ટ્રમ્પે આ દેશને આપ્યો મોટો ઝટકો! G-20 સમિટમાં આમંત્રણ નહીં આપે; સબસિડી પર પણ લગાવી દીધો પ્રતિબંધ

દક્ષિણ આફ્રિકાની યજમાનીમાં થયેલા G-20 સમિટમાં અમેરિકાએ ભાગ લીધો નહોતો. ટ્રમ્પ વહીવટીતંત્રે જણાવ્યું હતું કે, ‘દક્ષિણ આફ્રિકાની સરકાર ખ્રિસ્તીઓની હત્યાઓ પર મૌન સાધી રહી છે અને ગુનેગારો સામે કોઈ કાર્યવાહી કરી નથી. આ દરમિયાન, અમેરિકન રાષ્ટ્રપતિ ડોનાલ્ડ ટ્રમ્પે એક મોટો નિર્ણય લીધો છે. તેમણે જાહેરાત કરી છે કે તેઓ આગામી વર્ષે ફ્લોરિડામાં યોજાનારી G-20 સમિટમાં દક્ષિણ આફ્રિકાને આમંત્રણ નહીં આપે અને દક્ષિણ આફ્રિકાને આપવામાં આવતી તમામ સબસિડી પણ બંધ કરી રહ્યા છે.

અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે સોશિયલ મીડિયા પ્લેટફોર્મ X પર આ અંગે એક પોસ્ટ શેર કરી હતી. પોસ્ટમાં રાષ્ટ્રપતિ ટ્રમ્પે કહ્યું હતું કે, ‘અમેરિકાએ દક્ષિણ આફ્રિકામાં G20 સમિટમાં ભાગ લીધો નહોત કારણ કે દક્ષિણ આફ્રિકાની સરકાર આફ્રિકન લોકો અને ડચ, ફ્રેન્ચ અને જર્મન મૂળના અન્ય લોકો સામેના ભયાનક માનવાધિકાર ઉલ્લંઘનોને સ્વીકારી રહી નથી અથવા અને ન તો તેમને નિપટી રહી છે. સરળ શબ્દોમાં કહીએ તો, ત્યાં શ્વેત લોકોની હત્યા કરવામાં આવી રહી છે અને તેમની જમીન અને ખેતરો છીનવી લેવામાં આવી રહ્યા છે.’

તેમણે કહ્યું કે, ‘સૌથી ખરાબ વાત એ છે કે ટૂંક સમયમાં બંધ થનારા ન્યૂ યોર્ક ટાઇમ્સ અને કહેવાતા ફેક ન્યૂઝ મીડિયા આ કથિત નરસંહાર સામે એક પણ શબ્દ બોલી શકતી નથી. આ જ કારણ છે કે કટ્ટરપંથી ડાબેરી મીડિયાના જૂઠા અને દંભી લોકો બંધ થતા જઇ રહ્યા છે.’

અમેરિકન રાષ્ટ્રપતિ ડોનાલ્ડ ટ્રમ્પે કહ્યું કે, ‘G20 સમિટના સમાપનના દિવસે, દક્ષિણ આફ્રિકાએ સમારોહમાં હાજર અમારા અમેરિકન દૂતાવાસના એક વરિષ્ઠ પ્રતિનિધિને G20ની અધ્યક્ષતા સોંપવાનો ઇનકાર કર્યો હતો. તેથી, મારા નિર્દેશ પર દક્ષિણ આફ્રિકાને હવે 2026 G20માં આમંત્રિત કરવામાં આવશે નહીં, જેનું આયોજન આગામી વર્ષે અમેરિકના મિયામી શહેરમાં કરવામાં આવશે.’ દક્ષિણ આફ્રિકાએ વિશ્વને બતાવી દીધું છે કે તેઓ ક્યાંય પણ સભ્યપદ માટે લાયક નથી, અને અમે તાત્કાલિક અસરથી તેમને આપવામાં આવતી તમામ ચૂકવણી અને સબસિડી રોકી રહ્યા છીએ."

ઉલ્લેખનીય છે કે આ વર્ષે દક્ષિણ આફ્રિકાએ જોહાનિસબર્ગમાં 2025 G20 સમિટનું આયોજન કર્યું હતું, જેમાં ભારતના વડાપ્રધાન નરેન્દ્ર મોદી, ઇટાલીના વડાપ્રધાન જ્યોર્જિયા મેલોની, બ્રિટિશ વડાપ્રધાન કીર સ્ટારમર, કેનેડા, ઓસ્ટ્રેલિયા, જાપાન, દક્ષિણ કોરિયા, નેધરલેન્ડ, જમૈકા અને અન્ય ઘણા દેશોના ટોચના નેતાઓએ ભાગ લીધો હતો. જોકે, આ વર્ષે અમેરિકા દ્વારા G20 નેતાઓના સમિટનો બહિષ્કાર કરવામાં આવ્યો હતો અને અમેરિકાના રાષ્ટ્રપતિ ડોનાલ્ડ ટ્રમ્પે તેમાં હાજરી આપી નહોતી.