રશિયામાં 7.1ની તીવ્રતાના ઝટકા અનુભવાયા, આ દેશોએ જાહેર કર્યું ત્સુનામીનું એલર્ટ
રશિયાના કામચટકા દ્વીપકલ્પના પૂર્વ કિનારા નજીક એક શક્તિશાળી ભૂકંપ નોંધવામાં આવ્યો છે. જર્મન રિસર્ચ સેન્ટર ફોર જીઓસાયન્સે જણાવ્યું હતું કે ભૂકંપની તીવ્રતા 7.1 નોંધાઈ હતી અને તે સમુદ્રની સપાટીથી 10 કિલોમીટર નીચે હતો. તો, યુનાઇટેડ સ્ટેટ્સ જીઓલોજિકલ સર્વે (USGS)એ કહ્યું હતું કે ભૂકંપની તીવ્રતા 7.4 હતી અને ઊંડાઈ 39.5 કિલોમીટર હતી. ડેટામાં તફાવત હોવા છતા બંને એજન્સીઓએ તેને ગાઢ અને શક્તિશાળી ભૂકંપ ગણાવ્યો છે. ભૂકંપ બાદ, પેસિફિક ત્સુનામી વોર્નિંગ સિસ્ટમે સંભવિત ત્સુનામીની ચેતવણી જાહેર કરી હતી અને કહ્યું હતું કે આ વિસ્તારમાં ભય હોઈ શકે છે.
ચીનના ત્સુનામી ચેતવણી કેન્દ્રએ પણ સવારે 10:37 વાગ્યે (બીજિંગના સમય) માહિતી જાહેર કરતા કહ્યું હતું કે કામચટકા દ્વીપકલ્પના પૂર્વીય સમુદ્ર વિસ્તારમાં ભૂકંપ આવ્યો હતો. ભૂકંપની તીવ્રતા 7.1 હતી અને ઊંડાઈ 15 કિલોમીટર હતી. સ્થાનિક સ્તરે ત્સુનામીનો ભય છે. જાપાન બ્રોડકાસ્ટરે જાપાન હવામાન વિજ્ઞાન એજન્સીના સંદર્ભે જણાવ્યુ કે, જાપાન, જે કામચાટકાના દક્ષિણ-પશ્ચિમમાં સ્થિત છે, તેણે કોઈ પણ પ્રકરની ત્સુનામીનું એલર્ટ જાહેર કર્યું નથી.
ભૂકંપ એ જ વિસ્તારમાં આવ્યો હતો જ્યાં જુલાઈમાં 8.8 ની તીવ્રતાનો શક્તિશાળી ભૂકંપ અનુભવાયો હતો. તે સમયે, જાપાન, અમેરિકા અને ઘણા પેસિફિક ટાપુ દેશો- જેમ કે હવાઈ, ચિલી અને કોસ્ટા રિકા માટે ત્સુનામી ચેતવણી જાહેર કરવામાં આવી હતી.
કામચાટકા દ્વીપકલ્પ ભૂસ્તરશાસ્ત્રીય રીતે ખૂબ જ સક્રિય વિસ્તાર છે અને તેને પેસિફિક રિંગ ઓફ ફાયરનો ભાગ માનવામાં આવે છે. અહીં દરરોજ ભૂકંપ અને જ્વાળામુખીની ગતિવિધિઓ થતી રહે છે. આ વિસ્તારમાં મોટા પાયે વિનાશકારી ભૂકંપ આવતા રહે છે.
1952માં કામચાટકા 9.0ની તીવ્રતાના મોટા ભૂકંપથી હચમચી ગયું હતું. આ ભૂકંપને અત્યાર સુધીના સૌથી શક્તિશાળી ભૂકંપમાંથી એક માનવામાં આવે છે. તે સમયે, ભૂકંપના ઝટકાઓએ ભારે તબાહી મચાવી હતી. અને મોટા પાયે ત્સુનામી પણ આવી હતી.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp