ઝેલેન્સ્કી સાથેની મુલાકાત પહેલા ટ્રમ્પની અવળચંડાઈ! કહ્યું- હું બોસ, મારી મંજૂરી વગર....' શું આ રીતે યુદ્ધ પૂરું થઈ શકશે? જાણો
છેલ્લા ચાર વર્ષથી ચાલી રહેલ રશિયા-યુક્રેનનું યુદ્ધ ઘણી કોશિષો છતાં પણ થંભવાનું નામ નથી લઈ રહ્યું. આ યુદ્ધને પૂરું કરવાનો દાવો કરનાર ડોનાલ્ડ ટ્રમ્પની મધ્યસ્થી પણ નિષ્ફળ નીવડી હતી. ત્યારે ફરી એકવાર રશિયા-યુક્રેન વચ્ચેના લોહિયાળ જંગને સમાપ્ત કરવા માટે રવિવારે એક હાઈ-પ્રોફાઈલ બેઠક યોજાવાની છે. અને આ બેઠકના બે દિવસ પહેલા જ અમેરિકન પ્રમુખ ટ્રમ્પે યુક્રેનના પ્રમુખ ઝેલેન્સ્કીને સ્પષ્ટ શબ્દોમાં પોતાની તાકાતનો અહેસાસ કરાવ્યો છે. ટ્રમ્પે જણાવ્યું હતું કે, 'યુએસ પ્રમુખની લીલી ઝંડી વગર ઝેલેન્સ્કીની કોઈપણ યોજના કે માંગની કોઈ કિંમત નથી.'
માહિતી મુજબ ટ્રમ્પે આક્રમક વલણ અપનાવતા કહ્યું હતું કે, 'ઝેલેન્સ્કી પાસે ત્યાં સુધી કંઈ જ નથી, જ્યાં સુધી હું તેને મંજૂર ન કરું. અમે જોઈશું કે, તેમની પાસે શું પ્રસ્તાવ છે.' ટ્રમ્પના આ નિવેદને સાફ કરી દીધું છે કે આ શાંતિ પ્રક્રિયામાં અમેરિકા માત્ર એક સાથી નહીં, પણ મુખ્ય 'નિર્ણાયક'ની ભૂમિકામાં છે. મહત્વનું છે કે, આવતીકાલે એટલે કે 28 ડિસેમ્બરે ફ્લોરિડાના માર-એ-લાગોમાં ટ્રમ્પ અને ઝેલેન્સ્કી વચ્ચે ઐતિહાસિક મુલાકાત થવાની છે. આ બેઠકનો મુખ્ય એજન્ડા '20-સૂત્રીય શાંતિ યોજના' છે. યુક્રેન આ પ્લાન હેઠળ ભવિષ્યની સુરક્ષા માટે નાટોના 'આર્ટિકલ 5' જેવી મજબૂત અમેરિકન ગેરંટી ઈચ્છી રહ્યું છે. આ ઉપરાંત, સરહદ પર 'ડિમિલિટ્રાઈઝ્ડ ઝોન'(અસૈન્ય ક્ષેત્ર) બનાવવા અને ઝપોરિઝિયા પરમાણુ પ્લાન્ટના સંચાલન જેવા મુદ્દાઓ પર પણ નિર્ણાયક ચર્ચા થઈ શકે છે.
ઝેલેન્સ્કીએ તાજેતરમાં જ કહ્યું હતું કે, તેમનો શાંતિ પ્લાન 90% તૈયાર છે. અને આ સમજૂતી માત્ર અમેરિકા અને યુક્રેન વચ્ચેની નથી. ઝેલેન્સ્કીના મતે આ શાંતિ દસ્તાવેજમાં ચાર સ્તંભો છે: યુક્રેન, અમેરિકા, રશિયા અને યુરોપ. રશિયા અને યુરોપની સહમતી વગર આ સમજૂતી અસરકારક સાબિત થઈ શકે તેમ નથી. ગયા અઠવાડિયે મિયામીમાં યોજાયેલી ત્રિપક્ષીય બેઠક બાદ હવે સૌની નજર રવિવારની બેઠક પર છે. ઝેલેન્સ્કીને આશા છે કે, નવા વર્ષની શરૂઆત પહેલા યુદ્ધના અંત માટે કેટલાક મોટા અને નિર્ણાયક નિર્ણયો લેવામાં આવે. પરંતુ જાણે ટ્રમ્પના વર્ચસ્વવાદી વલણે યુક્રેન માટે શરતો માનવાની મજબૂરી ઊભી કરી છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp