મંગળવારે સવારે AIIMS ભુવનેશ્વર દ્વારા જારી કરાયેલા મેડિકલ બુલેટિનમાં જણાવાયું હતું કે "દર્દીને ૧૨ જુલાઈના રોજ સાંજે ૫:૧૫ વાગ્યે તેના મિત્ર દ્વારા કેઝ્યુઅલ્ટીમાં લાવવામાં આવી હતી અને તેને IV પ્રવાહી, IV એન્ટિબાયોટિક્સ, ઇન્ટ્યુબેશન અને મિકેનિકલ વેન્ટિલેશનથી પુનર્જીવિત કરવામાં આવી હતી. બર્ન્સ ICUમાં પૂરતા રિસુસિટેશન અને રેનલ રિપ્લેસમેન્ટ થેરાપી સહિત તમામ શક્ય સહાયક વ્યવસ્થાપન છતાં, તેણીને પુનર્જીવિત કરી શકાઈ ન હતી અને ૧૪ જુલાઈના રોજ રાત્રે ૧૧:૪૬ વાગ્યે ક્લિનિકલી મૃત જાહેર કરવામાં આવી હતી"
ફકીર મોહન (ઓટોનોમસ) કોલેજના બીજા વર્ષના ઇન્ટિગ્રેટેડ બી.એડ. વિદ્યાર્થીએ શનિવારે પોતાને આગ ચાંપી દીધી હતી. ઓડિશાના બાલાસોરમાં ફકીર મોહન ઓટોનોમસ કોલેજની 20 વર્ષીય વિદ્યાર્થીનીએ પોતાના પર પ્રોફેસર દ્વારા જાતીય સતામણીનો આરોપ લગાવીને પોતાને આગ ચાંપી દીધી હતી. યુવતીનું સોમવારે રાત્રે મૃત્યુ થયું. ૧ જુલાઈના રોજ, ઓડિશામાં એક વિદ્યાર્થીનીએ તેના કોલેજ પ્રોફેસર પર જાતીય સતામણીના આરોપો લગાવ્યા હતા. તેણે એક લાંબો પત્ર લખ્યો હતો જેમાં પ્રોફેસર દ્વારા મહિનાઓ સુધી થયેલા દુર્વ્યવહાર અને ધમકીઓની વિગતો આપવામાં આવી હતી, પરંતુ કોલેજ સત્તાવાળાઓ કે પોલીસે કોઈ કાર્યવાહી કરી ન હતી. અગિયાર દિવસ પછી, તેણીએ પોતાને આગ લગાવી દીધી હતી અને હાલમાં ૯૦ ટકાથી વધુ દાઝી ગયેલી ઇજાઓ સાથે એઈમ્સ ભુવનેશ્વરમાં જીવન મરણ વચ્ચે ઝોલા ખાઈ આખરે મોતને ભેટી ગઈ. વિદ્યાર્થીની અનેક ફરિયાદો પર કથિત નિષ્ક્રિયતા બદલ કોલેજના આચાર્યની ધરપકડ કરવામાં આવી છે.
સોમવારે સાંજે, રાષ્ટ્રપતિ દ્રૌપદી મુર્મુએ AIIMS ભુવનેશ્વરના બર્ન્સ વોર્ડમાં પીડિતાની મુલાકાત લીધી હતી અને છોકરીના માતાપિતાને મળ્યા હતા, અને તેણીની સારવારમાં તમામ મદદની ખાતરી આપી હતી.
યુવતીએ આવું ક્રૂર મોત કેમ વહોર્યું?
શનિવારે કોલેજના પ્રિન્સિપાલના ચેમ્બરની બહાર જ વિદ્યાર્થીનીએ પોતાને આગ ચાંપી દીધી, જ્યારે સંસ્થાની આંતરિક ફરિયાદ સમિતિએ શિક્ષણ વિભાગના વડા સમીર કુમાર સાહુને પખવાડિયા પહેલા તેના દ્વારા લગાવવામાં આવેલા જાતીય સતામણીના આરોપોમાં ક્લીનચીટ આપી દીધી.
ફરિયાદમાં યુવતીએ આરોપ લગાવ્યો હતો કે તેની સામે જાતીય સતામણી થઈ રહી છે. જો યુવતી કરવામાં આવેલ માંગણીઓ નહીં માને તો તેને પરીક્ષામાં નાપાસ કરવાની ધમકી પણ આપવામાં આવી રહી હતી. RSS-નિયંત્રિત અખિલ ભારતીય વિદ્યાર્થી પરિષદની સક્રિય સભ્ય આ છોકરીએ મુખ્યમંત્રી માઝી, કેન્દ્રીય શિક્ષણ મંત્રી ધર્મેન્દ્ર પ્રધાન, રાષ્ટ્રીય મહિલા આયોગ તેમજ જિલ્લા પોલીસ અધિકારીઓને તેની દુર્દશા વિશે જાણ કરી હતી.
પીડિતાના પિતા જણાવ્યું હતું કે તેમની પુત્રી ઇચ્છતી હતી કે આ બાબતે સ્થાનિક પોલીસમાં FIR નોંધાવવામાં આવે કારણ કે તેને જાતીય સતામણીના આરોપોમાં કોલેજ સત્તાવાળાઓની તપાસ પ્રક્રિયા પર વિશ્વાસ નહોતો.
સોમવારે, પોલીસે બાલાસોરની ફકીર મોહન ઓટોનોમસ કોલેજના પ્રિન્સિપાલ દિલીપ ઘોષની ધરપકડ કરી હતી, જેમને જાતીય સતામણીના આરોપોથી સાહુને બચાવવાના અહેવાલો વચ્ચે સસ્પેન્ડ કરવામાં આવ્યા હતા, અને 20 વર્ષીય પીડિતાને શાળામાંથી કાઢી મૂકવાની ધમકી આપવાની હદ સુધી ગયા હતા. છોકરીએ આત્મહત્યા કર્યા પછી તરત જ પોલીસે સાહુની ધરપકડ કરી હતી.