પાકિસ્તાન સાથે તણાવને કારણે આ ટૂર્નામેન્ટમાં નહીં રમે ભારતીય ટીમ, BCCIએ લીધો મોટો નિર્ણય
પહેલગામમાં થયેલા આતંકવાદી હુમલાના તાર પાકિસ્તાન સાથે જોડાયા બાદ ભારત અને પાકિસ્તાન વચ્ચેના સંબંધો વધુ વણસી ગયા છે. આ દરમિયાન, ભારતીય ક્રિકેટ કંટ્રોલ બોર્ડ (BCCI)એ એક મોટો નિર્ણય લીધો છે. બોર્ડે હાલમાં એશિયન ક્રિકેટ કાઉન્સિલ (ACC)ના તમામ કાર્યક્રમોમાંથી દૂર રહેવાનો નિર્ણય લીધો છે.
ઇન્ડિયન એક્સપ્રેસના અહેવાલ મુજબ, BCCIએ આગામી મહિને શ્રીલંકામાં યોજાનાર મહિલા ઇમર્જિંગ ટીમ્સ એશિયા કપ અને સપ્ટેમ્બરમાં દ્વિવાર્ષિક પુરુષ એશિયા કપમાંથી ખસી જવાના નિર્ણય બાબતે ACCને ની જાણ કરી છે. ACCનું નેતૃત્વ હાલમાં પાકિસ્તાનના મંત્રી મોહસીન નકવીના હાથમાં છે, જે પાકિસ્તાન ક્રિકેટ બોર્ડ (PCB)ના અધ્યક્ષ પણ છે. સૂત્રોએ જણાવ્યું હતું કે આ નિર્ણય પાકિસ્તાન ક્રિકેટને અલગ-થલગ પાડવાના પ્રયાસનો એક ભાગ છે .
BCCIના એક સૂત્રના સંદર્ભે ધ ઈન્ડિયન એક્સપ્રેસના અહેવાલમાં કહેવામા આવ્યું કે, ‘ભારતીય ટીમ એવા ટૂર્નામેન્ટમાં નહીં રમી શકે, જેનું આયોજન ACC દ્વારા કરવામાં આવે, જેનું નેતૃત્વ પાકિસ્તાની મંત્રી કરે છે. આ દેશની ભાવના છે. અમે ACCને આગામી મહિલા ઇમર્જિંગ ટીમ એશિયા કપમાંથી હટવા બાબતે મૌખિક રીતે જાણ કરી દીધી છે, અને તેમના આયોજનોમાં અમારી ભાવિ ભાગીદારી પણ રોકી દેવામાં આવી છે. અમે ભારત સરકાર સાથે સતત સંપર્કમાં છીએ.’
આ વર્ષે સપ્ટેમ્બરમાં મેન્સ એશિયા કપ યોજાવાનો છે, જેનું આયોજન ભારત કરશે. BCCIના આ વલણને કારણે આ ટૂર્નામેન્ટના આયોજન પર પણ સવાલ ઊભો થયો છે. ભારત, પાકિસ્તાન, બાંગ્લાદેશ, અફઘાનિસ્તાન અને શ્રીલંકાનો સમાવેશ કરતા આ ટૂર્નામેન્ટને હાલ પૂરતી ટાળી શકાય છે. સૂત્રોના સંદર્ભે, અહેવાલમાં આગળ કહેવામાં આવ્યું છે કે BCCIએ વાતથી વાકેફ છે કે ભારત વિના એશિયા કપનું આયોજન શક્ય નથી કારણ કે આંતરરાષ્ટ્રીય ક્રિકેટ આયોજનોના મોટાભાગના પ્રાયોજકો ભારતથી છે. આ સિવાય, ભારત-પાકિસ્તાન મેચ વિના, એશિયા કપમાં બ્રોડકાસ્ટર્સને પણ રસ નહીં હોય.
એશિયા કપ 2024ના અધિકારો સોની પિક્ચર્સ નેટવર્ક્સ ઇન્ડિયા (SPNI) દ્વારા આગામી 8 વર્ષ માટે 170 મિલિયન અમેરિકન ડોલરમાં હસ્તગત કરવામાં આવ્યા છે. જો ટૂર્નામેન્ટની આ સીઝન ન થાય, તો ડીલમાં કેટલાક ફેરફારો પણ શક્ય છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp