વીર નર્મદ દક્ષિણ ગુજરાત યુનિવર્સિટી (VNSGU)માં ચાલી રહેલી સેમેસ્ટર પરીક્ષાઓમાં અત્યાર સુધીનો સૌથી આધુનિક અને ગંભીર ચોરીનો મામલો સામે આવ્યો છે, જ્યાં વિદ્યાર્થિનીઓ આર્ટિફિશિયલ ઇન્ટેલિજન્સ (AI) ટૂલ્સનો ઉપયોગ કરતા પકડાયા છે. યુનિવર્સિટીની અચાનક આવેલી ફ્લાઈંગ સ્ક્વોડે કોમ્પ્યુટર સાયન્સની પરીક્ષામાં એક વિદ્યાર્થિનીને Chat GPT અને Gemini જેવા પ્લેટફોર્મથી લાઇવ જવાબો મેળવી કોડિંગના જવાબ લખતા હતા. આ ચોરીની પદ્ધતિએ સમગ્ર શૈક્ષણિક જગતમાં ખળભળાટ મચાવી દીધો છે.
પ્રાપ્ત માહિતી અનુસાર, VNSGUમાં કોમ્પ્યુટર સાયન્સની એક પરીક્ષા દરમિયાન ગેરરીતિના 2 મોટા કિસ્સાઓ સામે આવ્યા છે. કમ્પ્યૂટર સાયન્સનું પેપર હતું. જેમાં વિદ્યાર્થીઓ પરીક્ષામાં પાસ થવા માટે AI ટૂલ્સ અને હાઈટેક ગેજેટ્સનો ઉપયોગ કરતા પકડાયા છે. એક વિદ્યાર્થિની અને એક વિદ્યાર્થી કોડિંગ માટે AI ટૂલ્સનો ઉપયોગ કરતા પકડાયા હતા. કોમ્પ્યુટર સાયન્સની એક પરીક્ષામાં વિદ્યાર્થિનીએ કોડિંગ માટે AIનો ઉપયોગ કર્યો હતો. જોકે વિદ્યાર્થીની પરીક્ષામાં ચોરી કરતા પકડાઈ ગયા હતા. પકડાયેલા વિદ્યાર્થીઓ કોમ્પ્યુટર સાયન્સ અને IT ફેકલ્ટીના છે. તેઓ ChatGPT, Gemini જેવા AI પ્લેટફોર્મ્સથી લાઇવ જવાબ મેળવીને લખી રહ્યા હતા.
એક વિદ્યાર્થિની સ્માર્ટવોચ લઈને પરીક્ષા ખંડમાં પહોંચી હતી અને પ્રશ્નોના જવાબો AIના માધ્યમથી સ્માર્ટવોચમાં સર્ચ કરીને લખતી હતી. સુપરવાઇઝરને શંકા જતાં તપાસ કરતા તે પકડાઈ ગઈ હતી.
અન્ય એક મામલામાં વિદ્યાર્થીએ વોશરૂમમાં જઈને મોબાઇલ અને ChatGPTનો ઉપયોગ કરીને કોડિંગના જવાબો મેળવવાનો પ્રયાસ કર્યો હતો, પરંતુ બહાર નીકળતી વખતે તે પકડાઈ ગયો હતો. વિદ્યાર્થીઓ મોબાઇલ, સ્માર્ટવોચ અને એરબર્ડ જેવા ગેજેટ્સ છુપાવીને પરીક્ષા હોલમાં લઈ જઈ રહ્યા છે. જેની મદદથી તેઓ AI ટૂલ્સનો ઉપયોગ કરી રહ્યા છે.
આ સિવાય વિદ્યાર્થીઓએ કાપલી અને અન્ય સાહિત્ય રાખવા અને તેમાંથી જોઈને ઉત્તરવહીમાં લખવા, હાથ અથવા પગ પર જવાબ લખી લાવવા, ડ્રેસ, રૂમાલ, પાટીયા પર લખાણ રાખવું અને તેમાંથી જવાબ મેળવવો. કેલ્ક્યુલેટર અને અન્ય ઇલેક્ટ્રોનિક ગેજેટ્સ સાથે પકડાવું અથવા તેનો ઉપયોગ કરીને જવાબ લખવો જેવી ગેરરીતિઓ પણ પકડાઈ છે.
યુનિવર્સિટીએ આ કૃત્યને પરીક્ષાની પ્રામાણિકતા અને શૈક્ષણિક ગુણવત્તા પર ગંભીર અસર કરનારું ગણાવ્યું છે. પરીક્ષાઓમાં AI ટૂલ્સ અને હાઇટેક ગેજેટ્સનો ઉપયોગ કરીને ગેરરીતિ આચરવાના ગંભીર કિસ્સાઓ સામે આવતાં શિક્ષણ જગતમાં ખળભળાટ મચી ગયો છે. યુનિવર્સિટીએ તાત્કાલિક પગલાં લઈને ગેરરીતિ અટકાવવા માટે કડક ગાઇડલાઇન્સ જાહેર કરી છે અને પકડાયેલા વિદ્યાર્થીઓ સામે તપાસના આદેશ આપ્યા છે.
ગેરરીતિ અટકાવવા કોલેજોને માટે નવી સૂચના જાહેર કરાઈ
પરીક્ષા હોલમાં મોબાઇલ, સ્માર્ટવોચ, એરબર્ડ લાવવા પર પ્રતિબંધ
પરીક્ષા ખંડમાં પ્રવેશ વખતે અને જતી વખતે દરેક વિદ્યાર્થીઓનું ચેકિંગ કરવું ફરજિયાત
પરીક્ષા દરમિયાન AI ટૂલ્સ પર સખત પ્રતિબંધ
પરીક્ષા દરમિયાન CCTV/કેમેરાથી મોનિટરિંગ કરવું ફરજિયાત
પ્રશ્નપત્ર અને ઉત્તરવહીની પ્રવેશ અગાઉ અને બાદ ચેકિંગ માટે સ્ટાફ નિમણૂંક કરવી.
વિદ્યાર્થીઓને થીયરી અને પ્રેક્ટિકલ ક્લાસમાં સૂચના આપવી કે AI અને ગેજેટ્સથી લખેલા જવાબ કાયદેસર નહીં ગણાય.
પરીક્ષા બાદ AI ડિટેક્શન સોફ્ટવેરથી જવાબોની ચકાસણી.
ચોરી પકડાતા વિદ્યાર્થીઓ વિરુદ્ધ કાયદેસર અને અનુશાસનાત્મક કાર્યવાહી.
વિદ્યાર્થીઓને પરીક્ષા પ્રામાણિકતા રાખવાના પાઠ ભણાવવા ફરજિયાત
ગેરરીતિ અને તેની સજાના પોસ્ટર કે સાઇનેજ દરેક ક્લાસ રૂમમાં લગાવવું.