Gujarat Weather Forecast: ગુજરાતમાં મહિનાની શરૂઆત સાથે જ હવામાનમાં પણ પલટો આવ્યો છે. માર્ચ મહિનામાં આકરી ગરમી સહન કરવી પડનાર ગુજરાતમાં હવે વરસાદ પડવાનો છે. એપ્રિલની શરૂઆતમાં રાજ્યના ઘણા ભાગોમાં વાવાઝોડા સાથે કમોસમી વરસાદની શક્યતા છે. હવામાન વિભાગની આગાહી મુજબ, ગુજરાતમાં ગાઢ વાદળ છવાયેલા રહેવાની સંભાવના રહેશે. વિભાગના જણાવ્યા અનુસાર, 1-3 એપ્રિલ દરમિયાન રાજ્યના વિવિધ ભાગોમાં વાવાઝોડા સાથે કમોસમી વરસાદ પડવાની સંભાવના છે. ખાસ કરીને સૌરાષ્ટ્ર અને દક્ષિણ ગુજરાતના ભાગોમાં ભારે વરસાદ પડી શકે છે. મધ્ય અને ઉત્તર ગુજરાતમાં પણ છૂટાછવાયા કમોસમી વરસાદની શક્યતા છે.
હવામાન વિભાગે જણાવ્યું હતું કે, 1 એપ્રિલ, 2025ના રોજ, ગીર સોમનાથ, અમરેલી, ભાવનગર, પંચમહાલ, દાહોદ, વડોદરા, છોટા ઉદેપુર, ભરૂચ, નર્મદા, સુરત, નવસારી, તાપી અને વલસાડ જિલ્લાઓમાં છૂટાછવાયા સ્થળોએ વાવાઝોડા સાથે હળવાથી મધ્યમ કમોસમી વરસાદની સંભાવના છે. તો, 2 એપ્રિલ, 2025ના રોજ, સાબરકાંઠા, અરવલી, મહિસાગર, દાહોદ, પંચમહાલ, વડોદરા, છોટા ઉદેપુર, ભરૂચ, નર્મદા, સુરત, તાપી, ડાંગ, વલસાડ, ગિરસોમનાથ, અમરેલી અને નવસારી જિલ્લામાં કેટલાક સ્થળોએ ગાજવીજ સાથે છૂટાછવાયા કમોસમી વરસાદની સંભાવના છે. આ ઉપરાંત 3 એપ્રિલે છોટા ઉદેપુર, નર્મદા, તાપી અને ડાંગ જિલ્લામાં કેટલાક સ્થળોએ ગાજવીજ સાથે હળવો કમોસમી વરસાદ પડવાની સંભાવના છે.
અંબાલાલ પટેલની આગાહીની વાત કરીએ તો, 4-11 એપ્રિલ દરમિયાન હવામાનમાં ફેરફાર જોવા મળશે. સૌરાષ્ટ્ર, દક્ષિણ અને પૂર્વ ગુજરાતમાં કમોસમી વરસાદ પડશે. 10 એપ્રિલથી 13 એપ્રિલ વચ્ચે જોરદાર પવન ફૂંકાશે. 14 એપ્રિલે બંગાળની ખાડીમાં ચક્રવાત સર્જાશે. ભારે પવનને કારણે મકાનોને નુકસાન થવાની સંભાવના. સુકાની અસર જૂન સુધી જોવા મળશે. હવામાનની આગાહી કરનાર અંબાલાલ પટેલે કમોસમી વરસાદની સાથે-સાથે જોરદાર પવન અને કાળઝાળ ગરમીની આગાહી પણ કરી છે. ઉનાળાની મધ્યમાં કમોસમી વરસાદ અને ભારે પવનને કારણે ખેડૂતોના પાકને નુકસાન થશે. આ સાથે જ હવામાનશાસ્ત્રી પરેશ ગોસ્વામીએ પણ આગાહી કરી છે કે, આગામી 5 દિવસ સુધી રાજ્યમાં ભારે વરસાદ સાથે તેજ ભારે પવન ફૂંકાશે.