Prashant Kishor: પટનામાં હોબાળો, પ્રશાંત કિશોર સહિત 700 કરતા વધુ લોકો સામે FIR, જાણો શું છે મામલો

Bihar BPSC Protest: બિહારની રાજધાની પટનામાં રવિવારે મોડી રાત્રે વિરોધ કરી રહેલા વિદ્યાર્થીઓ પર લાઠીચાર્જ અને વૉટર કેનનનો ઉપયોગ કરવાને લઈને ભારે હોબાળો મચી ગયો છે. વિરોધ દરમિયાન હોબાળો કરવા બદલ પોલીસે 21 નામિત લોકો સાથે 700 અજાણ્યા લોકો વિરુદ્ધ FIR નોંધી છે. આ સિવાય પ્રશાંત કિશોર વિરુદ્ધ પણ FIR નોંધવામાં આવી છે. આ FIR, BNSની અલગ-અલગ કલમો હેઠળ નોંધવામાં આવી છે. ડાબેરી સંગઠનોએ વિદ્યાર્થીઓ પર લાઠીચાર્જના વિરોધમાં આજે વિરોધ કરવાની જાહેરાત કરી છે. ડાબેરી સંગઠનોએ રેલ અને માર્ગ વાહન વ્યવહાર ઠપ્પ કરવાની જાહેરાત કરી છે.

ઉમેદવારોને રસ્તા પર લાવીને હોબાળો કરાવવા બદલ પ્રશાંત કિશોર વિરુદ્ધ કેસ નોંધવામાં આવ્યો છે. પોલીસે જેમની સામે કેસ નોંધ્યો છે તેમાં મનોજ ભારતી (જન સૂરજ પાર્ટીના પ્રમુખ), રહમાંશુ મિશ્રા, કોચિંગ ડિરેક્ટર, નિખિલ મણિ તિવારી, સુભાષ કુમાર ઠાકુર, શુભમ સ્નેહિલ, પ્રશાંત કિશોર (અને 2 બાઉન્સર)નો સમાવેશ થાય છે. આ લોકો પ્રશાંત કિશોર સાથે હતા. આનંદ મિશ્રા, આર.કે. મિશ્રા (રાકેશ કુમાર મિશ્રા), વિષ્ણુ કુમાર, સુજીત કુમાર (સુનામી કોચિંગ)ના નામ સામેલ છે.

આ દરમિયાન તેજસ્વી યાદવે મોડી રાત્રે વિદ્યાર્થીઓ પર થયેલા લાઠીચાર્જને લઈને નીતિશ સરકાર પર આકરા પ્રહારો કર્યા છે. તેમણે કહ્યું કે, 'આટલી કડકડતી ઠંડીમાં પોલીસે જે રીતે ઉમેદવારોને માર્યા, લાઠીચાર્જ કર્યો અને વૉટર કેનનનો ઉપયોગ કર્યો તે ખૂબ જ પીડાદાયક હતું. અમે સખત નિંદા કરીએ છીએ અને ખેદ વ્યક્ત કરીએ છીએ. એક દર્દનાક તસવીર ઉભરી રહી છે. તેજસ્વી તમારી સાથે મજબૂતીથી ઉભા છે. હું એક યુવા છું અને યુવાનોનું દર્દ સમજી શકું છું. અમે નીતિશ કુમાર જીને નોર્મલાઈઝેશન અંગે પત્ર લખ્યો હતો પરંતુ કોઈ જવાબ આવ્યો નથી. અમે લોકશાહીની ગરિમામાં રહીએ છીએ.

આ સિવાય તેમણે કહ્યું કે, 'અમે સરકારમાં પણ રહ્યા છીએ અને અમે પણ સમજીએ છીએ કે આંદોલનને કચડી નાખવું હોય તો કેવી રીતે કચડી નાખવું. કમિશન કંઈ નથી, મુખ્યમંત્રી નીતિશ છે. મુખ્યમંત્રી નીતિશ અધ્યક્ષ બદલવા માગતા નથી. મુખ્યમંત્રી નીતીશના કહેવા પર આ શિયાળામાં વિદ્યાર્થીઓ પર જે રીતે લાઠીચાર્જ કરવામાં આવ્યો તે હૃદયને હચમચાવી દેનારો હતો. જો અમે ઇચ્છતા હોત તો અમે એક કૉલ પર 5 લાખ લોકોને ભેગા કરી શક્યા હોત, પરંતુ શાંતિપૂર્ણ વિરોધ વધુ સારો હતો. ભાજપની B ટીમે આજે આંદોલનને ખતમ કરવાનું કાવતરું ઘડ્યું અને પછી ભાગી ગયા.