હિન્દુ છોકરીઓ સાથે રેપ અને બ્લેકમેલિંગના મુખ્ય આરોપીનું શૉર્ટ એનકાઉન્ટર

Police Encounter: મધ્ય પ્રદેશની રાજધાની ભોપાલમાં હિન્દુ છોકરીઓ પર રેપ, બ્લેકમેઇલિંગ અને 'લવ જિહાદ'ના ગંભીર કેસમાં મુખ્ય આરોપી ફરહાનનું શૉર્ટ એન્કાઉન્ટર થઈ ગયું છે. વાસ્તવમાં, આરોપી ફરહાને પોલીસ કસ્ટડીમાંથી ભાગવાનો પ્રયાસ કર્યો હતો. આ દરમિયાન તેના પગમાં ગોળી વાગી હતી. ગોળી વાગ્યા બાદ ફરહાનને હમીદિયા હૉસ્પિટલમાં દાખલ કરાવવામાં આવ્યો છે. લવ જિહાદ કેસમાં કુલ 5 FIR દાખલ કરવામાં આવી છે, જેમાં લગભગ બધી FIRમાં ફરહાન જ આરોપી છે.

ભોપાલ ઝોન-1ના DCP પ્રિયંકા શુક્લાએ ઘટનાની પુષ્ટિ કરતા કહ્યું કે, અશોકા ગાર્ડન પોલીસ સ્ટેશનની એક ટીમ પુરાવા એકત્રિત કરવા માટે ફરહાનને બિલકિસગંજ ગામ લઈ જઈ રહી હતી. રસ્તામાં ફરહાને ટોઇલેટ જવાના બહાને કાર રોકી અને પરિસ્થિતિનો લાભ લઈને સબ-ઇન્સ્પેક્ટરની પિસ્તોલ છીનવી લેવાનો પ્રયાસ કર્યો. આ દરમિયાન ઝપાઝપીમાં, પોલીસની પિસ્તોલમાંથી એક ગોળી ચાલી ગઈ જે ફરહાનના પગમાં વાગી. ઇજાગ્રસ્ત ફરહાનને તાત્કાલિક હમીદિયા હૉસ્પિટલમાં દાખલ કરવામાં આવ્યો હતો અને આ મામલાની વધુ તપાસ ચાલી રહી છે.

અશોકા ગાર્ડન પોલીસ સ્ટેશનના ઇન્ચાર્જ હેમંત શ્રીવાસ્તવે જણાવ્યું કે આ ઘટના શુક્રવારે રાત્રે 11:30 વાગ્યાની આસપાસ બની હતી. તેમણે કહ્યું કે, જ્યારે ફરહાન રાતીબડ વિસ્તારમાં શૌચાલયનો ઉપયોગ કરવા માટે પોલીસ વાહનમાંથી નીચે ઉતર્યો ત્યારે તેની સાથે એક સબ-ઇન્સ્પેક્ટર અને એક કોન્સ્ટેબલ પણ નીચે ઉતર્યા. આ દરમિયાન, ફરહાને SIની સર્વિસ રિવોલ્વર છીનવી લેવાનો પ્રયાસ કર્યો અને ભાગવાનો પ્રયાસ કર્યો. ઝપાઝપી દરમિયાન ગોળી ફરહાનના જમણા પગમાં વાગી ગઈ. આ ઘટનાને લઈને ભાજપના ધારાસભ્ય રામેશ્વર શર્માએ X પર લખ્યું કે, ‘એક જિહાદીનું શોર્ટ એનકાઉન્ટર..’

પોલીસ પૂછપરછ દરમિયાન આરોપી ફરહાને કહ્યું હતું કે, તેને પોતાના કૃત્યોનો કોઈ પસ્તાવો નથી કારણ કે તેણે 'સવાબ'નું (સારું કામ) કામ કર્યું છે. રિમાન્ડ દરમિયાન ફરહાનની પૂછપરછમાં, તેણે ખુલાસો કર્યો કે તેણે કૉલેજમાં પોતાની ઉંમરના મુસ્લિમ છોકરાઓની એક ગેંગ બનાવી હતી, જે માત્ર હિન્દુ છોકરીઓ સાથે જ મિત્રતા અને પ્રેમ સંબંધો બનાવતા હતા. આ ગેંગમાં એવો કડક નિયમ હતો કે કોઈ પણ મુસ્લિમ છોકરી સાથે પ્રેમ સંબંધ નહીં બનાવે.

એકવાર હિન્દુ છોકરી સાથે પ્રેમ સંબંધ સ્થાપિત થઈ ગયા બાદ, તેને હુક્કા લાઉન્જ, પબ અથવા ગેંગના સભ્યોના ભાડાના રૂમમાં લઈ જવામાં આવતી હતી. ત્યાં નશાની હાલતમાં તેમની સાથે દુષ્કર્મ કરવામાં આવતું હતું અને તેનો વીડિયો બનાવ્યા બાદ, બ્લેકમેઇલિંગ દ્વારા અન્ય છોકરીઓ સાથે મિત્રતા કરવા દબાણ કરવામાં આવ્યું હતું.