શું તમે પણ નાની-નાની સમસ્યાઓ માટે જાતે દવાઓ લો છો? તો ચેતી જજો! આ જીવલેણ પણ સાબિત તરહી શકે છે, જાણો

શું તમે પણ શરદી, ખાંસી, તાવ કે પેટમાં દુખાવાની સ્થિતિમાં મેડિકલ સ્ટોરમાંથી દવાઓ જાતે લો છો? જો હા, તો ચેતી જજો, કેમકે આ એક મોટી સમસ્યાનું કારણ બની શકે છે. ઇન્ટરનેટ પરથી માહિતી મેળવીને નાના રોગોની સારવાર માટે જાતે દવાઓ લેવાનું ચલણ આજકાલ ઘણું જોવા મળી રહ્યું છે. નિષ્ણાતોના મતે, આ આદત ક્યારેક ગંભીર સ્વાસ્થ્ય સમસ્યાઓને જન્મ આપી શકે છે. ઘણી પરિસ્થિતિઓમાં, તે એવા રોગોનું જોખમ વધારે છે જે જીવલેણ સાબિત થઈ શકે છે.

નિષ્ણાંતોના મતે, જ્યારે આપણે તબીબી સલાહ વિના દવાઓ લઈએ છીએ, ત્યારે રોગના લક્ષણો દબાઈ જાય છે, અને વાસ્તવિક રોગ છુપાયેલો રહે છે. ઉદાહરણ તરીકે, જો પેટમાં દુખાવો થાય છે અને પેઇનકિલર લેવામાં આવે, તો દુખાવો થોડા સમય માટે ઓછો થઈ શકે છે, પરંતુ તે એપેન્ડિસાઈટિસ, ગેસ્ટ્રિક અલ્સર અથવા લીવરની સમસ્યાને કારણે હોઈ શકે છે. આવા કિસ્સાઓમાં, દર્દીને લાગે છે કે દવાએ મદદ કરી છે, પરંતુ વાસ્તવમાં રોગ અંદરથી ગંભીર થતો રહે છે. અને આ પરિસ્થિતિમાં લોકો ડૉક્ટર પાસે મોડેથી પહોંચે છે અને ત્યાં સુધીમાં રોગ વધી ગયો હોય છે.

આ ઉપરાંત, ડૉક્ટરની સલાહ વિના એન્ટિબાયોટિક્સ લેવાથી પણ એન્ટિબાયોટિક પ્રતિકારનું જોખમ રહેલું છે, જેના વિશે વૈશ્વિક આરોગ્ય સંસ્થાઓ સતત ચિંતા વ્યક્ત કરી રહી છે. યોગ્ય માત્રા વિના અથવા કોર્સ પૂર્ણ કર્યા વિના એન્ટિબાયોટિક્સ લેવાથી શરીરમાં હાજર બેક્ટેરિયા સંપૂર્ણપણે ખતમ થતા નથી, પરંતુ ધીમે ધીમે તેમને મજબૂત બનાવે છે અને એન્ટિબાયોટિક-પ્રતિરોધક બેક્ટેરિયા બની જાય છે. જો બેક્ટેરિયા દવાઓ પ્રત્યે પ્રતિરોધક બને છે, તો ભવિષ્યમાં તે જ સરળ ચેપ પણ જીવલેણ બની શકે છે કારણ કે પછી કોઈ સામાન્ય દવા કામ કરશે નહીં.

આરોગ્ય નિષ્ણાતો કહે છે કે, શરૂઆતમાં જાતે દવાઓ લેવી સરળ અને સસ્તી લાગી શકે છે, પરંતુ તેના ગેરફાયદા ખૂબ મોટા હોઈ શકે છે. તો આગલી વખતે જ્યારે તમે જાતે દવા લેવા માટે મેડિકલ સ્ટોર પર જાઓ, ત્યારે યાદ રાખો કે ડૉક્ટરની સલાહ વિના દવા લેવાથી તમારી જાતને અને સમાજને જોખમમાં મુકી શકો છો.

સલામત અને સ્વસ્થ રહેવાનો શ્રેષ્ઠ રસ્તો એ છે કે કોઈપણ રોગ માટે ડૉક્ટરની સલાહ લો. તમારા પરિવારના કોઈ સભ્ય માટે ફાયદાકારક દવા તમારા પર પણ કામ ન કરે, તેથી હંમેશા શરીરની સ્થિતિ અને નિષ્ણાતની સલાહ લઈને દવાઓ લો.

 (Disclaimer: અહીં વિષય અંગેની સામાન્ય માહિતી આપવામાં આવી છે. અત્રે એ ઉલ્લેખ કરવો જરૂરી છે કે SidhiKhabar.com સ્વાસ્થ્યને લગતી કોઈપણ પ્રકારની સલાહ, સારવાર કે ઉપચાર પદ્ધતિની પુષ્ટિ કરતું નથી. કોઈપણ માહિતી અથવા માન્યતાને અમલમાં મૂકતા પહેલા નિષ્ણાંત તબીબની સલાહ અવશ્ય લો.)