રાષ્ટ્રપતિ ટ્રમ્પની મોટી જાહેરાત, 'અમેરિકામાં સ્ટીલ-એલ્યુમિનિયમની આયાત પર લાગશે આટલા ટકા ડ્યૂટી'
Donald Trump: અમેરિકાના રાષ્ટ્રપતિ ડોનાલ્ડ ટ્રમ્પે અમેરિકામાં થતી તમામ સ્ટીલ અને એલ્યુમિનિયમની આયાત પર 25 ટકા ડ્યૂટી લાદવાની જાહેરાત કરીને એક મોટું વેપારિક પગલું ભર્યું છે. ટ્રમ્પે તેને પોતાની વેપાર નીતિનો મહત્ત્વપૂર્ણ ભાગ ગણાવતા કહ્યું કે આ પગલું એ દેશો સામે લેવામાં આવી રહ્યું છે જે અમેરિકન ઉત્પાદનો પર સમાન ડ્યુટી લાદે છે.
ટ્રમ્પે તેમના પહેલા કાર્યકાળ દરમિયાન સ્ટીલ પર 25% અને એલ્યુમિનિયમ પર 10% ટેરિફ પણ લાદ્યો હતો. જોકે તે સમયે કેનેડા, મેક્સિકો અને બ્રાઝિલ જેવા મુખ્ય વેપારી ભાગીદારોને થોડી રાહત આપવામાં આવી હતી, પરંતુ હવે ટ્રમ્પે ફરીથી ટેરિફ લાદવાનો નિર્ણય લીધો છે.
સરકારી માહિતી અનુસાર, અમેરિકાને સ્ટીલના સૌથી મોટા સપ્લાયર્સ કેનેડા, બ્રાઝિલ અને મેક્સિકો છે. ત્યારબાદ દક્ષિણ કોરિયા અને વિયેતનામ આવે છે. કેનેડા અમેરિકાને એલ્યુમિનિયમનો સૌથી મોટો સપ્લાયર છે, જે 2024ના પ્રથમ 11 મહિનામાં કુલ આયાતના 79% હિસ્સો ધરાવે છે. મેક્સિકો એલ્યુમિનિયમ સ્ક્રેપ અને એલ્યુમિનિયમ એલોયનો મુખ્ય સપ્લાયર પણ છે.
ટેરિફને કારણે વેપાર યુદ્ધની શક્યતા
ટ્રમ્પે મેક્સિકો અને કેનેડાથી આવતા માલ પર 25% અને ચીનથી આયાત થતા માલ પર 10% ટેરિફ લાદવાનો આદેશ પણ જાહેર કર્યો છે. આ નિર્ણયથી વૈશ્વિક વેપારમાં અસ્થિરતા વધવાની શક્યતા છે કારણ કે તે 2.1 ટ્રિલિયન ડોલરથી વધુના વાર્ષિક વેપારને અસર કરી શકે છે. જોકે, ટ્રમ્પે કેનેડા અને મેક્સિકોને ટૂંકી રાહત આપી છે, જે દર્શાવે છે કે આ દેશો સાથે નવા વેપાર કરારોની શક્યતા હજુ પણ રહેલી છે.
ટ્રમ્પના આ પગલાને તેમની આર્થિક વ્યૂહરચના તરીકે જોવામાં આવી રહી છે, જેનો હેતુ અમેરિકન ઉદ્યોગોને સુરક્ષિત રાખવા અને સ્થાનિક ઉત્પાદનને પ્રોત્સાહન આપવાનો છે. ટ્રમ્પ માને છે કે આ ટેરિફ નીતિ વિદેશી સ્પર્ધાને નિયંત્રિત કરવામાં અને અમેરિકામાં રોજગારની તકો વધારવામાં મદદ કરશે. ટ્રમ્પે ઝુંબેશ દરમિયાન એમ પણ કહ્યું હતું કે આ ટેરિફ "અન્ય દેશો માટે ખર્ચ હશે, અમેરિકન નાગરિકો માટે નહીં", જેથી સ્પષ્ટ થાય છે કે તેઓ આને તેમની મુખ્ય આર્થિક નીતિ તરીકે પ્રોત્સાહન આપી રહ્યા છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp