કોન્સ્ટાસ બૂમરાહને દેખાડી રહ્યો હતો આંખો, મળ્યો જડબાતોડ જવાબ, મોઢું લટકાવીને પેવેલિયન પરત ફરવું પડ્યું, જુઓ વીડિયો

Bumrah-Konstas' heated argument: જ્યારથી સેમ કોન્સ્ટાસે મેલબર્ન ક્રિકેટ ગ્રાઉન્ડ ખાતે ટેસ્ટ ડેબ્યૂ કર્યું છે ત્યારથી તે ભારતીય ખેલાડીઓ સાથે પંગા લઇ રહ્યો છે. મેલબોર્ન ટેસ્ટ મેચમાં પહેલા તેણે જસપ્રીત બૂમરાહ અને પછી યશસ્વી જાયસ્વાલને પણ છેડ્યા હતા. સિડનીમાં શુક્રવારથી શરૂ થયેલી પાંચમી ટેસ્ટ મેચમાં પણ કોન્સ્ટાસ તેની હરકતોથી ઉપર આવ્યો નહોતો અને બૂમરાહ સાથે ટકરાયો હતો. આ મેચમાં કેપ્ટનશીપ કરી રહેલા બૂમરાહે આ 19 વર્ષના છોકરાને એવો જવાબ આપ્યો કે તેને મોઢું લટકાવીને પેવેલિયન પરત ફરવું પડ્યું.

સિડની ક્રિકેટ ગ્રાઉન્ડ પર રમાઈ રહેલી આ મેચમાં ભારતે મોટો નિર્ણય લીધો અને રોહિત શર્માને આરામ આપ્યો અને બૂમરાહને કેપ્ટનશિપ કરવાની તક આપી. જો કે, ભારતીય બેટ્સમેનો ફરી નિષ્ફળ ગયા અને આખી ટીમ 185 રનમાં સમેટાઈ ગઈ. દિવસની રમતના અંત સુધીમાં ઑસ્ટ્રેલિયાએ પણ એક વિકેટ ગુમાવીને 9 રન બનાવ્યા હતા.

દિવસની છેલ્લી ઓવર ચાલી રહી હતી અને છેલ્લો બૉલ નાખવાનો હતો. બૂમરાહ આ ઓવર બોલિંગ કરી રહ્યો હતો. જ્યારે તે ભાગી રહ્યો હતો ત્યારે કોન્સ્ટાસે કેટલીક અડચણો ઊભી કરી. તેણે બૂમરાહને કંઈક કહ્યું. બૂમરાહ પણ રોકાવાનો નહોતો. તે કોન્સ્ટાસને જવાબ આપવા લાગ્યો. એટલામાં 19 વર્ષીય આ ઑસ્ટ્રેલિયન ખેલાડીએ બૂમરાહને આંખો દેખાડવા લાગ્યો અને તેની તરફ જવા લાગ્યો. બૂમરાહ પણ તેની તરફ આવવા લાગ્યો. બંને વચ્ચે ગરમા-ગરમી થવા લાગી. આ દરમિયાન અમ્પાયરે દરમિયાનગીરી કરી અને બંને પોતપોતાની જગ્યાએ પાછા ફર્યા.

આગામી બૉલ બૂમરાહે ફેંક્યો જે ઓવર અને દિવસનો છેલ્લો બૉલ હતો. છેલ્લા બૉલ પર બૂમરાહે ઉસ્માન ખ્વાજાને સ્લિપમાં કેએલ રાહુલના હાથે કેચ આઉટ કરાવ્યો હતો. ત્યારબાદ, બૂમરાહ તેના સાથી ખેલાડીઓ સાથે ઉજવણી કરવાને બદલે, કોન્સ્ટાસ તરફ વળ્યો અને તેને આંખો દેખાડી. કોન્સ્ટાસ પાસે તેનો કોઈ જવાબ નહોતો. તે ચૂપચાપ મોઢું લટકાવીને પેવેલિયનમાં પાછો ફર્યો.

JASPRIT BUMRAH IS HEATING. 🙇

- Box office stuff in Border Gavaskar Trophy. pic.twitter.com/WrbIyme7WZ

— Johns. (@CricCrazyJohns) January 3, 2025

ટીમ તરફથી રિષભ પંતે સૌથી વધુ 40 રન બનાવ્યા હતા. પંતે 98 બૉલનો સામનો કરીને 3 ચોગ્ગા અને એક છગ્ગા ફટકાર્યા હતા. પંત બાદ રવિન્દ્ર જાડેજા બીજા નંબર પર હતો. તેણે 26 રન બનાવ્યા હતા. વિરાટ કોહલી 17 રન અને શુભમન ગિલ 20 રન બનાવીને આઉટ થયા હતા.

ઑસ્ટ્રેલિયા તરફથી સ્કૉટ બોલેન્ડે 4 વિકેટ ઝડપી હતી. મિચેલ સ્ટાર્કને 3 સફળતા મળી હતી. પેટ કમિન્સે 2 વિકેટ લીધી હતી. નાથન લિયોનને એક સફળતા મેળવી હતી. પોતાની ડેબ્યૂ મેચ રમી રહેલો બ્યૂ વેબસ્ટર આ ઇનિંગમાં એકપણ વિકેટ લઇ શક્યો નહોતો.