262 કરોડનું ડ્ર્ગ્સ જપ્ત કરાયું, સેલ્સ મેનેજર નીકળ્યો માસ્ટરમાઇન્ડ

નાર્કોટિક્સ કંટ્રોલ બ્યૂરો (NCB)એ દિલ્હી-NCRમાં એક મોટા સિન્થેટિક ડ્રગ રેકેટનો પર્દાફાશ કરવામાં સફળતા હાંસલ કરી છે. આ કેસના સંદર્ભમાં NCBએ નોઈડાથી 25 વર્ષીય શેન વારિસની ધરપકડ કરી હતી. પૂછપરછ દરમિયાન તેણે ઘણા મહત્ત્વપૂર્ણ ખુલાસા કર્યા છે. તેના માધ્યમથી એજન્સીઓને 328.54 કિલો મેથામ્ફેટામાઈન જપ્ત કરવામાં મદદ મળી હતી, જે અત્યાર સુધીની સૌથી મોટી જપ્તીઓમાંની એક છે. આ ડ્રગની કિંમત આંતરરાષ્ટ્રીય બજારમાં આશરે 262 કરોડ હોવાનો અંદાજ છે. આ કેસમાં અત્યાર સુધીમાં 2 લોકોની ધરપકડ કરવામાં આવી છે.

શેન વારિસ ઉત્તર પ્રદેશના અમરોહાના મંગરૌલી ગામનો રહેવાસી છે. તે નોઈડાના હરોલાના સેક્ટર-5માં એક ફ્લેટમાં રહેતો હતો અને એક કંપની માટે સેલ્સ મેનેજર હોવાનો દાવો કરતો હતો. NCBની ટીમની તપાસમાં શેન વારિસનું નામ આવ્યા બાદ, 20 નવેમ્બરના રોજ તેની ધરપકડ કરવામાં આવી હતી.

પૂછપરછ દરમિયાન તેણે ખુલાસો કર્યો કે, તેના બોસના કહેવા પર, તે તેના નેટવર્કની પ્રવૃત્તિઓ છુપાવવા માટે નકલી સિમ કાર્ડ અને વોટ્સએપ અને ઝેંગી જેવી એન્ક્રિપ્ટેડ એપ્સનો ઉપયોગ કરતો હતો. સાથે જ, શેનની પૂછપરછમાં ડ્રગ નેટવર્ક વિશે મહત્ત્વપૂર્ણ માહિતી મળી, જેમાં એસ્થર કિનિમી નામની મહિલાની ઓળખનો સમાવેશ થાય છે, જેણે અગાઉ તેના દ્વારા ડ્રગનો જથ્થો મોકલ્યો હતો. શેને તેનો મોબાઇલ નંબર, સરનામું અને નેટવર્કની માહિતી પણ શેર કરી. પોલીસે મહિલાની ધરપકડ કરી છે.

શેન પાસેથી મળેલી માહિતીના આધારે NCBએ 20 નવેમ્બરની રાત્રે છતરપુર એન્ક્લેવ ફેઝ-2ની એક ઇમારતમાં દરોડો પાડ્યો હતો. આંતરરાષ્ટ્રીય બજારમાં 262 કરોડની કિંમતનું 328.54 કિલો મેથામ્ફેટામાઇન જપ્ત કરવામાં આવ્યું હતું. આ જપ્તી પોતાની જાતમાં મોટી માનવમાં આવી રહી છે. નાગાલેન્ડના રહેવાસી એસ્થર કિનિમીના ફ્લેટમાંથી ડ્રગ્સ જપ્ત કરવામાં આવ્યું હતું.

તપાસમાં જાણવા મળ્યું છે કે શેને સમગ્ર નેટવર્કમાં મુખ્ય ભૂમિકા ભજવી હતી, અને તેના બોસ વિદેશી ઓપરેટિવ હતા જેઓ એપ્સ અને કોડવર્ડ દ્વારા ભારતમાં લોકોને નિર્દેશ મોકલતા હતા. શેન દ્વારા આપવામાં આવેલા ઇનપુટ્સથી ગેંગના અન્ય ઘણા સભ્યોની ઓળખ થઈ છે, નેટવર્ક વિશે વિગતવાર માહિતી મળી છે અને એજન્સીઓને ઉપયોગમાં લેવાતા માર્ગો, સંગ્રહ અને પરિવહન પદ્ધતિઓ અને સંભવિત ભંડોળ ચેનલો સમજવામાં નોંધપાત્ર મદદ મળી છે.

આ કેસમાં હાલમાં વિગતવાર તપાસ ચાલી રહી છે. NCBએ જણાવ્યું હતું કે કેસ હજુ તેના પ્રારંભિક તબક્કામાં છે. એજન્સીઓ ડ્રગ સપ્લાય ચેઇન, નાણાકીય વ્યવહારો, વિદેશી જોડાણો અને અન્ય સહ-કાવતરાખોરોની વધુ ઊંડાણપૂર્વક તપાસ કરી રહી છે. આગામી દિવસોમાં વધુ ધરપકડો અને જપ્તીઓની અપેક્ષા છે.