનો કાર્યકાળ આવતા વર્ષે 23 ફેબ્રુઆરીએ સમાપ્ત થઈ રહ્યો છે, તેથી એવી અપેક્ષા રાખવામાં આવે છે કે દિલ્હી વિધાનસભાની ચૂંટણી ફેબ્રુઆરીની શરૂઆતમાં જ યોજાઈ શકે છે. ચૂંટણી પંચ કોઈપણ સમયે ચૂંટણી કાર્યક્રમની જાહેરાત કરી શકે છે, ત્યારબાદ આચારસંહિતા લાગૂ થઈ જશે. એવા સમયમાં નવા મંત્રીઓને તેમનું કામ કરવા માટે સમય નહીં રહે. આતિશી કેબિનેટમાં ફેરબદલ કરીને પાર્ટીમાં કોઈપણ પ્રકારની અસ્થિરતા લાવવાનો પ્રયાસ કરે તેવી શક્યતા ઓછી છે. એવું માનવામાં આવે છે કે આતિશી જૂના કેબિનેટ સાથે તેમનો કાર્યકાળ ચાલુ રાખશે.
હાલમાં દિલ્હીમાં 5 મંત્રીઓ છે અને કેબિનેટમાં એક સીટ ખાલી છે. આતિશી મુખ્યમંત્રી બન્યા બાદ પણ એક મંત્રી પદ ખાલી રહેશે. માનવામાં આવે છે કે જૂના ચહેરાઓની યાદીમાં ગોપાલ રાય, કૈલાશ ગેહલોત, ઈમરાન હુસૈન અને સૌરભ ભારદ્વાજને નવી કેબિનેટમાં ફરીથી મંત્રી તરીકે સામેલ કરવામાં આવી શકે છે. કોંડલીના ધારાસભ્ય કુલદીપ કુમાર અને મંગોલપુરીના ધારાસભ્ય રાખી બિરલાનના નામ પણ રેસમાં સામેલ છે. આતિશી આ બેમાંથી કોઈ એકને તક આપી શકે છે. અન્ય ઘણા ધારાસભ્યો કેબિનેટમાં સામેલ થવાની હોડમાં છે. જેમાં સોમનાથ ભારતી, દુર્ગેશ પાઠક, સંજીવ ઝા, દિલીપ પાંડે અને મહેન્દ્ર ગોયલ જેવા નામ સામેલ છે.
કેજરીવાલની જૂની કેબિનેટ પર નજર કરીએ તો આ લિસ્ટમાં આતિશ, ગોપાલ રાય, ઈમરાન હુસૈન, કૈલાશ ગેહલોત, સૌરભ ભારદ્વાજ, મનીષ સિસોદિયા, સત્યેન્દ્ર કુમાર જૈન, રાજેન્દ્ર પાલ ગૌતમ જેવા નેતાઓનો સમાવેશ કરવામાં આવ્યો હતો.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp