સુશાંત સિંહ રાજપૂતની આજે પુણ્યતિથિ..' જેમનું મૃત્યુ આજે પણ છે રહસ્ય..! આ ફિલ્મોથી રાતોરાત બની ગયો હતો સુપરસ્ટાર
સુશાંત સિંહ રાજપૂતની આજે પુણ્યતિથિ છે. સુશાંત સિંહ રાજપૂત, હિન્દી સિનેમાનો એ અનોખો હીરો, જે હવે આપણી વચ્ચે નથી. 4 વર્ષ પહેલા આ દિવસે એટલે કે 14મી જૂને સુશાંતના મુંબઈમાં તેના ફ્લેટમાં આત્મહત્યાના સમાચારે બધાને ચોંકાવી દીધા હતા.અભિનેતાના ચાહકો તેને દરેક ક્ષણે યાદ કરે છે. સુશાંત એક અભિનેતા તરીકે ઘણો સફળ રહ્યો અને તેની ફિલ્મી કરિયરમાં તેણે કેટલીક હિટ ફિલ્મો પણ આપી.
આજે પણ અભિનેતાના ચાહકો તેના મૃત્યુના આઘાતમાંથી બહાર આવી શક્યા નથી અને સુશાંત સિંહ રાજપૂતની પુણ્યતિથિ પર તેને યાદ કરી રહ્યા છે. સુશાંતના નિધન પછી, તેનો પરિવાર, સંબંધીઓ અને તેના ચાહકો પણ તેને વારંવાર યાદ કરે છે. સુશાંતે પોતાના અભિનયથી બધાનું દિલ એટલું જીતી લીધું કે જ્યારે તેણે આ દુનિયા છોડી દીધી ત્યારે બધાની આંખો ભીની થઈ ગઈ. સુશાંતનું મૃત્યુ આજે પણ એક રહસ્ય છે.
સુશાંત સિંહના ચહેરા પર હંમેશા સુંદર સ્મિત રહેતું હતું. બહુ ઓછા લોકો જાણતા હશે કે સુશાંતનું ઉપનામ 'ગુલશન' હતું. સુશાંતનો જન્મ 21 જાન્યુઆરી 1986ના રોજ પટનામાં થયો હતો. સુશાંત પાંચ ભાઈ-બહેનોમાં સૌથી નાનો હતો. સુશાંતની માતાના મૃત્યુ પછી, આખો પરિવાર તૂટી ગયો અને પટનાથી દિલ્હી શિફ્ટ થઈ ગયો.
સુશાંતે ટેલિવિઝન સિરિયલોથી કરિયરની શરૂઆત કરી હતી. તેનો પહેલો શો 2008માં સ્ટાર પ્લસનો રોમેન્ટિક ડ્રામા 'કિસ દેશ મેં હૈ મેરા દિલ' હતો, ત્યારબાદ તેણે ઝી ટીવીના લોકપ્રિય શો 'પવિત્ર રિશ્તા'થી ખ્યાતિ મેળવી હતી. અભિનેતા તરીકે સુશાંત સિંહ રાજપૂતનો બોક્સ ઓફિસ રેકોર્ડ ઘણો સારો રહ્યો હતો. કેટલીક એવી ફિલ્મો તેણે કરી કે જેના કારણે તે રાતોરાત ઈન્ડસ્ટ્રીનો સુપરસ્ટાર બની ગયો.
તેણે પોતાના ફિલ્મી કરિયરની શરૂઆત 2013માં આવેલી ફિલ્મ 'કાઈ પો છે'થી કરી હતી. સુશાંત સિંહ રાજપૂતે ફિલ્મ કાઈ પો છે દ્વારા હિન્દી સિનેમામાં ડેબ્યૂ કર્યું હતું. આ ફિલ્મમાં તેની સાથે અભિનેતા રાજકુમાર રાવ અને અમિત સાધ પણ જોવા મળ્યા હતા. સુશાંતે તેની પહેલી જ ફિલ્મમાં શાનદાર અભિનયથી છાપ છોડી અને કાઈ પો છે હિટ સાબિત થઈ. અહેવાલો અનુસાર, સુશાંતની આ ફિલ્મે લગભગ 49.67 કરોડનો બિઝનેસ કર્યો હતો.
કાઈ પો છેની સફળતા પછી, સુશાંત સિંહ રાજપૂતની બીજી ફિલ્મ શુદ્ધ દેશી રોમાન્સ લગભગ 8 મહિનાના અંતરાલ પછી સિનેમાઘરોમાં રિલીઝ થઈ. આ વખતે યશ રાજ બેનરે સુશાંતને લોન્ચ કર્યો. આ ફિલ્મમાં તેની સાથે અભિનેત્રી પરિણીતી ચોપરા અને વાણી કપૂર પણ મહત્ત્વની ભૂમિકામાં જોવા મળી હતી. શુદ્ધ દેશી રોમાન્સ હિટ થઈ ગઈ અને ફિલ્મે બોક્સ ઓફિસ પર 46.60 કરોડ રૂપિયાની ચોખ્ખી કમાણી કરી.
ભારતીય ક્રિકેટ ટીમના ભૂતપૂર્વ કેપ્ટન મહેન્દ્ર સિંહ ધોનીની બાયોપિક એમએસ ધોની-ધ અનટોલ્ડ સ્ટોરીએ એક્ટર સુશાંત સિંહ રાજપૂતને રાતોરાત ઈન્ડસ્ટ્રીનો સુપરસ્ટાર બનાવી દીધો. આ ફિલ્મમાં તેણે જે રીતે ધોનીની ભૂમિકા ભજવી છે તેના આજે પણ વખાણ થાય છે. વર્ષ 2016માં રિલીઝ થયેલી આ ફિલ્મે બોક્સ ઓફિસ પર 133.04 કરોડ રૂપિયાની કમાણી કરી હતી.
નિર્દેશક નિતેશ તિવારીના નિર્દેશનમાં બનેલી ફિલ્મ છિછોરે સુશાંત સિંહ રાજપૂતના ફિલ્મી કરિયરની છેલ્લી સુપરહિટ ફિલ્મ સાબિત થઈ હતી. આ ફિલ્મે બોક્સ ઓફિસ પર 153.09 કરોડ રૂપિયાનું બમ્પર કલેક્શન કર્યું હતું. આ રીતે પોતાની 6 વર્ષની ફિલ્મી કરિયરમાં તેણે લગભગ 4 મોટી હિટ ફિલ્મો આપી હતી.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp