નેપાળમાં ચાલી રહેલી હિંસા પર PM નરેન્દ્ર મોદીની આવી પહેલી પ્રતિક્રિયા! નેપાળી લોકોને કરી મોટી અપીલ
નેપાળમાં આ સમયે ભારે હોબાળો મચી ગયો છે. વિવિધ સ્થળોએથી હિંસા અને આગચંપીની તસવીરો આવી રહી છે અને હિંસક ઘટનાઓ વચ્ચે GEN-Zના પ્રદર્શનકારીઓ સરકારી ઇમારતો, નેતાઓના ઘરો અને સંસદમાં પણ આગ લગાવી રહ્યા છે. ઉપદ્રવીઓએ આખા શહેરમાં આગચંપી અને તોડફોડ કરીને તણાવનું વાતાવરણ ઉભું કર્યું છે. ભારે હિંસક પ્રદર્શન વચ્ચે નેપાળના વડાપ્રધાન કેપી ઓલી અને ઘણા મંત્રીઓએ પોતાના પદ પરથી રાજીનામું આપી દીધું છે. નેપાળની કમાન સેનાના હાથમાં છે. આ સમગ્ર ઘટના વચ્ચે હવે ભારતના વડાપ્રધાન નરેન્દ્ર મોદીએ નેપાળના લોકોને મોટી અપીલ કરી છે.
વડાપ્રધાન નરેન્દ્ર મોદીએ તેમના સત્તાવાર X હેન્ડલ પર ટ્વીટ કરતા કહ્યું કે, ‘આજે હિમાચલ પ્રદેશ અને પંજાબના પ્રવાસથી પાછા ફર્યા બાદ, સુરક્ષા પર કેબિનેટ સમિતિની બેઠકમાં નેપાળમાં થયેલા ઘટનાક્રમની વિગતવાર ચર્ચા કરવામાં આવી. નેપાળમાં થયેલી હિંસા હૃદયદ્રાવક છે. એ જાણીને ખૂબ જ દુઃખ થયું કે તેમાં ઘણા યુવાનોએ પોતાનો જીવ ગુમાવ્યો છે. નેપાળની સ્થિરતા, શાંતિ અને સમૃદ્ધિ આપણા માટે અત્યંત મહત્ત્વપૂર્ણ છે. હું નેપાળના મારા બધા ભાઈઓ અને બહેનોને શાંતિ અને વ્યવસ્થા જાળવવા માટે નમ્રતાપૂર્વક અપીલ કરું છું.’
વડાપ્રધાન નરેન્દ્ર મોદીએ મંગળવારે નેપાળની પરિસ્થિતિ પર ચર્ચા કરવા માટે સુરક્ષા પર કેબિનેટ સમિતિ (CCS)ની બેઠકની અધ્યક્ષતા કરી. વડાપ્રધાન નરેન્દ્ર મોદી ઉપરાંત, CCSમાં રક્ષા મંત્રી રાજનાથ સિંહ, ગૃહ મંત્રી અમિત શાહ, નાણાં મંત્રી નિર્મલા સીતારમણ અને વિદેશ મંત્રી એસ જયશંકરનો સમાવેશ થાય છે. વડાપ્રધાન નરેન્દ્ર મોદીએ બેઠકમાં ભાર મૂક્યો કે નેપાળની સ્થિરતા, શાંતિ અને સમૃદ્ધિ ભારત માટે અત્યંત મહત્ત્વપૂર્ણ છે. તેમણે કહ્યું કે નેપાળમાં થયેલી હિંસા હૃદયદ્રાવક છે.
GEN-Z આંદોલનને કારણે બે દિવસથી સળગી રહેલા નેપાળમાં સેના તૈનાત કરવામાં આવી છે. રાત્રે 10:00 વાગ્યા બાદ કાઠમંડુના રસ્તાઓ પર સેનાની હિલચાલ શરૂ થઈ ગઈ. નેપાળ સેનાના અનેક સશસ્ત્ર વાહનો આખી રાત કાઠમંડુના રસ્તાઓ પર પેટ્રોલિંગ કરતા રહ્યા. આ દરમિયાન સેનાએ ઘણા ઉપદ્રવીઓની અટકાયત પણ કરી છે. એકંદરે, નેપાળમાં પરિસ્થિતિને નિયંત્રિત કરવાની જવાબદારી હવે સેના પર આવી ગઈ છે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp