શ્રીલંકાના વર્લ્ડ કપ વિજેતા કેપ્ટન અર્જૂન રણતુંગા પર લટકી ધરપકડની તલવાર, જાણો શું છે આખો મામલો
શ્રીલંકાના 1996 વર્લ્ડ કપ વિજેતા ટીમના કેપ્ટન અર્જૂન રણતુંગાની મુશ્કેલીઓ વધતી જતી હોય તેવું લાગે છે. શ્રીલંકાના અધિકારીઓએ કોર્ટને જાણ કરી છે કે પેટ્રોલિયમ મંત્રી તરીકેના તેમના કાર્યકાળ દરમિયાન કથિત ભ્રષ્ટાચારના આરોપોમાં તેમની ધરપકડ કરવાની યોજના બનાવવામાં આવી રહી છે. આ માહિતી કોલંબોની કોર્ટને આપવામાં આવી હતી.
ભ્રષ્ટાચાર વિરોધી એજન્સી, કમિશન ટુ ઇન્વેસ્ટિગેટ અલિગેશન્સ ઓફ બ્રિબેરી ઓર કરપ્શન (CIABOC) અનુસાર, અર્જૂન રણતુંગા અને તેમના ભાઈ પર લાંબા સમયથી તેલ ખરીદી પ્રક્રિયાઓમાં ફેરફાર કરવાનો અને મોંઘી કિંમતે ખરીદી કરવાનો આરોપ છે. એજન્સીનું કહેવું છે કે 2017માં થયેલા 27 સોદાઓથી શ્રીલંકા સરકારને આશરે 80 કરોડ શ્રીલંકન રૂપિયા (આશરે 23.5 કરોડ ભારતીય રૂપિયા)નું નુકસાન થયું છે.
CIABOCએ કોલંબોના મેજિસ્ટ્રેટ અસંગા બોદરાગામાને જણાવ્યું કે અર્જૂન રણતુંગા હાલમાં વિદેશમાં છે અને પરત ફરતા જ ધરપકડ કરવામાં આવશે. તેમના મોટા ભાઈ ધમ્મિકા રણતુંગાની 15 ડિસેમ્બરે ધરપકડ કરવામાં આવી હતી. જોકે, બાદમાં તેમને જામીન પર મુક્ત કરવામાં આવ્યા હતા. ઉલ્લેખનીય છે કે 2017માં જ્યારે આ કથિત ગેરરીતિઓ થઈ હતી, ત્યારે અર્જૂન રણતુંગા શ્રીલંકા સરકારમાં પેટ્રોલિયમ ઉદ્યોગ મંત્રી હતા અને ધમ્મિકા રાજ્ય માલિકીની સિલોન પેટ્રોલિયમ કોર્પોરેશન (CPC)ના વડા હતા.
કોર્ટે ધમ્મિકા રણતુંગા પર મુસાફરી પ્રતિબંધ પણ લાદ્યો છે. ધમ્મિકા શ્રીલંકા અને અમેરિકાની બેવડી નાગરિકતા ધરાવે છે. આ કેસમાં આગામી સુનાવણી 13 માર્ચે થવાની છે. 62 વર્ષીય અર્જૂન રણતુંગા શ્રીલંકા ક્રિકેટના સૌથી મોટા નામોમાંથી એક છે. રણતુંગાની કેપ્ટનશીપ હેઠળ શ્રીલંકા 1996માં ઓસ્ટ્રેલિયાને હરાવીને વિશ્વ ચેમ્પિયન બન્યું હતું.
રણતુંગા ભાઈઓ સામેની આ કાર્યવાહીને રાષ્ટ્રપતિ અનુરા કુમારા દિસાનાયકેની સરકાર દ્વારા વ્યાપક ભ્રષ્ટાચાર વિરોધી ઝુંબેશનો ભાગ માનવામાં આવે છે. દિસાનાયકે ગયા વર્ષે સત્તામાં આવ્યા હતા અને ભ્રષ્ટાચાર સામે કડક કાર્યવાહી કરવાનું વચન આપ્યું હતું.
રણતુંગા પરિવારના બીજા ભાઈ પ્રસન્ના રણતુંગાની ગયા મહિને વીમા છેતરપિંડીના કેસમાં ધરપકડ કરવામાં આવી હતી. પ્રસન્ના રણતુંગા ભૂતપૂર્વ પ્રવાસન મંત્રી હતા. આ કેસ હજુ પણ પેન્ડિંગ છે, જ્યારે જૂન 2022માં, તેમને એક ઉદ્યોગપતિ પાસેથી ખંડણીના કેસમાં દોષિત ઠેરવવામાં આવ્યા હતા.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp