'આઠ ચોપડી પાસ ગૃહમંત્રીને સત્તા પર રહેવાનો અધિકાર નથી' જીગ્નેશ મેવાણીએ કરી રાજીનામાંની માંગ
ગુજરાતમાં છેલ્લા કેટલાક દિવસથી કોંગ્રેસ નેતા જીગ્નેશ મેવાણી અને રાજ્યના ગૃહમંત્રી હર્ષ સંઘવી વચ્ચે વાંક યુદ્ધ ચાલી રહ્યું છે. ગુજરાતમાં દારૂ, ડ્રગ્સ, જુગાર અને કુટણખાનાના વેપારના વિવાદે હવે ઉગ્ર રાજકીય સ્વરૂપ ધારણ કર્યું છે. આ મુદ્દે ગુજરાત પ્રદેશ કોંગ્રેસ સમિતિના કાર્યકારી પ્રમુખ જીગ્નેશ મેવાણીએ ફરી એકવાર નાયબ મુખ્યમંત્રી હર્ષ સંઘવી પર આરોપો લગાવી રાજીનામાની માંગ કરી રહ્યા છે. આ સાથે મેવાણીએ મુખ્યમંત્રી ભૂપેન્દ્ર પટેલ સામે પણ સવાલ ઊભા કર્યા છે.
કોંગ્રેસ નેતા જીગ્નેશ મેવાણીએ આ મુદ્દે પ્રેસ કોન્ફરન્સ યોજીને જણાવ્યું હતું કે, ગુજરાતના તમામ જિલ્લામાં જાણે કાયદો અને બંધારણના ધજાગરા ઉડતા હોય એમ દારૂ-જુગારના અડ્ડા, ડ્રગ્સનો વેપલો અને કુટણખાના ચાલી રહ્યા છે. અને આ બધું રાજ્ય સરકાર અને પોલીસની રહેમ નજર વિના શક્ય નથી. હું નથી માનતો કે ડ્રગ્સનો સાચો આંકડો વિધાનસભાના મંચ ઉપર જાહેર કરાઈ રહ્યો છે. ગુજરાતના દરિયા કાંઠા પરથી અંદાજિત રૂ. 64 હજાર કરોડનું ડ્રગ્સ પકડાયું છે. આ દરમિયાન હર્ષ સંઘવીના રાજીનામાની માંગ કરતા મેવાણીએ કહ્યું કે, ‘આઠ ચોપડી પાસ ગૃહમંત્રીને સત્તાના કોઈ સ્થાન ઉપર રહેવાનો અધિકાર નથી.'
આ ઉપરાંત તેમણે આ મુદ્દે મુખ્યમંત્રી ભૂપેન્દ્ર પટેલની ચૂપકિદી પર પણ સવાલ ઉઠાવ્યા હતા. મેવાણીએ સવાલ કર્યો હતો કે, ‘આ વિશે મુખ્યમંત્રીને કંઈ કહેવાનું થતું નથી કે પછી તેમને મજા પડી રહી છે. તેમના પેટનું પાણી કેમ નથી હલતું જ્યારે તેમના જ વિધાનસભા ક્ષેત્રમાં દારૂના કારણે બહેન-દીકરીઓ વિધવા થઈ રહી છે.’
આ પહેલા પણ મેવાણીએ ઉચ્ચ પોલીસ અધિકારીઓની હાજરીમાં રાજ્યના ડીજી, ગૃહ સચિવ અને મુખ્યમંત્રીને પડકાર ફેંક્યો હતો કે, ‘આદરણીય હર્ષભાઈ સંઘવી અને આદરણીય ભૂપેન્દ્રભાઈ પટેલના વિધાનસભા ક્ષેત્રમાંથી દારૂ-જુગારના અડ્ડા બંધ કરીને બતાવે.’ આ દરમિયાન મેવાણીએ પોલીસને પણ ધમકીના શુરમાં જણાવ્યું હતું કે, ‘તમારા પટ્ટા ઉતરી જશે, યાદ રાખજો.’ ત્યારે નાયબ મુખ્યમંત્રી હર્ષ સંઘવીએ પણ એક કાર્યક્રમમાં મેવાણીની ભાષાનો મુદ્દો ઉઠાવીને સંસ્કારની વાત કરી હતી. ત્યાર પછી રાજ્યના ડીજીએ પણ એક પોલીસ કાર્યક્રમમાં સંબોધન કરતી વખતે આડકતરી રીતે મેવાણી જેવા નેતાઓના નિવેદન સહન નહીં કરવાનું કહ્યું હતું. આમ, આ સમગ્ર મુદ્દાથી રાજકીય ગરમાવો વ્યાપી ગયો છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp