Films: 70 ફિલ્મોમાં કામ કરનારી એ હિરોઈન, જેના મોત બાદ 3 દિવસ સુધી ઘરમાં પડી રહ્યો હતો મૃતદેહ, લોકોને આજે પણ યાદ છે ચહેરો

Old Memories: બોલિવુડ અભિનેત્રી નલિની જયવંતે પોતાના કરિયરમાં 70થી વધુ ફિલ્મોમાં કામ કર્યું અને ખૂબ પ્રશંસા મેળવી. પરંતુ અભિનેત્રીની જિંદગીનો અંત ખૂબ જ દુઃખદ રહ્યો. નલિનીનો મૃતદેહ 3 દિવસ બાદ તેના બંગલામાંથી મળી આવ્યો. આ ઘટના 15 વર્ષ જૂની છે, 22 ડિસેમ્બર 2010ની છે. જ્યારે મુંબઈના ચેમ્બુરના યુનિયન પાર્કમાં પોલીસ સાયરનનો અવાજ સંભળાયો. થોડીવારમાં, ઘણા પોલીસ વાહનો ત્યાં પહોંચી ગયા અને એક જૂના બંગલાનો દરવાજો તોડવા લાગ્યા. અવાજ સાંભળીને આસપાસના લોકો પણ એકઠા થઈ ગયા. જ્યારે પોલીસ બંગલાની અંદર પ્રવેશી, ત્યારે ત્યાં એક મહિલાનો 3 દિવસ જૂનો મૃતદેહ મળી આવ્યો, જે અંતિમ સંસ્કારની રાહ જોઈ રહી હતી. આ બીજું કોઈ નહીં પણ પોતાના સમયની પ્રખ્યાત અને સફળ બોલિવુડ અભિનેત્રી નલિની જયવંત હતી. નલિનીએ ન માત્ર સિનેમાને નવી ઊંચાઈ આપી, પરંતુ પોતાની શાનદાર અદાકારી અને સ્ટાઈલથી દર્શકોના દિલ પણ જીતી લીધા. પરંતુ, તેનું મૃત્યુ અત્યંત એકલતા અને મૌનમાં થયું. ચાલો જાણીએ તેના જીવનની કહાની.

નલિની જયવંતની આંખો તળાવ જેટલી ઊંડી હતી, તેનું નાક અણીદાર હતું અને કાતિલ મુસ્કાન, જે દર્શકોને દીવાના બનાવી દેતી હતી. બ્લેક એન્ડ વ્હાઇટ પડદા પર પણ તેની સુંદરતા એટલી પ્રભાવશાળી હતી કે લોકો તેને જોતા જ રહી જતાં હતા. નલિનીનો જન્મ 18 ફેબ્રુઆરી 1926ના રોજ મુંબઈના એક સામાન્ય પરિવારમાં થયો હતો. તેને બાળપણથી જ નૃત્યમાં રસ હતો અને આ શોખ તેને સિનેમામાં લઈ આવ્યો. માત્ર 14 વર્ષની ઉંમરે તેને ફિલ્મ 'બહન'માં કામ કરવાની તક મળી. ત્યારબાદ તેણે ક્યારેય પાછળ વળીને ન જોયું અને દેવ આનંદ, દિલીપ કુમાર, ભારત ભૂષણ જેવા દિગ્ગજો સાથે કામ કર્યું.

પોતાની કારકિર્દીમાં નલિની જયવંતે 70થી વધુ ફિલ્મોમાં અભિનય કર્યો અને ફિલ્મ ઉદ્યોગમાં પોતાનું એક ખાસ સ્થાન બનાવ્યું. તે સમયની સૌથી પ્રભાવશાળી અભિનેત્રીઓમાં ગણાતી હતી. તેણે 'કાલા પાની', 'મુનિમજી', 'મિલન', 'નાસ્તિક' અને 'જાદુ' જેવી ફિલ્મોમાં યાદગાર પાત્રો ભજવ્યા. તેણે 3 દાયકા સુધી રૂપેરી પડદે રાજ કર્યું. રસપ્રદ વાત એ છે કે, નલિનીના કાજોલ સાથે પારિવારિક સંબંધો પણ રહ્યા હતા. હકીકતમાં, કાજોલની નાની શોભના સમર્થ નલિનીની પિતરાઈ બહેન હતી.

નલિની જયવંતે પોતાની ફિલ્મી કારકિર્દીમાં ખ્યાતિની ઊંચાઈઓને સ્પર્શી હોવા છતા, તેનું અંગત જીવન એકલતાથી ભરેલું હતું. તેના છેલ્લા દિવસોમાં તેણે લોકો સાથે વાતચીત કરવાનું લગભગ બંધ કરી દીધું હતું. તે ચેમ્બુરમાં તેના બંગલામાં એક કે બે નોકર સાથે રહેતી હતી, પરંતુ ઘણીવાર અઠવાડિયા સુધી કોઈની સાથે વાત કરતી નહોતી. ધીમે ધીમે, તેણે દુનિયાથી પૂરી રીતે દૂરી બનાવી દીધી હતી. વર્ષ 2010માં તેનું નિધન થઈ ગયું, પરંતુ 3 દિવસ સુધી કોઈને તેની જાણકારી પણ ન મળી. જ્યારે તેના મૃત્યુના સમાચાર ફેલાયા, તો લોકો સ્તબ્ધ થઈ ગયા. ભલે નલિની આજે આપણી વચ્ચે નથી, તેની અદાકારી અને જીવનની કહાની હંમેશાં યાદ રહેશે.