IPL 2025 માટે ધોનીને કોઈપણ ભોગે રિટેન કરશે CSK, કરી મોટી જાહેરાત
IPL 2025 અગાઉ મેગા ઓક્શન યોજાવાનું છે, પરંતુ BCCIએ અત્યાર સુધી રિટેન્શન પોલિસી જાહેર કરી નથી. એવામાં, મહેન્દ્ર સિંહ ધોની IPLની આગામી સીઝન રમશે કે નહીં તે એક મોટો સવાલ છે. અગાઉ એક અહેવાલ સામે આવ્યો હતો કે BCCI તરફથી 5-6 ખેલાડીઓને રિટેન કરવાનો નિયમ લાગૂ કરવામાં આવે છે તો જ ધોની આગામી સીઝન રમશે. પરંતુ હવે ચેન્નાઈ સુપર કિંગ્સ તરફથી મહેન્દ્ર સિંહ ધોનીને લઈને એક મોટા સમાચાર સામે આવ્યા છે.
ક્રિકબઝના અહેવાલ મુજબ, IPL 2025માં રમવાનો મહેન્દ્ર સિંહ ધોનીનો નિર્ણય કોઈ નીતિ પર નિર્ભર નહીં હોય. અગાઉ, એવા અહેવાલ હતા કે CSK અને ધોની પોતાના ભવિષ્ય બાબતે ત્યારે નિર્ણય કરશે, જ્યારે BCCI IPL 2025 મેગા ઓક્શન માટે રીટેન્શન પોલિસીનો ખુલાસો કરશે, પરંતુ હવે CSKના અધિકારીઓનું એમ પણ કહેવું છે કે જો ધોની આગામી સીઝનમાં રમવાનું નક્કી કરે છે, તો ધોની તેમના રીટેન્શનમાંથી એક હશે, ભલે BCCI માત્ર 2 જ રિટેન્શનને મંજૂરી આપે.
રિપોર્ટ્સ અનુસાર, રિટેન્શન નિયમો જાહેર કરવામાં વધુ સમય લાગશે. ભારતીય ક્રિકેટ કંટ્રોલ બોર્ડ (BCCI) મહિનાના અંત સુધી જાહેરાતને મુલતવી રાખી શકે છે. દરેકની નજર 29 સપ્ટેમ્બરે બેંગ્લોરમાં યોજાનારી BCCIની વાર્ષિક સામાન્ય સભા (AGM) પર પણ છે. એમ માનવામાં આવે છે કે BCCI અધિકારીઓએ ફ્રેન્ચાઇઝીઓને વિલંબના સંકેત આપ્યા છે, જેમણે તાજેતરમાં જ રીટેન્શન નિયમો બાબતે તેમનો સંપર્ક કર્યો હતો.
બીજી તરફ એવા સમાચાર પણ સામે આવ્યા છે કે આંતરરાષ્ટ્રીય ક્રિકેટમાંથી નિવૃત્તિ લઈ ચૂકેલા ખેલાડીઓને અનકેપ્ડ ખેલાડીઓની યાદીમાં સામેલ કરવામાં આવી શકે છે. વાસ્તવમાં, અગાઉ IPLમાં એક નિયમ હતો કે જો કોઈ ખેલાડી આંતરરાષ્ટ્રીય ક્રિકેટમાં 5 કે તેનાથી વધુ વર્ષથી નિવૃત્ત થયો હોય, તો તેને અનકેપ્ડ ખેલાડી તરીકે ગણવામાં આવે. આ નિયમ 2021 બાદ નાબૂદ કરવામાં આવ્યો હતો, પરંતુ માનવામાં આવે છે કે આ નિયમ ફરી એકવાર શરૂ થઈ શકે છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp