10 સેકન્ડમાં 19 લાખ કરોડ સ્વાહા, સેન્સેક્સમાં 3300 પોઈન્ટનો કડાકો, નિફ્ટીમાં પણ ઘટાડો, બ્લેક મન્ડેની આશંકા સાચી સાબિત થઈ!

ટ્રમ્પની ટેરિફની જાહેરાત બાદથી વિશ્વભરના શેરબજારોમાં અરાજકતાનો માહોલ છે. નિષ્ણાતોના બ્લેક મન્ડેની આશંકા વચ્ચે સોમવારે સવારે બજાર ખુલતાની સાથે જ સેન્સેક્સમાં 3300 પોઈન્ટથી વધુનો ઘટાડો જોવા મળ્યો હતો. એટલે કે તે લગભગ 4.70 ટકા નીચે ગયો. જ્યારે નિફ્ટી પણ લગભગ 1000 પોઈન્ટ તૂટ્યો હતો. BSE પર લિસ્ટેડ કંપનીઓના માર્કેટ કેપમાં 19.39 લાખ કરોડ રૂપિયા સુધીનો ઘટાડો થયો છે. એટલે કે બજાર ખુલતાની સાથે જ રોકાણકારોની સંપત્તિમાં 19.39 લાખ કરોડ રૂપિયાનો ઘટાડો થયો છે.

BSE સેન્સેક્સ 3379.19 પોઈન્ટ્સ એટલે કે 4.48 ટકાના ભારે ઘટાડા સાથે 72,623 અને નિફ્ટી-50 1056.05 પોઈન્ટ્સ એટલે કે 4.61 ટકાના ઘટાડા સાથે 21,848.40 પર છે. બીજી તરફ, ટેરિફને કારણે એશિયન શેરબજારોમાં પણ ભૂકંપ જોવા મળ્યો હતો, જ્યાં હોંગકોંગનું બજાર 10 ટકા તૂટ્યું હતું. તો, ચીનથી લઇને જાપાન સુધીના બજારોમાં 6 ટકાનો ઘટાડો જોવા મળ્યો હતો. અમેરિકામાં પણ ભારે ઘટાડાનો સિલસિલો ચાલુ છે, જ્યાં S&P અને Nasdaqના શેરમાં 3 ટકાનો ઘટાડો જોવા મળ્યો હતો, જ્યારે ડાઉ ફ્યૂચર્સ 900 પોઈન્ટ્સ નીચે આવ્યા હતા. જ્યારે બજાર ખુલતાની સાથે જ જાપાનનો નિક્કેઇ 225 પોઈન્ટ તૂટ્યો હતો.

જ્યારે, ઓસ્ટ્રેલિયાનો S&P 200માં 6.5 ટકા ઘટીને 7184.70, દક્ષિણ કોરિયાનો કોસ્પી 5.5 ટકાના ઘટાડા સાથે 2328.52 પર રહ્યો હતો. આ પહેલા અમેરિકન નેસ્ડેક માર્કેટ શુક્રવારે લગભગ 7 ટકાના ઘટાડા સાથે બંધ થયું હતું. જો કે, નિષ્ણાતોનું માનવું છે કે આ ઘટાડો તો કંઈ નથી, જો પરિસ્થિતિને કાબૂમાં નહીં લેવામાં આવે તો અમેરિકન બજારની સ્થિતિ 1987 જેવી થઈ શકે છે.

અગાઉ, શુક્રવારે યુએસ શેરબજારમાં લગભગ 6 ટકાનો ઘટાડો થયો હતો, જે ત્યાંના બજાર માટે 2020 પછીનું સૌથી ખરાબ સપ્તાહ હતું. માસ્ટર ટ્રસ્ટ ગ્રુપના ડિરેક્ટર પુનિત સિંઘાનિયાએ જણાવ્યું હતું કે, "આ અઠવાડિયું વૈશ્વિક અને ભારતીય બજારો માટે અસ્થિર રહેવાનું છે, કારણ કે અમેરિકાના રાષ્ટ્રપતિ ટ્રમ્પે વિશ્વના વિવિધ દેશો પર ટેરિફ લાદ્યા છે, જેનાથી વૈશ્વિક વેપાર યુદ્ધની આશંકા વધી ગઈ છે અને સિંઘે કહ્યું હતું કે ચીનના આર્થિક સંકટમાં વધારો થયો છે. માર્ચ માટે પ્રાઇસ ઇન્ડેક્સ (CPI) ડેટા ગુરુવારે અને બ્રિટનના ગ્રોસ ડોમેસ્ટિક પ્રોડક્ટ (GDP) ડેટા શુક્રવારે જાહેર કરવામાં આવશે.

ગયા અઠવાડિયે, 30 શેરો ધરાવતો BSE સેન્સેક્સ 2,050.23 પોઈન્ટ અથવા 2.64 ટકા ઘટ્યો હતો. જ્યારે નેશનલ સ્ટોક એક્સચેન્જનો નિફ્ટી 614.8 પોઈન્ટ અથવા 2.61 ટકા તૂટ્યો હતો.  મોતીલાલ ઓસ્વાલ ફાઇનાન્શિયલ સર્વિસિસના વેલ્થ મેનેજમેન્ટના હેડ-રિસર્ચ, સિદ્ધાર્થ ખેમકાએ જણાવ્યું હતું કે, "યુએસના વળતા ટેરિફની ચિંતા અને સેક્ટર આધારિત સ્પેશિયલ ટેરિફની જાહેરાતની શક્યતા વચ્ચે ભારતીય બજારો આ અઠવાડિયે ખૂબ જ અસ્થિર રહેવાની ધારણા છે."

તેમણે કહ્યું કે, “આ સિવાય RBIની મોનેટરી પોલિસી કમિટીની બેઠકના પરિણામો 9 એપ્રિલે જાહેર કરવામાં આવશે. બજાર રેપો રેટમાં ક્વાર્ટર ટકા ઘટાડાની અપેક્ષા રાખી રહ્યું છે. કંપનીઓના ચોથા ક્વાર્ટરના પરિણામ સત્રની શરૂઆત 10 એપ્રિલે ટાટા કન્સલ્ટન્સી સર્વિસિસ (TCS) સાથે થશે. તેમણે કહ્યું કે આ સિવાય રોકાણકારો અમેરિકાના ગ્રાહકોની કિંમતો પર પણ નજર રાખશે. એક્સપર્ટ્સનું કહેવું છે કે માર્કેટ પાર્ટિસિપન્ટ્સ વિદેશી રોકાણકારોની ગતિવિધિઓ, ડોલર સામે રૂપિયાની મૂવમેન્ટ અને ક્રૂડ ઓઈલના ભાવ પર પણ નજર રાખશે.

 અહીં, અમેરિકન ટીવી પર્સનાલિટી અને માર્કેટ એક્સપર્ટ જિમ ક્રેમરે શેરબજાર વિશે ખૂબ જ ડરામણી આશંકા વ્યક્ત કરી છે. તેમણે કહ્યું કે 7 એપ્રિલ 1987ની જેમ સોમવાર પણ શેરબજાર માટે સૌથી ખરાબ દિવસ સાબિત થઈ શકે છે! CNBC પરના તેમના શો મેડ મનીમાં, ક્રેમરે સ્પષ્ટપણે ચેતવણી આપી હતી કે જો યુએસ પ્રમુખ ડોનાલ્ડ ટ્રમ્પ એવા દેશોનો સંપર્ક નહીં કરે કે જેમણે પ્રતિશોધાત્મક ટેરિફ લાદ્યા નથી, તો તે 1987ની જેમ ક્રેશ તરફ દોરી શકે છે.