ડોનાલ્ડ ટ્રમ્પનો આ એક નિર્ણય છેલ્લે વળી ફરી ને ભારતને કરાવશે ફાયદો

શ્રીરામ મ્યુચ્યુઅલ ફંડના અહેવાલમાં કહેવામાં આવ્યું છે કે ભારતની નિકાસને ટ્રમ્પની નવી નીતિથી ફાયદો થઈ શકે છે, કારણ કે અમેરિકા ચીન, મેક્સિકો અને કેનેડાથી થતી નિકાસ પર ટેરિફ વધારી રહ્યું છે. અમેરિકાનું આ પગલું ભારતીય બિઝનેસ માટે અમેરિકન માર્કેટમાં પગ જમાવવાની સારી તક સાબિત થઈ શકે છે.ડોનાલ્ડ ટ્રમ્પનું અમેરિકા પરત ફરવું ભારત માટે ફાયદાકારક સાબિત થઈ શકે છે. શ્રીરામ મ્યુચ્યુઅલ ફંડના એક અહેવાલ મુજબ, ભારત પાસે અમેરિકી રાષ્ટ્રપતિ ડોનાલ્ડ ટ્રમ્પની ટેરિફ નીતિઓથી લાભ મેળવવાની સારી તક છે. કારણ કે ટ્રમ્પ ચીન, મેક્સિકો અને કેનેડામાંથી અમેરિકાની આયાત પર ટેરિફ વધારી રહ્યા છે, જે સંભવિતપણે ભારત જેવા દેશોની તરફેણ કરી શકે છે. રિપોર્ટમાં કહેવામાં આવ્યું છે કે ભારતની નિકાસને આ નીતિનો લાભ મળશે, કારણ કે યુએસ ટેરિફને કારણે ચીન, મેક્સિકો અને કેનેડાની નિકાસને અવરોધનો સામનો કરવો પડી શકે છે. રિપોર્ટમાં ટ્રમ્પના આર્થિક એજન્ડાના ભાગરૂપે નોંધપાત્ર ટેરિફ લાદવાની ઉલ્લેખ કરવામાં આવ્યો છે. આના દ્વારા ટ્રમ્પ અમેરિકન ઉદ્યોગોનું રક્ષણ કરવા અને ડી-ડોલરાઇઝેશનના પડકારોનો જવાબ આપવા માંગે છે.

રજૂ કરાયેલા ટેરિફમાં ચાઇનીઝ આયાત પર વધારાના 10 ટકા ટેરિફ અને કેનેડિયન અને મેક્સિકન આયાત પર 25 ટકા વધારાના ટેરિફનો સમાવેશ થાય છે. આવી નીતિઓ યુ.એસ.માં આ દેશોના વેપારને અવરોધે છે, જે ભારતીય નિકાસકારોને બજાર હિસ્સો મેળવવાની તક પૂરી પાડી શકે છે. રિપોર્ટમાં દાવો કરવામાં આવ્યો છે કે, “ટ્રમ્પે ડી-ડોલરાઇઝેશનને કારણે ટેરિફની ધમકી આપી છે, આ યોજનામાં ચીન પર 10 ટકા અને કેનેડા અને મેક્સિકો પર 25 ટકા વધારાના ટેરિફનો સમાવેશ થાય છે. ટ્રમ્પની વ્યાપક આર્થિક યોજના દરખાસ્ત પરથી સમજી શકાય છે, જે સંભવિતપણે વિશ્વભરના બજારોને અસર કરી શકે છે. ટ્રમ્પ અમેરિકન ઉત્પાદકો માટે કોર્પોરેટ ટેક્સ રેટ 21 ટકાથી ઘટાડીને 15 ટકા કરવા માંગે છે અને ચાઇનીઝ માલ પર 60 ટકા અને અન્ય આયાત પર 10-20 ટકા ટેરિફ લાદવાની યોજના ધરાવે છે.

આ બધા પાછળનો ઉદ્દેશ્ય સ્થાનિક ઉત્પાદનને પ્રોત્સાહન આપવાનો હોવાનું કહેવાય છે, પરંતુ તેનાથી ફુગાવાનું દબાણ વધી શકે છે અને વ્યાજદરમાં વધારો થઈ શકે છે. આ સિવાય ટ્રમ્પ મોટા પાયા પર દેશમાંથી ગેરકાયદેસર ઇમિગ્રન્ટ્સને બહાર કરવાની યોજના બનાવી રહ્યા છે. પોતાની વિદેશ નીતિ વિશે વાત કરતાં ટ્રમ્પ યુક્રેનને આપવામાં આવતી સહાય ઘટાડવા, નાટોની ભૂમિકાને મર્યાદિત કરવા અને ઈઝરાયેલ અને તાઈવાન માટે સમર્થન વધારવા ઈચ્છે છે. રિપોર્ટમાં ફેડરલ રિઝર્વ પર નિયંત્રણ વધારવાના ટ્રમ્પના પ્રયાસો પર પણ ભાર મૂકવામાં આવ્યો છે, જે સંભવિતપણે ટૂંકા ગાળાના બજારની અસ્થિરતા તરફ દોરી શકે છે. રિપોર્ટમાં કહેવામાં આવ્યું છે કે, ઉભરતા વેપારના વલણો વચ્ચે ભારત એક વિશ્વસનીય નિકાસ વિકલ્પ તરીકે લાભ લઈ શકે છે.