ગુજરાત સરકાર ધરોઇ ડેમને વિશ્વ કક્ષાના પ્રવાસન સ્થળ તરીકે વિકસાવવા માટે કામ કરી રહી છે. આ પ્રોજેક્ટ ગુજરાત અને ભારતના વિવિધ પ્રદેશોના પ્રવાસીઓને આ વિશ્વ કક્ષાના પ્રવાસન ક્ષેત્ર સાથે જોડવાનું કામ કરશે અને તેના વિકાસમાં મહત્ત્વની ભૂમિકા ભજવશે.
ધરોઇ ડેમ નજીક સાબરમતી નદી પર બનાવવામાં આવનાર આ પુલનો પ્રોજેક્ટ મેપ અંદાજ ધરોઇ ડેમને વિશ્વ કક્ષાના પ્રવાસન સ્થળ તરીકે વિકસાવવા માટેની વિવિધ જોગવાઇઓને ધ્યાનમાં રાખીને તૈયાર કરવામાં આવ્યો છે. હવે એક મોટો ઘટનાક્રમ પ્રકાશમાં આવ્યો છે. ગુજરાતમાં ધરોઇ ડેમ પાસે ભવ્ય ટેન્ટ સિટીનું પણ આયોજન કરવામાં આવી રહ્યું છે.
ઉત્તર ગુજરાતમાં પ્રવાસનને પ્રોત્સાહન આપવા રાજ્ય સરકારે કરોડો રૂપિયાનો ખર્ચ કર્યો છે. 1100 કરોડના રોકાણ સાથે ધરોઇ ડેમ વિસ્તારનો વિકાસ કરવાનો નિર્ણય લેવામાં આવ્યો છે. હાલમાં અહીં વિકાસની કામગીરી પુરજોશમાં ચાલી રહી છે. ઉત્તર ગુજરાતના ધરોઇ ડેમ વિસ્તારને વર્લ્ડ ક્લાસ ટૂરિસ્ટ ડેસ્ટિનેશન તરીકે વિકસાવવાની તૈયારીઓ શરૂ થઇ ગઇ છે.
રાજ્ય સરકારે ધરોઇ ડેમને પ્રવાસન હબ તરીકે વિકસાવવા માટે એક સર્કિટ બનાવ્યું છે, જે વડનગર, તરંગા, અંબાજી અને રાણકી વાવ જેવા મુખ્ય સ્થળોને 90 કિમીની ત્રિજ્યામાં જોડશે. સમગ્ર પ્રોજેક્ટ 3 તબક્કામાં અમલમાં આવશે. આ પ્રોજેક્ટમાં એડવેન્ચર વોટર સ્પોર્ટ્સ એરેના, એમ્ફીથિયેટર, રિવરેજ ડેવલપમેન્ટ, લેઝર શૉ, પંચતત્વ પાર્ક અને નાદબ્રહ્મ આકર્ષણ હશે.
ગુજરાત સરકારે 2023ના બજેટમાં ધરોઇમાં ટેન્ટ સિટી બનાવવાની જાહેરાત કરી હતી. ડેમ વિસ્તારમાં લગભગ 15-17 હજાર ચોરસ મીટર વિસ્તારમાં 15 ટેન્ટ સાથે ટેન્ટ સિટી બનાવવાની યોજના છે.
12 AC પ્રીમિયમ, લક્ઝરી ટેન્ટ હશે જેમાં એક ટેન્ટમાં 2-3 વ્યક્તિઓ બેસી શકે અને 3 હૉસ્ટેલ ટેન્ટ હશે, જેમાં એકસાથે 6 વ્યક્તિઓ બેસી શકે.
AC VVIP ડાઇનિંગ હૉલ, રિસેપ્શન, વેઇટિંગ એરિયા, સાંસ્કૃતિક કાર્યક્રમો માટે સ્ટેજ અને લાઇટિંગ, કલાકારો માટે AC ગ્રીન રૂમ, મેડિકલ ઇમરજન્સી રૂમ, સાંસ્કૃતિક કાર્યક્રમો માટે જરૂરી બેઠક વિસ્તાર, પાર્કિંગ, વૃક્ષારોપણ સહિતની સુવિધાઓ ઉભી કરવામાં આવશે.
પ્રવાસીઓને ટેન્ટ સિટીમાં નાસ્તો, લંચ અને ડિનર સહિત આવાસ અને ફૂડ પેકેજ પણ મળશે.
ઉલ્લેખનીય છે કે ધોરડો અને ધોળાવીરાની ટેન્ટ સિટી અને સ્ટેચ્યૂ ઓફ યુનિટીને સારો પ્રતિસાદ મળ્યો છે. કચ્છ રણોત્સવ દરમિયાન મોટી સંખ્યામાં પ્રવાસીઓ પણ ટેન્ટ સિટીની મુલાકાત લે છે. તેથી, ધરોઇને વૈશ્વિક પ્રવાસી આકર્ષણ તરીકે લોકપ્રિય બનાવવા માટે, ગુજરાત પ્રવાસન નિગમ દ્વારા ટેન્ટ સિટી બનાવવાનું ટેન્ડર પણ બહાર પાડવામાં આવ્યું છે.
એટલું જ નહીં, આ પ્રોજેક્ટ ધરોઇ ડેમને તેની આસપાસના વિવિધ પ્રવાસન અને તીર્થસ્થાનો જેવા કે તારંગા મંદિર, પોલો વન અને અંબાજી મંદિર સાથે પણ જોડશે, જેનાથી સમગ્ર ઉત્તર ગુજરાતના પ્રવાસન ક્ષેત્રને વેગ મળશે.