અમદાવાદ સાયબર ક્રાઈમ બ્રાન્ચે 36 વર્ષીય અમન નરેન્દ્રનાથ વર્મા નામના વ્યક્તિની ધરપકડ કરી છે. તે ઝારખંડના ધનબાદના ભુઇફોર વિસ્તારનો રહેવાસી છે. અમન માત્ર 12મું ધોરણ પાસ છે, પરંતુ તેણે ખાનગી કમ્પ્યુટર એન્જિનિયરિંગનો કોર્સ પૂર્ણ કર્યો છે અને લગભગ 7 વર્ષથી બેંકિંગ ક્ષેત્રમાં કામ કરી રહ્યો છે. અમદાવાદ સાયબર ક્રાઈમ બ્રાન્ચે ઝારખંડના આ નકલી આવકવેરા અધિકારી અમન નરેન્દ્રનાથ વર્માની ધરપકડ કરી છે. તે કેન્દ્ર સરકારની વિવિધ શાખાઓમાં નોકરીનું વચન આપીને લોકોને છેતરતો હતો.
આરોપી અમન વર્માએ તેના સહયોગીઓ દ્વારા નોકરી શોધતા યુવાનો અને મહિલાઓનો સંપર્ક કર્યો હતો. તેણે ખોટા નામનો ઉપયોગ કરીને અને કેન્દ્ર સરકારની એજન્સીના અધિકારી તરીકે ઓળખ આપીને તેમનો વિશ્વાસ જીત્યો હતો. તેણે રેલવે, આવકવેરા, ખાદ્ય વિભાગ અને આરોગ્ય વિભાગ જેવી સરકારી એજન્સીઓના નામો સાથે મળતા આવતા ઈ-મેલ એડ્રેસ બનાવ્યા અને તેના દ્વારા લોકોને ઓફર મોકલતો હતો. ત્યારબાદ તે મોટા શહેરોની પ્રતિષ્ઠિત હોટલોમાં ઓફિસર તરીકે પોતાને રજૂ કરીને ઇન્ટરવ્યુનું આયોજન કરતો. તે ખોટી રીતે તાલીમ કાર્યક્રમોનું આયોજન કરતો અને પ્રોસેસિંગ અને અન્ય ઔપચારિકતાઓ માટે પૈસા પડાવતો.
એજ પ્રકારે તેણે ઝારખંડ સરકારના ભૂતપૂર્વ PIની પુત્રી સાથે પણ આવકવેરા વિભાગમાં નોકરી અપાવવાના નામે 9.30 લાખ રૂપિયાની છેતરપિંડી કરી. ફરિયાદ બાદ, સાયબર ક્રાઈમ બ્રાન્ચે સમગ્ર કેસનો પર્દાફાશ કર્યો.
આ રિયલ લાઈફના આ ‘સ્પેશિયલ 26’વાળા નકલી આવકવેરા અધિકારી અમન વર્માની ધરપકડ બાદ પૂછપરછ દરમિયાન ખુલાસો થયો કે તેને 2023 માં CBI દ્વારા આવા જ કેસમાં ધરપકડ કરવામાં આવી હતી અને જેલની સજા ભોગવી હતી.
જેલમાંથી છૂટ્યા બાદ તેણે 14 નવા ઈ-મેલ આઈડી બનાવ્યા અને તેના માધ્યમથી દેશભરના 35 થી વધુ નોકરી ઇચ્છુકોનો સંપર્ક કર્યો, તેમની સાથે લાખો રૂપિયાની છેતરપિંડી કરી. તેણે બનાવેલા Email ID સરકારી એજન્સીઓ જેવા હતા, જેમ કે: myhrmssbi.info, incometaxemployeecornerhrms.info, pwdmaha.info, indiapostgov.org, upstoxpro.info, dhnrailnetgov.info, incometaxgov.info, railnetgov.org, indiapostgov.online, maha-arogya.info, rdd-mahgov.info, incometaxhrms.in, railnetgov.com, incometaxgovinfo.inmyhrmssbi.info વગેરે.
આ ઈમેલ આઈડી દ્વારા તેણે નકલી નિમણૂક પત્રો મોકલ્યા, 7 દિવસની તાલીમનું વચન આપ્યું અને પ્રોસેસિંગ ફીમાં 12 લાખ રૂપિયા સુધીની માગણી કરી. વાતચીતમાં જે પણ રકમ નક્કી થતી તે લઈ લેતો અને પછી સંપર્ક તોડી નાખતો.
પૂછપરછમાં એ પણ સામે આવ્યું છે કે આરોપીએ છેલ્લા એક વર્ષમાં 35 થી વધુ યુવક-યુવતીઓ સાથે આ રીતે છેતરપિંડી કરી હતી. અમદાવાદ સાયબર ક્રાઈમ બ્રાન્ચે હવે આ દિશામાં વધુ તપાસ શરૂ કરી છે. આરોપીઓ પાસેથી અનેક ચેકબુક, ATM કાર્ડ, પેન ડ્રાઇવ, બે નકલી આવકવેરા ઓળખ કાર્ડ અને એક લેપટોપ મળી આવ્યું છે. આ કેસ સરકારી નોકરી મેળવવા માટે શોર્ટકટ લેવાનું વિચારતા કોઈપણ વ્યક્તિ માટે એક કડક ચેતવણી તરીકે સેવા આપે છે, કારણ કે આવી બેદરકારી નોંધપાત્ર નુકસાન પહોંચાડી શકે છે.