દિલ્હી એરપોર્ટ પર હોબાળો, પાયલટે મુસાફરની 7 વર્ષીય દીકરી સામે માર્યો

દિલ્હી એરપોર્ટના ટર્મિનલ 1 પર એક મુસાફરે એર ઇન્ડિયા એક્સપ્રેસના પાઇલટ પર ગંભીર આરોપ લગાવ્યા છે. અંકિત દીવાન નામના મુસાફરનો દાવો છે કે પાઇલટ કેપ્ટન વીરેન્દ્રએ તેની સાથે ખરાબ વર્તન જ નહીં, પરંતુ શારીરિક હુમલો પણ કર્યો હતો, જેના કારણે તે લોહીલુહાણ થઈ ગયો હતો. સોશિયલ મીડિયા પર વીડિયો અને ફોટા સામે આવ્યા બાદ આ મામલો વધુ વેગ પકડ્યો છે. પીડિતનું કહેવું છે કે આ ઘટનાએ તેનું આખું વેકેશન બગાડ્યું અને તેનો પરિવાર, ખાસ કરીને તેની 7 વર્ષની પુત્રી હજુ પણ આઘાતમાં છે.

મુસાફરે દાવો કર્યો છે કે પાઇલટે તેની 7 વર્ષની પુત્રીની સામે તેની સાથે મારમારી કરી. આ ઘટના બાદ પુત્રી આઘાતમાં છે. આ ઘટના બાદ, એર ઇન્ડિયા એક્સપ્રેસે એક નિવેદન બહાર પાડીને દુ:ખ વ્યક્ત કર્યું અને આરોપી પાઇલટને તાત્કાલિક ફરજ પરથી હટાવી દીધો.

મુસાફરે સોશિયલ મીડિયા પોસ્ટમાં લખ્યું કે, ‘મને અને મારા પરિવારને સ્ટાફ દ્વારા ઉપયોગમાં લેવાતી સુરક્ષા તપાસ લાઇન પર જવા માટે કહેવામાં આવ્યું કારણ કે અમારી સાથે સ્ટ્રોલરમાં 4 મહિનાનું બાળક હતું. સ્ટાફ સભ્ય મારી સામે લાઇન તોડી રહ્યો હતો. જ્યારે મેં વાંધો ઉઠાવ્યો, ત્યારે કેપ્ટન વીરેન્દ્ર ગુસ્સે થયા અને પૂછ્યું, ‘શું તમે અભણ છો અને લખેલું બોર્ડ વાંચી શકતા નથી આ એન્ટ્રી ફક્ત સ્ટાફ માટે છે’

AIX Pilot, Capt. Vijender Sejwal pic.twitter.com/Ntp1pnDgdb

— Ankit Dewan (@ankitdewan) December 19, 2025

ત્યારબાદ બોલાબોલી થઈ ગઈ અને પાઇલટે મારા પર હુમલો કર્યો, જેના કારણે મને લોહી નીકળ્યું. પાઇલટના શર્ટ પરનું લોહી પણ મારું હતું. મારું વેકેશન બરબાદ થઈ ગયું. મારી 7 વર્ષની પુત્રીએ તેના પિતાને નિર્દયતાથી માર મારતા જોયા. તે હજુ પણ આઘાતમાં અને ડરમાં છે.

ઘટના બાદ એર ઇન્ડિયા એક્સપ્રેસે તેના પાઇલટના વર્તન બદલ દિલગીરી વ્યક્ત કરી અને એક સત્તાવાર નિવેદન બહાર પાડ્યું. એરલાઇને જણાવ્યું કે આરોપી કર્મચારીને તાત્કાલિક અસરથી બધી સત્તાવાર જવાબદારીઓમાંથી દૂર કરવામાં આવ્યો છે અને આ મામલાની તપાસ કરવામાં આવી રહી છે.

કંપનીના પ્રવક્તાએ એક નિવેદનમાં જણાવ્યું હતું કે, ‘અમને દિલ્હી એરપોર્ટ પર અમારા એક કર્મચારી સાથે સંકળાયેલી ઘટનાની જાણ કરવામાં આવી છે. આ કર્મચારી બીજી એરલાઇનની ફ્લાઇટમાં મુસાફર તરીકે મુસાફરી કરી રહ્યો હતો અને તેનો એક અન્ય મુસાફર સાથે ઝઘડો થયો હતો.’ અમે આ પ્રકારના વર્તનની સખત નિંદા કરીએ છીએ. સંબંધિત કર્મચારીને તાત્કાલિક અસરથી સત્તાવાર ફરજ પરથી દૂર કરવામાં આવ્યો છે અને આ મામલાની તપાસ કરવામાં આવી રહી છે. તપાસના તારણોના આધારે યોગ્ય શિસ્તભંગના પગલાં લેવામાં આવશે. એર ઇન્ડિયા એક્સપ્રેસ તેના કર્મચારીઓ પાસેથી ઉચ્ચ આચરણ અને વ્યાવસાયિક વર્તનની અપેક્ષા રાખે છે. કંપનીએ જણાવ્યું હતું કે, "અમે દરેક સમયે જવાબદારીપૂર્વક વર્તન કરીએ છીએ તેની ખાતરી કરવા માટે પ્રતિબદ્ધ છીએ.’