ડોનાલ્ડ ટ્રમ્પે ભારતીય વસ્તુઓ પર 20-25% ટેરિફ લાદવાના સંકેત આપ્યા,અંતિમ નિર્ણય હજુ બાકી, જાણો વિગતો
તાજેતરના અઠવાડિયામાં, ટ્રમ્પ સતત સંકેત આપી રહ્યા છે કે ભારત અને અમેરિકા વચ્ચે ટૂંક સમયમાં વેપાર કરાર થઈ શકે છે, જેનાથી આશા જાગી છે કે 1 ઓગસ્ટ પહેલા કરાર થઈ જશે. પરંતુ હજુ સુધી કોઈ નક્કર નિર્ણય લેવામાં આવ્યો નથી, જેના કારણે વ્યાપારી વર્તુળોમાં અનિશ્ચિતતા વધી છે.અમેરિકાના રાષ્ટ્રપતિ ડોનાલ્ડ ટ્રમ્પે મંગળવારે સ્પષ્ટ કર્યું કે ભારત સાથેનો વેપાર કરાર હજુ સુધી અંતિમ સ્વરૂપ પામ્યો નથી. આ નિવેદન એવા સમયે આવ્યું છે જ્યારે ટ્રમ્પે પોતે નક્કી કરેલી 1 ઓગસ્ટ, 2025 ની ટેરિફ સમયમર્યાદા હવે ખૂબ નજીક છે. એરફોર્સ વન પર પત્રકારો સાથે વાત કરતા ટ્રમ્પે કહ્યું કે ભારત સાથે વેપાર વાટાઘાટો "ખૂબ જ સકારાત્મક રીતે ચાલી રહી છે", પરંતુ તે જ સમયે તેમણે એ પણ સંકેત આપ્યો કે ભારતમાંથી આવતા ઉત્પાદનો પર 20% થી 25% ની આયાત ડ્યુટી (ટેરિફ) લાદવામાં આવી શકે છે. એક પ્રશ્નના જવાબમાં ટ્રમ્પે કહ્યું, "ભારત મારો મિત્ર છે, પરંતુ તે ઘણા બધા ટેરિફ વસૂલ કરે છે". તેમણે કહ્યું, હા, મને લાગે છે કે ભારતે વધુ ટેરિફ ચૂકવવા પડશે. ભારત મારો મિત્ર છે. મારી અપીલ પર તેમણે પાકિસ્તાન સાથેનું યુદ્ધ સમાપ્ત કર્યું. પરંતુ ભારત અમેરિકા પાસેથી વિશ્વના લગભગ દરેક દેશ કરતાં વધુ ટેરિફ વસૂલ કરી રહ્યું છે. જોકે, અમેરિકા દ્વારા ભારતને હજુ સુધી કોઈ ઔપચારિક પત્ર કે સૂચના જારી કરવામાં આવી નથી, જેમ ટ્રમ્પે અન્ય દેશોના કિસ્સામાં કરી હતી.
અમેરિકા ભારતનો સૌથી મોટો વેપારી ભાગીદાર છે. નાણાકીય વર્ષ 2023-24માં બંને દેશો વચ્ચે દ્વિપક્ષીય વેપાર $191 બિલિયન હતો. ભારતે અમેરિકાને $77.5 બિલિયનની નિકાસ કરી હતી, જ્યારે $55.4 બિલિયનની આયાત કરી હતી. પરંતુ ટ્રમ્પના સંરક્ષણવાદી વલણ અને સંભવિત નવા ટેરિફને કારણે આ વેપાર સંતુલન જોખમમાં મુકાઈ શકે છે.
દરમિયાન, કેન્દ્રીય વાણિજ્ય મંત્રી પીયૂષ ગોયલે રવિવારે જણાવ્યું હતું કે ભારત હવે આત્મવિશ્વાસ અને શક્તિ સાથે વેપાર કરારોમાં પ્રવેશ કરી રહ્યું છે. અમેરિકા સાથે અમારી વાતચીત સારી રીતે આગળ વધી રહી છે. અમે સંતુલિત અને ફાયદાકારક કરારો તરફ આગળ વધી રહ્યા છીએ. આ ઉપરાંત, 14 જુલાઈના રોજ, એક વરિષ્ઠ સરકારી અધિકારીએ જણાવ્યું હતું કે ભારત અને અમેરિકા વચ્ચે દ્વિપક્ષીય વેપાર કરાર (BTA) અંગે મજબૂત પ્રગતિ થઈ છે અને બંને દેશો પરસ્પર હિતો અનુસાર સંતુલન જાળવવાનો પ્રયાસ કરી રહ્યા છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp