ડોનાલ્ડ ટ્રમ્પે બિહારમાં રહેવા માટે કરી અરજી! સમસ્તિપુર પોલીસ સ્ટેશન પહોંચ્યો મામલો

Donald Trump to Shri Ram Bihar gets bizarre residence certificate applications: બિહાર સરકારનું RTPS પોર્ટલ આ દિવસોમાં સોશિયલ મીડિયા પર મજાકનો વિષય બની ગયું છે. ક્યારેક કોઈ ટ્રેક્ટરના નામે રહેણાંક પ્રમાણપત્ર જાહેર કરવામાં આવી રહ્યું છે તો ક્યારેક કૂતરાના નામે. તાજેતરમાં વધુ એક ચોંકાવનારો કિસ્સો સામે આવ્યો છે. હવે બિહારના સમસ્તીપુર જિલ્લામાં અમેરિકાના રાષ્ટ્રપતિ ડોનાલ્ડ ટ્રમ્પના નામે રહેણાંક પ્રમાણપત્ર માટે અરજી કરવામાં આવી છે. આ મામલો મોહિઉદ્દીનનગર બ્લોકનો છે, જ્યાં એક અજાણ્યા વ્યક્તિએ ટ્રમ્પના પરિવારની સંપૂર્ણ વિગતો સાથે ફોર્મ ભર્યું હતું.

અરજીની તારીખ 29 જુલાઈ 2025 છે અને ફોર્મ પૂરી રીતે ઓનલાઈન ભરવામાં આવ્યું છે. અરજદારનું નામ ‘ડોનાલ્ડ જોન ટ્રમ્પ’ છે, પિતાનું નામ ‘ફ્રેડરિક ક્રાઇસ્ટ ટ્રમ્પ’ છે અને માતાનું નામ ‘મેરી એન મેકલિયોડ’ નોંધાવવામાં આવ્યું છે. આ ઉપરાંત, હસનપુર ગામના  વોર્ડ નંબર 13, પોસ્ટ ઓફિસ બકરપુર, પોલીસ સ્ટેશન મોહિઉદ્દીનનગર, જિલ્લો સમસ્તીપુર, રાજ્ય બિહાર લખવામાં આવ્યું છે. E-mai ID- donaldtrumpofficial@gmail.com. પણ નોંધાયેલ છે. તેમાં, ‘મતદાર કાર્ડ’ હેતુ માટે રહેઠાણ પ્રમાણપત્રની માગણી કરવામાં આવી છે.

આ અગાઉ પણ આવા ઘણા કિસ્સાઓ સામે આવી ચૂક્યા છે જેમાં મુખ્યમંત્રી નીતિશ કુમાર, ટ્રેક્ટર, ડોગ બાબુ જેવા નામોથી અરજીઓ આપવામાં આવી હતી. તાજેતરમાં મુઝફ્ફરપુરમાં, કોઈએ મુખ્યમંત્રી નીતિશ કુમારના નામે રહેઠાણ પ્રમાણપત્ર માટે પણ અરજી કરી હતી. એટલું જ નહીં, દરિંદા નામના વ્યક્તિએ રાક્ષસને તેના પિતા કહીને અરજી કરી હતી. આ ઘટનાઓ દર્શાવે છે કે પોર્ટલ પર કોઈપણ નામ દાખલ કરીને ફોર્મ ભરી શકાય છે અને તેના આધારે રહેઠાણ પ્રમાણપત્ર પણ બનાવી શકાય છે.

આ મામલાઓએ બિહાર સરકારની ડિજિટલ સિસ્ટમ પર પ્રશ્નો ઉભા કર્યા છે. સર્વિસ પ્લસ પોર્ટલ પર આવી નકલી એન્ટ્રીઓને તપાસવા માટે કોઈ મજબૂત પદ્ધતિનો અભાવ સિસ્ટમની ગંભીર ખામીઓને ઉજાગર કરે છે. ફોર્મમાં "સ્વ-એફિડેવિટ" દ્વારા આપવામાં આવેલા ખોટા દાવાઓની ચકાસણી કર્યા વિના દસ્તાવેજો બનાવવાથી વહીવટીતંત્રની બેદરકારી દેખાય છે. હવે જોવાનું એ રહ્યું કે આવી ઘટનાઓને રોકવા માટે વહીવટીતંત્ર શું પગલાં લે છે અને વાયરલ થયેલી આ અરજી પર શું પગલાં લેવામાં આવે છે. જોકે, મોહિઉદ્દીનનગરમાં અત્યારે માત્ર અરજી આવી છે અને તે હજુ સુધી પ્રમાણપત્ર જાહેર કરવામાં આવ્યું નથી. સૂત્રોનું માનવું છે કે આ મામલો હવે સાયબર પોલીસ સ્ટેશન સુધી પહોંચ્યો છે. પોલીસ આ મામલાની તપાસ કરી રહી છે.