દેશના ભૂતપૂર્વ ગૃહમંત્રી, સંરક્ષણ મંત્રી અને લોકસભાના અધ્યક્ષ શિવરાજ પાટિલનું 91 વર્ષની વયે નિધન
કોંગ્રેસના વરિષ્ઠ નેતા અને ભૂતપૂર્વ કેન્દ્રીય ગૃહમંત્રી શિવરાજ પાટિલનું લાતુરમાં નિધન થઇ ગયું. તેઓ 91 વર્ષના હતા. તેમણે સવારે લગભગ 6:30 વાગ્યે લાતુરમાં તેમના નિવાસસ્થાને અંતિમ શ્વાસ લીધા હતા. તેઓ લાંબા સમયથી બીમાર હતા અને લાતુરમાં સારવાર લઈ રહ્યા હતા. શિવરાજ પાટિલ તેમના લાંબા રાજકીય કારકિર્દી દરમિયાન અનેક મહત્ત્વપૂર્ણ હોદ્દાઓ સંભાળી ચૂક્યા હતા, જેમાં લોકસભાના અધ્યક્ષ તરીકે સેવા આપવી અને કેન્દ્રીય મંત્રીમંડળમાં વિવિધ મુખ્ય વિભાગો સંભાળવા સહિતનો સમાવેશ થાય છે.
શિવરાજ પાટિલ મહારાષ્ટ્રના લાતુરથી 7 વખત સંસદ સભ્ય રહ્યા હતા. તેમણે પંજાબના રાજ્યપાલ અને ચંદીગઢના પ્રશાસક તરીકે પણ સેવા આપી હતી. તેમને UPA સરકારમાં ગૃહમંત્રી તરીકે નિયુક્ત કરવામાં આવ્યા હતા. તેમણે દેશના સંરક્ષણ મંત્રી તરીકે પણ સેવા આપી હતી.
શિવરાજ પાટીલનો જન્મ 12 ઓક્ટોબર, 1935ના રોજ થયો હતો. તેમણે 2004 થી 2008 સુધી ભારતના ગૃહમંત્રી તરીકે સેવા આપી હતી. તેમણે 1991 થી 1996 સુધી લોકસભાના અધ્યક્ષ તરીકે સેવા આપી હતી. તેઓ ભારતની લોકસભાના 10મા અધ્યક્ષ હતા. તેમણે 2010 થી 2015 સુધી પંજાબ રાજ્યના રાજ્યપાલ અને કેન્દ્રશાસિત પ્રદેશ ચંદીગઢના પ્રશાસક તરીકે સેવા આપી હતી. 1980ના દાયકામાં ઇન્દિરા ગાંધી અને રાજીવ ગાંધીના મંત્રીમંડળમાં શિવરાજ પાટીલે સંરક્ષણ પ્રધાન તરીકે સેવા આપી હતી.
2008ના મુંબઈ હુમલા બાદ વ્યાપક ટીકા બાદ શિવરાજ પાટીલે 30 નવેમ્બર, 2008ના રોજ ગૃહમંત્રી પદેથી રાજીનામું આપી દીધું હતું. તેમણે હુમલાઓ માટે જવાબદાર સુરક્ષા ખામીઓ માટે નૈતિક જવાબદારી લીધી હતી.
શિવરાજ પાટીલે હૈદરાબાદની ઓસ્માનિયા યુનિવર્સિટીમાંથી વિજ્ઞાનની ડિગ્રી મેળવી હતી અને બોમ્બે યુનિવર્સિટીમાં કાયદાનો અભ્યાસ કર્યો હતો. 1967-69 દરમિયાન તેમણે સ્થાનિક સરકાર (લાતુર મ્યુનિસિપાલિટી)માં સેવા આપી. કેશવરાવ સોનાવણે અને માણિકરાવ સોનાવણેએ શિવરાજ પાટિલને લાતુર મતવિસ્તારમાંથી ચૂંટણી લડવાની પહેલી તક મેળવવામાં મદદ કરી. પાટિલ પંચમસાલી લિંગાયત સમુદાયના હતા. તેમણે જૂન 1963માં વિજયા પાટિલ સાથે લગ્ન કર્યા. તેમને બે બાળકો છે, એક પુત્ર અને એક પુત્રી. તેઓ સત્ય સાંઈ બાબાના કટ્ટર અનુયાયી પણ હતા.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp