'અંબાતી રાયાડું કોહલીને પસંદ નહોતો એટલે...' 2019ના વર્લ્ડ કપને લઇને પૂર્વ ખેલાડીનો સનસનીખેજ દાવો
Robin Uthappa Blames Virat Kohli For Ambati Rayudu: વિરાટ કોહલીની ગણતરી ભારતના સૌથી સફળ કેપ્ટનોમાં થાય છે. તેની કેપ્ટનશીપ હેઠળ, ભારતીય ટીમ કોઇ પણ ICC ટ્રોફી જીતી શકી નથી, પરંતુ ત્રણેય ફોર્મેટમાં ભારતીય ટીમનો દબદબો જોવા મળ્યો. ત્યારબાદ, 2022 ની શરૂઆતમાં, તેણે ભારતીય ટીમની કેપ્ટનશિપ સંપૂર્ણપણે છોડી દીધી. પરંતુ વર્ષો બાદ, 2007ના T20 વર્લ્ડ કપ વિજેતા ખેલાડી રોબિન ઉથપ્પાએ વિરાટ કોહલી વિશે એક મોટો ખુલાસો કર્યો છે. રોબિન ઉથપ્પાના મતે, વિરાટને કોઇ ખેલાડી પસંદ નહોતો, જેના કારણે તેને 2019ના ODI વર્લ્ડ કપમાં પસંદ કરવામાં આવ્યો નહોતો.
રોબિન ઉથપ્પાનું એક નિવેદન તાજેતરમાં વાયરલ થયું હતું. તેમણે કહ્યું હતું કે વિરાટ કોહલીના કારણે યુવરાજ સિંહની કારકિર્દીનો અંત આવ્યો. હવે તેણે વિરાટ અને ભારતીય ટીમના પૂર્વ ખેલાડી અંબાતી રાયડુ વચ્ચેના સંબંધો પર ચોંકાવનારું નિવેદન આપ્યું છે. રોબિન ઉથપ્પાએ કહ્યું હતું કે વિરાટને રાયડુ પસંદ નહોતો, જેના કારણે તેને 2019 વર્લ્ડ કપ ટીમમાં પસંદ કરવામાં આવ્યો નહોતો.
અંબાતી રાયડુ 2019 વર્લ્ડ કપમાં રમવા માટે એક મોટો દાવેદાર હતો. પરંતુ ટીમની જાહેરાત સમયે તેનું નામ ટીમમાં નહોતું. તેના સ્થાને વિજય શંકર ઇંગ્લેન્ડ ગયો, જે એક આશ્ચર્યજનક નિર્ણય હતો.
રોબિન ઉથપ્પાએ લલ્લાન્ટોપને આપેલા ઇન્ટરવ્યૂમાં કહ્યું હતું કે, 'જો વિરાટ કોહલીને કોઇ પસંદ ન આવતો (ખેલાડી) અથવા કોઇ સારો ન લાગે તો તેને ટીમમાંથી કાઢી મૂકવામાં આવતો હતો.' અંબાતી રાયડુ આનું સૌથી મોટું ઉદાહરણ છે. દરેક વ્યક્તિની પોતાની પસંદગી હોય છે, પરંતુ એકવાર ખેલાડી તેના લક્ષ્ય સુધી પહોંચી જાય પછી તમે તેના માટે દરવાજા બંધ કરી શકતા નથી. તેની પાસે વર્લ્ડ કપના કપડાં, વર્લ્ડ કપ કીટ બેગ, બધું જ ઘર પર હતું. એક ખેલાડી એવું વિચારતો હશે કે તે વર્લ્ડ કપ રમવા જઇ રહ્યો છે. પણ તમે તેના માટે દરવાજા બંધ કરી દીધા. મારા મતે આ યોગ્ય નહોતું.
અંબાતી રાયડુની આંતરરાષ્ટ્રીય કારકિર્દી વર્ષ 2013માં શરૂ થઇ હતી. તો, તેણે ભારતીય ટીમ માટે તેની છેલ્લી મેચ વર્ષ 2019માં રમી હતી. આ સમયગાળા દરમિયાન, અંબાતી રાયડુએ ભારત માટે 55 વન-ડે અને 6 T20 મેચ રમી હતી. વન-ડેમાં, તેણે 47.05 ની સરેરાશથી 1694 રન બનાવ્યા, જેમાં 10 અડધી સદી અને 3 સદીનો સમાવેશ થાય છે. બીજી તરફ, તેણે T20માં 42 રન બનાવ્યા હતા. અંબાતી રાયડુએ મે 2023માં ભારતીય ક્રિકેટના તમામ ફોર્મેટમાંથી નિવૃત્તિ લઇ લીધી હતી.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp