અમદાવાદ કરશે કોમનવેલ્થ ગેમ્સ 2030ની યજમાની? CM ભુપેન્દ્ર પટેલ અને ગૃહમંત્રી હર્ષ સંઘવીની આવી પ્રતિક્રિયા

ભારતે અમદાવાદમાં 2030 કોમનવેલ્થ ગેમ્સનું આયોજન કરવા માટે દાવેદારી કરી હતી. કોમનવેલ્થ સ્પોર્ટ્સ એક્ઝિક્યુટિવ બોર્ડે ભારતમાં 2030 કોમનવેલ્થ ગેમ્સનું આયોજન કરવાની ભલામણ કરી છે. આ સાથે ભારત હવે કોમનવેલ્થ ગેમ્સ સુરક્ષિત કરવા માટે એક ડગલું નજીક છે. 2030 ગેમ્સનો નિર્ણય નવેમ્બરના અંતમાં લેવામાં આવશે. ગુજરાતે પણ 2036 ઓલિમ્પિક ગેમ્સનું આયોજન કરવાનું સ્વપ્ન જોયું છે. જો ભારતને કોમનવેલ્થ ગેમ્સ મળે છે, તો ઓલિમ્પિક માટે તેની દાવેદારો ઓલિમ્પિક માટે વધુ મજબૂત થશે. કેન્દ્રીય ગૃહમંત્રી અમિત શાહે બુધવારે X પર આ મુખ્ય અપડેટ શેર કર્યું.

મુખ્યમંત્રી ભૂપેન્દ્ર પટેલે કહ્યું કે, આ ખરેખર ગુજરાત અને ભારત માટે ગર્વની ક્ષણ છે. તેમણે વડાપ્રધાન નરેન્દ્ર મોદીના વિઝનની પ્રશંસા કરી અને કોમનવેલ્થ ગેમ્સ માટે અમદાવાદને પસંદ કરવાના કોમનવેલ્થ સ્પોર્ટ્સ એક્ઝિક્યુટિવ બોર્ડના નિર્ણયનું સ્વાગત કર્યું. નોંધનીય છે કે 2030 કોમનવેલ્થ ગેમ્સ માત્ર એક રમતગમતની ઘટના જ નહીં પરંતુ આંતરરાષ્ટ્રીય રમતગમતના 100 વર્ષની ઉજવણી પણ હશે. આ રમતો 74 કોમનવેલ્થ દેશો વચ્ચે રમતગમતની ભાવના અને સહકારની સદીનું પ્રતીક બનશે અને અમદાવાદ શહેર આ ઇતિહાસનું સાક્ષી બનવા માટે તૈયાર છે.

કોમનવેલ્થ ગેમ્સ એસોસિએશન ઓફ ઈન્ડિયાના પ્રમુખ ડૉ. પી.ટી. ઉષાએ 100મી કોમનવેલ્થ ગેમ્સને ‘ગેમ્સ ફોર ધ ફ્યુચર’ ગણાવી હતી, અને કહ્યું હતું કે સ્થિરતા, સમાવેશકતા અને નવીનતા પર આધારિત અમદાવાદમાં કોમનવેલ્થ ગેમ્સ કોમનવેલ્થ રમતગમતની આગામી સદીનો પાયો વધુ મજબૂત બનાવશે અને તેની સકારાત્મક અસર આગામી વર્ષો સુધી ભારતની બહાર અનુભવાશે. આ સંદર્ભમાં, કેન્દ્રીય રમતગમત મંત્રી ડૉ. મનસુખ માંડવિયાએ જણાવ્યું હતું કે અમદાવાદમાં 2030ની કોમનવેલ્થ ગેમ્સ દરેક ભારતીય માટે ગર્વની ક્ષણ હશે. આ રમતગમતમાં ભારતનું વધતું નેતૃત્વ અને ભારત સરકારનો વિશ્વાસ દર્શાવે છે કે રમતગમત લોકોને એક કરી શકે છે, સમાવેશિતાને પ્રોત્સાહન આપી શકે છે અને નવી પેઢીને પ્રેરણા આપી શકે છે. ભારતની સફળતા ‘2047માં વિકસિત ભારત’ના રાષ્ટ્રીય દૃષ્ટિકોણને મજબૂત બનાવશે, જ્યાં વિશ્વ-સ્તરીય રમતો, માળખાગત સુવિધાઓ અને યુવા વિકાસ આપણા દેશની વિકાસ વાર્તાનો અભિન્ન ભાગ છે.

ગુજરાતના રમતગમત મંત્રી હર્ષ સંઘવીએ આ અવસરને ભારત અને ગુજરાત માટે ગર્વની ક્ષણ ગણાવતા કહ્યું કે અમદાવાદમાં 100મી કોમનવેલ્થ ગેમ્સ માત્ર એક વૈશ્વિક સ્પોર્ટ્સ કાર્યક્રમનું આયોજન કરવા વિશે નથી, પરંતુ વિશ્વ સમક્ષ આત્મવિશ્વાસપૂર્ણ, સક્ષમ, ભવિષ્યલક્ષી અને નવા ભારતને પ્રદર્શિત કરવાની સુવર્ણ તક પણ છે. ગુજરાત સરકાર કોમનવેલ્થના 100 વર્ષના વારસાનું સન્માન કરતા કોમનવેલ્થ સ્પોર્ટની આગામી સદી માટે માર્ગ મોકળો કરવા માટે સંપૂર્ણપણે પ્રતિબદ્ધ છે.

બોર્ડે ભારત સરકાર, ગુજરાત સરકાર અને કોમનવેલ્થ ગેમ્સ એસોસિએશન ઓફ ઈન્ડિયા દ્વારા સંયુક્ત રીતે રજૂ કરાયેલા યજમાન પ્રસ્તાવની ખૂબ પ્રશંસા કરી, જે કોમનવેલ્થ રમતગમતના ‘ગેમ્સ રીસેટ’ સિદ્ધાંતોને પોષણક્ષમતા, સમાવેશીતા, સ્થિરતા અને વારસાને પ્રોત્સાહન આપે છે. 2030 કોમનવેલ્થ ગેમ્સ ભારતની વૈશ્વિક રમતગમત કેન્દ્ર બનવાની લાંબા ગાળાની મહત્ત્વાકાંક્ષાને વધુ મજબૂત બનાવશે. આ વૈશ્વિક ઇવેન્ટ શહેરી નવીકરણ, યુવા ભાગીદારી અને રમતગમતમાં આંતરરાષ્ટ્રીય સહયોગ માટે ઉત્પ્રેરક તરીકે સેવા આપશે. અમદાવાદમાં એક વિશ્વ-સ્તરીય સ્પોર્ટ્સ કોમ્પ્લેક્ષ બનાવવામાં આવી રહ્યું છે, જે તેની રમતગમત સુવિધાઓનો વિસ્તાર કરશે.