હવે મહારાષ્ટ્રમાં મંત્રીમંડળ પર ફસાયો પેંચ, ફડણવીસ અને પવાર સાથે દિલ્હી કેમ ન ગયા શિંદે?

મહારાષ્ટ્રના વર્તમાન નાયબ મુખ્યમંત્રી એકનાથ શિંદેની નારાજગી દૂર કરવામાં ભાજપના નેતાઓને સફળતા મળી શકી નથી. હાલમાં એક મુખ્યમંત્રી અને 2 નાયબ મુખ્યમંત્રીએ શપથ લીધા છે, મંત્રીમંડળનું વિસ્તરણ કરવાનું બાકી છે. મુખ્યમંત્રી દેવેન્દ્ર ફડણવીસ અને નાયબ મુખ્યમંત્રી અજીત પવાર કેબિનેટ વિસ્તરણ અંગે ચર્ચા કરવા ગઈકાલે જ દિલ્હી પહોંચ્યા હતા, પરંતુ બીજા નાયબ મુખ્યમંત્રી એકનાથ દિલ્હી ગયા નહોતા. ગઈ કાલે ફડણવીસ અને પવાર દિલ્હીમાં શિંદેની રાહ જોતા રહ્યા.

એકનાથ શિંદે બિહારની જેમ મહારાષ્ટ્રમાં ફરીથી મુખ્યમંત્રી બનવાના તમામ શક્ય પ્રયાસો કરી રહ્યા હતા, પરંતુ ચૂંટણી અગાઉ ભાજપે તેમને મુખ્યમંત્રી પદને લઈને કોઈ ખાતરી આપી નહોતી. 2024ની વિધાનસભા ચૂંટણીના પરિણામો આવ્યા બાદ શિંદેએ મુખ્યમંત્રી પદ મેળવવા માટે દરેક સંભવિત પ્રયાસો ચાલુ રાખ્યા હતા, પરંતુ દિલ્હીથી સંદેશ મળતાં જ શિંદેએ પોતાની તલવાર મ્યાંનમાં રાખી દીધી હતી.

ભલે મુખ્યમંત્રી નહીં, પરંતુ એકનાથ શિંદેએ ગૃહમંત્રી પદ મેળવવાનો પ્રયાસ કર્યો, પરંતુ ભાજપે તેમને ગૃહ મંત્રાલય આપવાનો ઇનકાર કરી દીધો, ત્યારથી, શિંદે જ્યારે પણ ફડણવીસ અને પવાર સાથે કોઈ કાર્યક્રમમાં જોવા મળતા હતા, ત્યારે તેમની બોડી લેંગ્વેજ પરથી સ્પષ્ટ થઈ ગયું હતું કે તેઓ નારાજ છે અને તેઓ બંનેને ટાળી રહ્યા છે.

રાજ્યની ઉપરાજધાની નાગપુરમાં સોમવાર, 16 ડિસેમ્બરથી મહારાષ્ટ્ર વિધાનસભાનું શિયાળુ સત્ર શરૂ થઈ રહ્યું છે, આ અગાઉ કેબિનેટનું વિસ્તરણ કરવું જરૂરી છે, પરંતુ હજુ પણ વિભાજનને લઈને ત્રણેય પક્ષો વચ્ચે મંત્રાલયો અને મંત્રી પદને લઈને વાત બની શકી નથી. એટલા માટે દિલ્હી દરબારમાં ઉકેલ શોધવા ત્રણેય નેતાઓએ સાથે જવું જરૂરી હતું, પરંતુ શિંદે દિલ્હી ગયા નહોતા. શિવસેનાના નેતાઓનું કહેવું છે કે દિલ્હીમાં સંસદનું સત્ર ચાલી રહ્યું છે, તેથી ભાજપના તમામ નેતાઓ વ્યસ્ત છે અને ઔપચારિક બેઠક માટે સમય લઇને જવું યોગ્ય છે.